ZEKARIA 3 - Bibilia Kui Mdedie fo Kimochi

Kiwonesio kya kaana: Mkohanyi mnene Yoshua

¹ Nahong'u Mndumii-Ruwa kanjiloṟa Yoshua, Mkohanyi ang'anyi, ahoṟoki oshangunyi lo malaika o Mndumii, na Satana Kahoṟoka kuwoko ko kulyo koke kundu nalimbane nao.

² Mndumii kawia Satana, Mndumii-Ruwa Nakusese, Iyo Satana, Mndumii chu alesambuṟa Yerusalemu nakusese, iki chi kimui kilewuto modonyi?

³ Yoshua naweṟee nguo tsiwekindie oko, nao nawehoṟoki oshangunyi lo malaika.

⁴ Nao kahaluo walya wawehoṟoki oshangunyi loke, mbutenyi nguo tso tsikindie oko. Kiidima kawia Yoshua, Ambuya wunyamaṟi wopfo womewutoho, na inyi njechikuṟika mṟaaye ya wuhuru wung'anyi.

⁵ Ambuya, malaika o Mndumii nawei hafui kawawasa ke Yoshua naṟiko kitambaa kicha mdohu foke, malaika ulya awonyi.

⁶ Kudi malaika ulya kaṟingishia na ideda kya Yoshua ke,

⁷ Mndumii menyi Matorito nahamba adi, Kokoya owada wuwawaso woko, kowechumia njienyi tsako nlyong'u ochianduo kya mba yako, nochiringa njosa tsako, njechikuinenga mwaanya fosembelia afui na walya wehoṟoka hafui.

⁸ Wulalu adanyia iyo Yoshua mkohanyi ang'anyi hamu na wodoyo wekedamya oshangunyi koko, kipfa iwo nyi wai kichano, kipfa ambuya njechidika mṟundi oko, echilaho nyi njana.

⁹ Kipfa ambuya iho lyi njileliwika oshangunyi lo Yoshua, iho limu liwode meso mfungade na inyi njechitisiṟa ofano loke, Mndumii Menyi Matorito ahamba, njechiwutaho njonyamaṟo tsa oruka lulya kui mtiṟi fumu.

¹⁰ Kiidi kya mkonu fulya mochilaha orio mndu na wamṟasa oke wanda ya msabibu na ikidi lya ndunda.