ZEKARIA 11 - Bibilia Kui Mdedie fo Kimochi

Ioloka lya waapfinya

¹ Pfunguo mongo yapfo iyo Lebanonyi, Kundu modo furumatse mashidi hapfo.

² Kapa kilio iyo ikidi lya opanyi, kipfa mashidi haoloka, mashidi halya mecha hanyamaṟika; Kapenyi kilio nyo mashidi mawanzi ha Bashanyi, Kipfa ngeṟa njiwanzi yamerumara.

³ Walisi waichuo wukiwa na isumukia ling'anyi! Kipfa kiṟumi kyawo kyadeka; Ṟu lya malea ha miiso! Kipfa orikiki lo Yordani lomefurunjika.

Walisi wawi

⁴ Mndumii, Ruwa oko, nalehamba adi, “Lisa poo lya kishinjionyi,

⁵ lilya wenyi lyo wekeshinja, wakakuwona ke wawode mti pfo; na iwo wekumba wakahamba, Mndumii nainengo kiṟumi kipfa inyi njii msuṟi; na walisi wawenyi walawasaṟie.

⁶ Kipfa inyi njechisaṟia-se wenyi oruka lu pfo, Mndumii ahamba, indi njechiwika orio mndu mawokonyi ha manomae na mawokonyi ha mangi, wechikapa oruka lo, manya njechiwawuta mawokonyi hawo pfo.”

⁷ Kyasia ngalisa po lilya na machondi halya hawei mapotse mnu nakamu. Ngakuwonya ndichi tsiwi, iya ya kuwoka ngailaha “Osaṟio” na ya kawi “Shipfungo” ngalisa poo lilya.

⁸ Kyasia ngawaaha walisi waṟaṟu kiidi kya meri fumu, kipfa mrima foko fulelehela kipfa kyawo, nawo wawenjisuo.

⁹ Naalyo ngahamba njechimulisa-pfong'u; mopfa napfe mowoho nawoho; na walya watsihaa orio umu nalye nyama ya odoye.

¹⁰ Ngaira ndichi iya yako yelaho Osaṟio ngaidumbuo kawi, kundu njifunje kyasa kilya njiwewikyanyi na wandu wa mbaṟi tsose.

¹¹ Nayo ikafunjo mkonu fulya; ko ikyo machondi halya hawei mapootse halenjiadanyia hakamanya ke idedo lyi nyi lya Mndumii.

¹² Ngawawia, kikamuchihia, njineengenyi woṟunda woko, ang'u mulanjiinenge. Kyasia wakanjiitalya rupia makumi haṟaṟu nkyo woṟunda woko.

¹³ Kyasia Mndumii kanjiwia, wihitsia ichu mowumba shindo sha teri kiheo kicha, kiheo kyo njilewutio nyi wandu wo. Ngaira rupia tsilya makumi haṟaṟu ngawihitsya ichu mowumba shindo sha teri ipfo mba ya Mndumii.

¹⁴ Naalyo ngadumbuo ndichi iya ya kawi yelaho shipfungo, kundu njiwuteho kilunga kilya kya mndu na odoe, kilunga kya Yuda na Israeli.

¹⁵ Mndumii kanjiwia, duo shihiya sha mlisi ai tondo.

¹⁶ Kipfa ambuya, njechiamtsa mlisi, alechiambuya wadekie, echishiha walya warahanyikyepfo, ma echiambuya walya waluopfo, ma ichu mcha echimlisapfo, kyake nyi ilya iwo wanoru, na ipaṟapaṟa mbahachu tsawo.

¹⁷ Ochia lo mlisi alawaṟi, kada po! Oshu lochikaa huye yake, owoko loke lochikachuka na riso lyake lyechiwa njeche.