ZEKARIA 12 - Bibilia Kui Mdedie fo Kimochi

Yerusalemu yechikiṟo ilyi numa

¹ Otambahaluo lo idedo lya Mndumii ko Israeli. Ishi nsho Mndumii ahamba, atsanyie Ruwehu na oruka, kaumba mndu kawika mumuyo kiidi kyake.

² Ambuya njechihaluo Yerusalemu iwe kirahu kekupayapaya kiidi kya wandu wa mbaṟi tsose, nakyo kekaa ipfo Yuda mkonu fo kiwi fo Yerusalemu.

³ Mkonu fo njechihaluo Yerusalemu mṟi mnene fuwe iho lilemeri na orio mndu mokudika limtane shifaṟe, wandu wa mbaṟi tsose wechikuumbia handu hamu.

⁴ Mkonu fo Mndumii nahamba nechiwika kiṟihisho ko frasi tsose, na icho ambawe nawodo nyi oṟuṟe, na meso hako hechiambuya mba ya Yuda, njechiwaaha meso ha orio frasi ya wandu wa mbaṟi tsose.

⁵ Wandu wanene wa Yuda wechihamba mrimenyi yawo wandu wa Yerusalemu nyi pfinya tsako, Mndumii menyi Matorito nyi Ruwa owo.

⁶ Mkonu fo njechihaluo wanene wa Yuda cha kyohyo kyauto modoni fo ngu, cha kimunyi kya modo fuakya mkunjenyi; nawo wehirumatsa wandu wa orio mbaṟi wawatengetie njora tsose, numa ya isho Yerusalemu ikae handu hayo - oo Yerusalemu.

⁷ Indi Mndumii nyechikiṟa mahema ha Yuda kuwoka kundu kiṟumi kya mba ya Dawidi na kiṟumi kya wandu wa Yerusalemu kilang'anye Yuda.

⁸ Mandi ho Mndumii nechiringa wandu wa Yerusalemu na icho ai mnyonge kiidi kyawo, nechifanana na Dawidi mkonu fo; mba ya Dawidi yechiwa cha Ruwa cha Malaika o Mndumii oshangunyi lowo.

⁹ Nakyo kechiwa mkonu fo njechishiha irumatsa wandu wa mkambo wose wakunda icha ikapana na Israeli.

¹⁰ Inyi Mndumii, njechipusuya Mumuyo foko wandu wa mba ya Dawidi na wekaa Yerusalemu wose mumuyo fo osaṟio na iterewa; nawo wechiambuya ulya walemtocha, wo wechihoyo nyi wukiwa na ilia cha ilyi mndu aililia mana oke kimumu nawo wechiicho mawawio kipfa kyake cha mawawio ha mana mmbee ilyi ahoyo nyi wukiwa wuliwe.

¹¹ Mkonu fo fochiwa fo kilio king'anyi ipfo Yerusalemu cha kilio kya Hadadrimonyi pichinyi lya Megido.

¹² Oruka lochiwada kilio, orio kishari kikowo; kishari kya mba ya Dawidi kikowo na waka wawo kikowo; kishari kya mba ya Natanyi kikowo, na waka wawo kikowo;

¹³ Kishari kya mba ya Lewi kikowo na waka wawo kikowo, kishari kya mba ya Simei kikowo na waka wawo kikowo.

¹⁴ Shishari shingi shose orio kishari kikowo na waka wawo kikowo.