ZEKARIA 4 - Bibilia Kui Mdedie fo Kimochi

Kiwonesio kya katanu: Kinaṟa kya mchumaa

¹ Malaika ulya alededa na inyi kacha se lya kawi, kanjiamtsa, cha mndu aamtso madonyi.

² Kanjiwesa, “Nkiki uwonyi?” Ngahamba, “Njiwonyi ipapang'ae lya taa lya sahabu lyose, nalyo liwode kitela huyalyo, na taa mfungade na kuwewode maṟi mfungade yeende mafuda kundu taa tso tsiidime iaka tsose;

³ na mashidi ha mafuda hawi, limu ora lo kulyo na limu ora lo kumoso lo kitela kilya.

⁴ Inyi ngahaluo, ngawesa Malaika ulya alededa na inyi, Hoi Mndumii oko, shindo shi nshiki?

⁵ Nalyo malaika ulya kanjiwesa uichi shindo shi nshiki? Ngahamba ote Mndumii oko.”

Kyasa kya Ruwa ko Zerubabeli

⁶ Kanjihaluo kechihamba, Ilyi nlyo idedo lya Mndumii ko Zerubabeli, lyechihamba chi kui wuidimi ma chi kui pfinya pfo, indi nyi kui Mumuyo foko, nyi wudo Mndumii menyi matorito ahamba.

⁷ Iyo nyui fumvu ling'anyi? Oshangunyi lo Zerubabeli nyi ochiwa oruka luramiri, nao nechiende iho lilya lyewika huye handu hamu na ngululu tsa osaṟio, osaṟio loke lukukae.

⁸ Idedo lya Mndumii likanjicheya lyehamba,

⁹ Mawoko ha Zerubabeli halesuma otende lo mba ii, mawoko hake naaho hechiimarisa; na iyo nyi ochimanya ke Mndumii menyi Matorito anjiduma konu.

¹⁰ Nyiu alemina mkonu fo shindo shitutu? Kipfa wechichihiyo, nawo wechiwona orusu lo hesha mba lokehoṟotsa omombo luwodo nyi Zerubabeli, ee da ka mfungade; ho meso ha Mndumii hai ipfo na ipfo wuyanenyi kose.

¹¹ Ngawuya ngawesa se, a mashidi-ha ha mafuda hawi hai ora lo kulyo na ora lo kumoso lo ipapang'ae lya taa kyaho nyi uda?

¹² Ngawuya se ngawesa lya kawi a maṟamba ha hawi ha mashidi ha mafuda hekewuta mafuda hakadao nyi mfongo iya iwi ya sahabu ko?

¹³ Kanjihaluo - iyo uichi nyi kiki? Ngahamba, Ote Mndumii oko

¹⁴ Kahamba iwa wawi nyiwo Mndumii awasambuṟie wamṟundie maheri hose wai kunu orukenyi - nyiwo wawashimbuo na mafuda.