ZEKARIA 6 - Bibilia Kui Mdedie fo Kimochi

Kiwonesio kya nyanya: Magari ha frasi

¹ Ngairia meso hako, ngawona magari haana ha shida hawuka kiidi kya mafumvu hawi, mafumvu ha hawei ha aṟeṟa.

² Igari lya kuwoka liwewode frasi tsa kimande; na igari lya kawi frasi njiiwu.

³ Igari lya kaṟaṟu frasi njiili; na igari lya kaana frasi tsa ifuifu.

⁴ Ngawesa Malaika ulya alededa na inyi. Iwa nyi waki Mndumii oko?

⁵ Malaika ulya kanjihaluo, Magari ha nyi njotanu tsiina tsiukie oshanguni lo Mndumii-Ruwa.

⁶ Igari lilya lya frasi njiiwu likakure likahenda ora lo mtsudu; na lilya lya frasi njiili likahenda ora lo kyukanyi igari lilya lya ifuifu likahenda ora lo nuka.

⁷ Walya wa kimande wakakunda ihenda ipfo na ipfo, nao kawawia, kurenyi muhende ipfo na ipfo wuyanenyi.

⁸ Nlyong'u kanjilaha kanjiwia, ambuya walya wahenda ora lo mtsudu wanjiwihiṟia moo orukenyi lo mtsudu.

Yoshua ashimbuyo

⁹ Idedo lya Mndumii likanjichea lyehamba

¹⁰ Ambilya shindo mawokonyi ha wandu maata walesamiṟo, nawo nyi Helidai, na Tobia, na Yedaya; mfiri naafo uhende mbenyi ya Yosia mana o Sefanyia mba iya waleikoya wawuka Babeli;

¹¹ Ee, ambilia fesa na sahabu, nooke oṟo, noṟike Yosua mdohu, ai mana o Yehosadaki, mkohanyi ang'anyi;

¹² Nombie Mndumii Menyi Matorito nahamba adi, Ambuya mndu chu alaho nyi Njana nyio echiwika hekalu lya Mndumii.

¹³ Ee, nyio echiwika hekalu la Mndumii; nyio echiduo wuitoṟi wo; nechidamia loṟikehu lo wuitoṟi, kuwekaapfo na mkohani loṟikehu lo wuitoṟi, kochiwada chila ya ofoṟo kiidi kyawo.

¹⁴ Oṟo tso tsewa tsa Helidai na Tobia na Yedaya; na kipfa kya woloru wo Mana o Sefanyia tsiwe ngumbuo hekalunyi lya Mndumii.

¹⁵ Walya wa kuleshe wache iwika hekalu lya Mndumii; nanyo mochimanya Mndumii menyi matorito anjidumie konu ishi shechiinutsyo, kokoya motambahana iindya ṟu lya Mndumii, Ruwa onu.