ZEKARIA 1 - Bibilia Kui Mdedie fo Kimochi

Ruwa alaha wandu wake wamwuye

¹ Meeri fo nyanya, maaka fo kawi fo mchili Dario, Idedo lya Mndumii lilechea Sakaria, mana o Berekia, mana o Ido, mwikimbi, kehamba,

² Mndumii nyalesukiyo kipfa kya wandeanu.

³ Walahe uwawie, Mndumii menyi matorito nahamba adi, wuyenyi na koko, na inyi njechiwuya na konu nyi inyi Mndumii menyi matorito ngahamba.

⁴ Mulawe cha Wandeanu, waikimbi wa kacha walewafihiṟia, wehamba, Mndumii menyi matorito nahamba adi, Wuyenyi wulalu, na ida njia tsanu njiwicho, na mawuto hanu mawicho; indi waleichopfo, manya injiadanyiapfo, Mndumii ahamba.

⁵ Ngesa, wandeanu nku wai? A waikimbi wai na moo mlungana?

⁶ Indi madedo hako na mawawaso hako njilewawasia waikimbi, waṟundi wako, ngesa, wandeanu walehawona? Wakawuya ihaluka wehamba, chando Mndumii menyi matorito aweteseheṟie iluwutya, chando kiwewaṟi mawuto hadu, na wudo alewewuta kirianyi na mawuto hadu.

Kiwonesio kya kuwoka: Frasi

⁷ Meeri makumi hawi na kaana meeri fo ikumi na limu, meeri fokelaho Shebati, kiidi kya maaka fo kawi fo mchili Dario, Idedo lya Mndumii likachea Sakaria, mana o Berekia, mana o Ido, mwikimbi, kehamba,

⁸ Njilewona ilyi kio, ambuya, mndu adooye frasi ya kimaande, kahoṟoka kiidi kya mashidi (hepfaama helaho “mhadasi”) handu hawode kiṟiinje; numa yake kuweiho frasi tsingi tsa kimaande, na tsa ifuifu na njiili.

⁹ Nlyo ngahamba, Hoi Mndumii oko nyi waki iwa? Kyasia malaika ulya alededa na inyi kanjiwia, “Njechikuloṟa nyi waki iwa.

¹⁰ Na mndu ulya awehoṟoki kiidi kya mhadasi, kahamba, ‘Iwa nyiwo Mndumii alewaduma, wahende ipfo na ipfo wuyanenyi.

¹¹ Nawo wakahalwo malaika ulya o Mndumii awehoṟoki kiidi kya mhadasi wakahamba, lomeida ipfo na ipfo wuyanenyi, indi wuyana wose wutsie sau na ikesa.’

¹² Nalyong'u malaika ulya o Mndumii kahaluo kahamba, ‘Hoi Mndumii menyi matorito, nki ilyi ulakunda isaṟya Yerusalemu na mṟi yose ya Yuda na isuo kyayo maaka ii yose makumi mfungade?’

¹³ Nalyo Mndumii kahalwo malaika ulya alededa na inyi madedo maoloru mecha ha osaaṟe.

¹⁴ Malaika ulya alededa na inyi kanjiwia, wulalu kapa kitohyo na ihamba, Mndumii menyi matorito nahamba adi, Ngawado nyi wunenyi kipfa kya Yerusalemu na kipfa kya Sioni, wukang'ana mnu.

¹⁵ Ngawesuo kipfa kya wandu wa mkambo wawode sia; kyamba inyi njilesuo kitutu tupu, nawo wakaitika wukiwa.

¹⁶ Kui kipfa ikyo Mndumii nahamba adi, njiwuyase iambuya Yerusalemu kui Osaṟio na mrewa fochiwiko huye ya Yerusalemu, Mndumii menyi matorito ahamba.

¹⁷ Kapa se kitohyo nohambe, Mndumii Menyi Matorito nahamba adi, Mṟi yako ilyi yechionyisho yechimanyika kose kose nao Mndumii nechisaṟia se Sioni nawesambuṟa Yerusalemu lya kawi.”

Kiwonesio kya kawi: Membe

¹⁸ Ngawuya iirya meso hako, ngawona membe tsiina.

¹⁹ Ngawesa Malaika ulya alededa na inyi itsi nyi kiki? Nao kanjihaluo ke itsi nyi membe tsilepaṟatsana wandu wa Yuda, na Israeli, na Yerusalemu.

²⁰ Nduma Mndumii kanjiloṟa wanganya waana.

²¹ Ngawesa iwa wacha iwuta ki? Kahamba, itsi nyitso membe tsilerahanyitsa wandu wa Yuda, manya kulawono mndu aleira mdo foke indi iwa nyi walecha iwingia, na iolotsa membe tsa mkambo fo wandu waleiria ombe lowo huye ya oruka lo Yuda, kundu wandu wake warahanyike.