ZEKARIA 5 - Bibilia Kui Mdedie fo Kimochi

Kiwonesio kya kaṟandaṟu: Kitapu kekerunduka

¹ Ngawuya ngawona kitapu kirunduka nginehu.

² Malaika ulya kanjiwesa, “Nkiki uwonyi?” Inyi ngawehaluo njiwonyi kitapu kirunduka nginehu - uleshe wokyo mawoko kenda na wulandari mawoko haana na keenga.

³ Kyasia kanjiwia, “Ipfo kiidi kya kitapu kyo kukuṟehiye pfo oseso lochihoya oruka loose. Ora lumu luluṟehiye ke waiwi wose wechiwingio na ifuno orukenyilu, na ora lungi wose wekelya nyamu tsa wongo nawo nyi wechiwutyo wado.

⁴ Mndumii Menyi Matorito nahamba ke nechidika oseso lu ko orio mba na mṟi fo waiwi na walya welya nyamu tsa wongo wechisenda rina lyake kya maai. Oseso lu lochirumatsa mba tsa maho na mashidi.”

Kiwonesio kya mfungade: Mndu mka kikunjenyi

⁵ Malaika ulya alededa na inyi kacha kanjiwia, “Iriya meso hapfo wulalu uambuye kechiwutika.

⁶ Inyi ngawesa nkiki ikyo? Nao kanjiwia ikyo nyi kikunja kiichuwo madeko ha oruka loose.”

⁷ Kikunja ki kiwode sooṟo ya menya njisalaṟe; kikapfunuyo ngawonapfo mndu mka adamyepfo.

⁸ Malaika ulya kanjiwia - “Mndumka-chu nyi akeri imrutsa wukika.” Malaika ulya kamtsindikia kulya kikunjenyi kakipfinyikia.

⁹ Ngairiya meso hako ngawona se waka wawi wainjichea, waweirundutso nyi otanu, wawewode makungo cha ha mamtonyi. Wakawo wakairia kikunja kilya nginehu.

¹⁰ Kudi ngawesa Malaika ulya alededa na inyi. Nku wakeri iduo kikunja ki?

¹¹ Nao kanjihaluo wakiduo orukenyi lo Sinari. Wechiwika pfo hekalu likamemarisa wawikepfo kikunjaki.