ZEKARIA 14 - Bibilia Kui Mdedie fo Kimochi

Yerusalemu na wandu wa mkambo ingi

¹ Ambuya mkonu fo nyashi ya Mndumii fukeri icha. Mkonu fo nyo wandu wa Yerusalemu, masaa hanu hechihawo oshangunyi lo meso hanu.

² Mndumii-Ruwa nyi echisanyia wandu wa masanga kundu wakape mṟi fu fo Yerusalemu. Mṟi fu fochidao wapfungo, mba tsanu tsiwewado, waka wanu wateṟefutso. Kyeenga kya wandu wa mṟi wasamiṟo, indi kenga kingi kechipayopfo ma idao nja ya mṟi pfo.

³ Numa Mndumii-Ruwa nechicha nakape shida wandu wo chando elewuta mkonu ya shida.

⁴ Mkonufo nechihoṟoka kulya fumvuhu lya mashidi ha msinepfu likeri ora lo ngamenyi lo Yerusalemu. Fumvu lyo lyechiletsano njohawi tsiwi na pichi ling'anyi lyechiwono wokia ora lo ngamenyi itane lo kyukanyi. Ora lumu luambuye mtsudu na lungi luambuye nuka.

⁵ Nyo nyi mochidicha muide pichinyi, kiidi kya mafumvu hawi ha Mndumii-Ruwa. Mochidicha cha waku wanu waledicha kiding'ashi kiheri kilya kya Mangi Usia o Yuda, kyasia Mndumii-Ruwa, Ruwa oko nechicha na waele wake wose piu.

⁶ Mkonufo kochiwada meema na iwushiwushi,

⁷ indi kechiwa mkonu fumu, fumanyike ko Mndumii, chi mfiri ma chi kiopfo, kyaindi kiheri kya kyukanyi kuwade ngeela.

⁸ Na mkonufo, mṟinga fo moo fochiwuka Yerusalemu; kyenga fochihenda ipalyipalyinyi lya ora lo ngamenyi na kyenga kingi ipalyipalyinyi lya ora lo kiukanyi, kiheri kya mbeo na kiheri kya mrike nyi udo kechiwa.

⁹ Mndumii nyio echiwa Mangi huya shose; mkonufo Mndumii nechiwa umu na rina lyake limu.

¹⁰ Oruka loose lochifanana na Araba, wuka Geba mṟasa Rimonyi ora lo nuka lo Yerusalemu; nao nyi, wokia kichumi kya Benyamenyi mṟasa kichumi kya kuwoka, mṟasa kichumi kya mbai; na wuka mnaṟa fo Hananeli itane okoya onanda lo Mangi.

¹¹ Wandu wose wechiidima ikukayapfo, ma kochiwadase osesopfo na Yerusalemu kochikaapfo olele wio.

¹² Kyaindi wandu walya walecha ikapana na Yerusalemu aiha mawicho Mndumii-Ruwa echiwaendie: Mbihu yawo yechipuo wai na moo: meso hawo hawepuo hakeri ipfo matongonyi, njolimi tsawo tsiṟeheṟe makuṟu tsi ipfo madumbunyi hawo.

¹³ Mkonu fo wuowu wung'anyi wochihoya wandu wose na orio umu owo nyi echipfuluko kipfa kya odoye

¹⁴ Wandu wa Yuda wechiamtsia Yerusalemu shida, wusuṟi wo wandu wa masanga wochisanyio, wechisanya sahabu, fesa na maṟao hafoi mnu.

¹⁵ Wukiwa wochihoya frasi, mmbe tsa ngeṟenyi, ngamia, nzoi na shuuma, shose shechikoyo kiidi kya kihongo kya wakituwa.

¹⁶ Walya maata wechikia kiidi kya walya wecha ikapa Yerusalemu, wechiwa mocha na Yerusalemu maka kui maka icha iadapfuma Mndumii-Ruwa Menyi Matorito na iindia mkonu fo mfuho fo matengo.

¹⁷ Na kokoya kuwuka pfo mkambo fose kunu wuyana fulechihenda Yerusalemu iadapfuma Mndumii Menyi Matorito o makecheṟo ai Mangi, nahong'u mvuo yechikapa kowopfo.

¹⁸ Kokooya Wamisri walakunda iwikiya kiṟumi mkonu fo matengo, nahong'u Mndumii-Ruwa nechiwakapa na ndaṟe iya iya echikapa nayo wandu wa mkambo wechileha iwikiya kiṟumi mkonufo mnene.

¹⁹ Ikyo nkyo wandu wa Misri wechihoyo nakyo hamu na walya walechiindiya mkonu fo matengo.

²⁰ Mkonu fo mbahachu tsa frasi tsechiṟehio madedo ha: “Waele wa ko Mndumii-Ruwa,” na shihiya shii ipfo mba ya Mndumii shechifanana na matela hai oshangunyi lo rasiyonyi.

²¹ Ee, orio kihiya kii Yerusalemu, na kiidi kya Yuda, kechiwa kiele ko Mndumii menyi Matorito; na wose wekedasa wechicha wawuteho shihiya shilya na ikoṟiyapfo nyama; manya mkonufo echiwonopfo mndu mokapase mbucha mbenyi ya Mndumii menyi Matoritopfo.