YUDA 1 - Bibilia Kui Mdedie fo Kimochi

¹ Inyi Yuda njii isinga lya Yesu Kristo na manomae o Yakobo ngaiṟikiṟa walahe walya wa Ruwa waiwakunde nyi Ruwa Wande wakaa wai-waringye Yesu Kristo.

² Wutonga na ofoṟo na ikunda sho shimbelukie welu.

Walosha wa wongo

³ Wanawawama ilindi njiwewode m macha hemṟehya kya okiio-lu luwode kimu, nanyo, wuitiki wukanhoya njimṟehye njiechimwikimba ke muwe mochikapanya wuidiki-wu Ruwa alewudambikia wake wose ili lyimu.

⁴ Kyamba kuipfo wandu walaichi Ruwa walekuṟoṟokuya kunu siṟinyi, nawo nyiwo ko kiira kya mkao yawo njiwicho walemsonguo iṟehyo mdumbuye yawo kacha nyiyo iile, ke nyi walemeshi wekepfuluo-pfuluo wutonga-wu wo Ruwa odu kui wulala wowo, wakeri ileha ichu ai mnene odu amonyi nyio Mndumii odu Yesu Kristo.

⁵ Indi ngakunda imtamuṟya ma shilya mlemeshimanya shose kacha, ke Mndumii ili alemaa ikiṟa mkambo foke ipfo orukenyi lo Misiri ili lingi nyi alewakombetsa kombi walya walawemwidikye.

⁶ Na wasu walya walawekaa wechiwada necha wuitoṟi wowo indi wamewuka kihambenyi kyawo kya kuwoka wakada kidembo kyawo kii kyenyi Ruwa kawapfunga na mshe ilechidumbuka kewatirimiishya mwanduye fo. Mfiri fulya Menene wai-waṟingichye meema puti.

⁷ Kumbuonyi chando Sodoma na Gomora, na mṟi iweṟasanyi nayo; iwefananyi na wasu walya kui uṟuhui na wulala na mbonyi tsilawaṟi mbihunyi na yala mbihu ya wahenu yo ii-mbike-ho kitaanyo kya wudeheli wuende modo fulechirumika, wuwe wuikimbi ko wandu wose.

⁸ Wudi tichi wai. Ndodo tsawo tseketerefutsa mbihu yawo na imina wunene wulya na iruma wenyi wuitoṟi.

⁹ Indi o Mikaeli msu chu ang'anyi ilindi aleloyana na Satana wechikapanya-ho mnying'a fo Mose ma alekarya imkumbya satana mdumbuye echimrumapfo kya indi alehamba. Mndumii nakudedye.

¹⁰ Indi iwa wai wado wo wekeruwa shilya walashiichi; na shilya washimanya shiiwaamkya shii shimu na sha mando halai, na mbia kosho wakuwutya-ho ihenda inyamaṟika.

¹¹ Ochia lowo! Wandu wamhenda njia ya Kain wakaeko nyi wulembi wo weri wo Bileamu wakawerumara wai walemi cha Kora.

¹² Iwo wai wado nyiwo wekelya kimu nanyo ipfo mlienyi yanu ya Makundano wai-ho mfano ya ngafu wekekulisiṟia-ho wawenyi walaowuo mndu. Wo nyi wai cha mapuchi halarie mvuo hekyewiwito ipfo na ipfo nyi otanu. Wakeri cha mdi ilai na mambale ilakumbe ndunda; cha mashidi hamakuṟuo hamatsuwo.

¹³ Wakeri cha masinanu ha ipalyipalyi hechipongika-pongika na idaitsaho shindo shiendie iṟenze. Wai cha nyenyeri tseṟaha-ṟaha, iwo Ruwa alemewateseheṟia ruwe ya meema fulechisia.

¹⁴ Indi kyawo na Enoki mku chu o mfungade wokia Adamu alemaa ideda kui Mumuyo kehamba. “Ambuya Mndumii nechicha arianyi na malaika wake wai matorito ha shiku ikumi ikumi.

¹⁵ Nahende yanduya wandu wose, mwanduye fulya na ihoṟuo walemeshi wose kya mawuto hawo mawicho hose walemlemya naho na kya mawicho halya hose walemdeda naho wai wanyamaṟi walemeshi wado.”

¹⁶ Wandu wa wekyenunuwa kiheri kyose, na ipiṟa wandu wengi. Wechichumia waidikyanyi na lango tsawo njiwicho. Na dumbu lyawo lyekededa sha mtengelele wechikulopa mnu na wandu wengi kui oshangu kipfa kya mbucha, tsawo.

Wuikimbi na Mawawaso

¹⁷ Indi nyo mui-wakunde kumbwonyi madedo halya mulewio nyi halesonguo wasu walya wa Mndumii odu Yesu Kristo.

¹⁸ Ili walembia. “Maheri hefuṟumya kochiwoneka wandu wechimupiṟa nyo; wechikuhendya wai-waitike nyi lango tsawo njiwicho tupu.”

¹⁹ Iwo wai wado nyi-wo wapaṟatsanyi. Wandu washilie nyi lango tsa wuyana wai wa-makilango wawuṟye Mumuyo fo Ruwa.

²⁰ Indi nyo mui-wakunde mukuilikishe necha muwenyi ipfo wuidiki-hu wonyu wuele. Terewenyi muwodo nyi pfinya ya Mumuyo Mwele.

²¹ Ke-kuringenyi muwenyi mukae mochikunda Ruwa muwe mochiwedya osaṟio lo Mndumii odu Yesu Kristo loshitsya hando hawode moo fulechisia.

²² Na iwa wapfiopfio nyi mdo muhende iwasunjukuo.

²³ Walya wengi muwakiṟe mochiwatakuo modonyi na wengi muwaleshye mawoko mui na wuowu mochisuo na kanzu iya ii-njiterefutse nyi lango tsa nyama tsawo njiwicho.

Kiterewo na Kiṟumi

²⁴ Indi ichu aidima mringa mulakape mtulia, mulaoloke kaweidima imohoṟotsa ipfo kundo kuwode wuitoṟi woke mukae-pfo mulai na paṟi kochikapyo-ho ngululu.

²⁵ Nyio Ruwa amonyi molukiṟa so kui Yesu Kristo. Mndumii odu. Wuitoṟi nyi woke na wunene na pfinya na wukolonyi na wudedi wuweipfo maheri halawendewiko wuipfo, na ha wulalu wochikaa wudo maheri hose halunganyi. Amenyi.