ZEKARIA 10 - Bibilia Kui Mdedie fo Kimochi

Ruwa awika kyasa kya okiṟo

¹ Terewenyi Mndumii namwinenge mvuo ya kisie, nyio ekeende mapuchi ha mvuo, nyio ekeende mvuo ya kisilesile kang'anyisha shilimu mdeminyi kipfa kya wose.

² Shitumo shawo shelasha nyi maai, wahanga wawo wahangia wongo, waikimbi wawona wongo wakawikia wandu msiha fo wongo. Nkyo kitewe wandu wa Yuda waṟahaṟaha cha machondi halawode mlisi.

³ Nyashi yako yado na inyi njechihoṟwo wasongoru, na inyi njimonyi njechiambuya poo lyako, oshari lo Yuda. Njiwahaluo wawe frasi tsako tsa shida.

⁴ Koke kuwukeho iho lya ndumba, kuwukeho msumari, kuwukeho wuda wo shida, kuwukeho mchili.

⁵ Wandu wa Yuda wechiwa cha wandu wa mbahanyi, wekechumachuma wakituwa wawo cha odoko lo njia; wo nyi wechikapana shida kipfa Mndumii nai nawo. Iwo wedo frasi wechilehela.

⁶ Inyi njechikarisha mba ya Yuda, njechikiṟa mba ya Yosefu, inyi njechiwawihiṟa kipfa ngawaichio makulili; wechiwa ke njiwakumbie pfo kipfa inyi nyi Mndumii-Ruwa owo njechiwaicho.

⁷ Na wandu wa Efraimu wechiwa wakari, mrima fowo fochichihiyo cha inyo mvinyo; wana wawo wechiwona shindoshi wachihiyo, mrima yawo yechikesa kya Mndumii.

⁸ Njechikapa ngululu na iwasanyia handu hamu; kipfa njilewakiṟa; wechiengeṟeka chando wo waleengeṟeka.

⁹ Njechiwadonga cha mbeu kiidi kya wandu; wechinjikumbuo njorukenyi tsii kuleshi; wawuye se ikaa na wana wawo numa wechiwuya.

¹⁰ Ngoseṟa njechiwawihiṟa wawuke Misiri, njechiwasanyia wawuke Ashuru, njiwaende na orukenyi lo Giliadi na Lebanonyi wechiichuo orio handu.

¹¹ Nechiida kiidi kya ipalyipalyi lya wukiwa, nakape masinamu ha ipalyipalyi, maṟumbuchu ha meda fo Nili heuma; orikiki la Ashuru lochisotso; na ndichi ya wumangi wo Misri yechideka.

¹² Njechiwainenga pfinya kiidi kya Mndumii, wechichumia ipfo na ipfo kiidi kya rina lyake, Mndumii ahamba.