ZEKARIA 2 - Bibilia Kui Mdedie fo Kimochi

Kiwonesio kya kaṟaṟu: Orusu lo heshia

¹ Kyasia ngawona mndu arie orusu lohesha mawokonyi hake.

² Ngawesa nku uhenda? Kanjiwia njihenda ihesha Yerusalemu, njimanye wulandari woke na wuleshe woke chando wui.

³ Kudi malaika ulya alededa na inyi nyi ahoṟoki hafui, kukakure malaika ungi kundu wawonane,

⁴ nao kambia, wikya mteṟa nowie manake ulya ke Yerusalemu kochikao nyi wandu cha shihongo shilawode omombo kipfa kya mfoeṟa fo wandu na shuuma shekaa ipfo kiidi kyake.

⁵ Kipfa inyi Mndumii njechiwa omombo lo modo, njitengete njora tsose, na inyi njechiwa kiṟumi kiidi kyake.

Walesamiṟo walaho wawuye na kanyi

⁶ Na wulalu dichenyi oruka lo mtsudu, Mndumii ahamba kipfa inyi nyi ngawarahanyitsa onyo cha njotanu tsiina tsa ruwehu, Mndumii ahamba.

⁷ Kyasia iyo Sioni, kukiṟe, iyo okekaa hamu na mana o waka o Babeli.

⁸ Kipfa Mndumii menyi matorito nahamba adi, Kundu njishihe kiṟumi, nanjiduma ko wandu wa mkambo walya walemuduo wapfungo, kipfa ulya momupaaya nyo, napaaya njeche ya riso lyake.

⁹ Ambuya njechikutakuta owoko loko huye yake, nawo wadao wapfungo ko iwo walewaṟundia; nanyo mumanye ke Mndumii menyi Matorito nyi anjidumie.

¹⁰ Imba, kesa, iyo mana o Sioni; ambuya njiicha na ikaa kiidi kyapfo Mndumii ahamba.

¹¹ Wandu wa mbaṟi tsose wechiwadana na Mndumii, wechiwang'u wandu wako, na inyi njechikaa kiidi kyawo; na iyo nomanye ke Mndumii Menyi Matorito nanjidumya kopfo

¹² Na Mndumii nechioṟa Yuda, iwe ohawi loke kiidi kya oruka luele, nechisambuṟa se Yerusalemu.

¹³ Tsienyi sau, oshangunyi lo Ruwa nyo moose, kipfa nakure awuka mmbenyi yake njele.