YOSHUA 8 - Bibilia Kui Mdedie fo Kimochi

Mṟi fo Ai fowado

¹ Kyasia Mndumi Ruwa kawia Yoshua, “Manya ulaowuo na iwuko nyi madima, henda duo mbahanyi tsapfo tsose utsiduo mṟi fo Ai, kyamba mangi o mṟi fo ngammaa imdambikia mawokonyi hapfo handu hamu na wandu wake, mṟi na oruka loke.

² Kyamba nyi mochiwutia mṟi fo Ai hamu na mangi ofo chandu mulewutia mṟi fulya fo Yeriko handu hamu na mangi ofo. Kyaindi masaa na shiuma shake mochishiwada nyi shechiwa shanu. Henda sokienyi mṟinyi fo mochiidia ora lo nduma.”

³ Kyasia Yoshua handu hamu na mbahanyi tsake wakakure kundu wahendie mṟi fo Ai nalyo kasambuṟa wandu warahari shiku makumi haṟaṟu (30,000) kawaduma wasonguo kiheri kya kio.

⁴ Nao kawawia, “Nyo nyi mochilaya mṟi ora lo nduma. Manya mulakae haleshe na mṟi, kyaindi mukuteseheṟe kiheri kyose.

⁵ Inyi na wandu wa njirianyi nawo nyi lochisembelia mṟi, ili mandi wechicha kundu walimbane naso so lochiwadicha.

⁶ Nyi wudo wechilulatia itane washika kuleshe na mṟi fo fowo, wechikusaṟa ke nyi waluwingia cha lilya mbooko so nyi lochiwaleka waluwingie.

⁷ Nalyong'u mukure ipfo kiowionyi muhende iwada mṟi fo, kyamba Mndumii-Ruwa, Ruwa onu nyi echifuwika mawokonyi hanu.

⁸ Kyasia mukamemarisa iwada mṟi fo nyi mochifukoṟa ko modo chandu Mndumii-Ruwa alemuwawasa. Iho nyiho mawawaso mochihaosha.”

⁹ Kyasia Yoshua kawaduma wahende handu halya hekapanyia, nawo wakahenda ora lo kyukanyi lo mṟi fo Ai kiidi kya Ai na Betheli. Nao Yoshua kakaa kio kilya kiṟaṟonyi kya wana wa Israeli.

¹⁰ Yoshua kakure ngamenyi kilawo kasanyia Waisraeli handu hamu na wameku wakahendia mṟi fulya fo Ai.

¹¹ Mbahanyi tsilya tsiwerianyi nao, wakashika kufui na mṟi fulya fo Ai nalyo wakawika kiṟaṟo ora lo huye lo mṟi fo, wakaletsano na pichi liwei kiidi kyawo na mṟi fukakaa molyolya.

¹² Kawewutase wandu shiku shitanu (5,000) kawawika kiidi kya mṟi fo Behteli na Ai ora lo kyukanyi lo mṟi fo Ai.

¹³ Mbahanyi iya inene ilewiko ora lo huye lo mṟi na walya waletsuhaa wakakaa ora lo kyukanyi lo mṟi. Kio kilya Yoshua kalaa kulya pichinyi.

¹⁴ Kyasia mangi o mṟi fulya fo Ai kekiwona adi, kakure faṟa na wandu wake wakasoka kulya mpiṟimkonyi fo Araba kundu nahende ikoyana na Waisraeli shidenyi. Kyaindi alamanye ke mṟi foke nyi fuweimṟingichie ko ora lo nduma.

¹⁵ Kyasia Yoshua na wandu wake walelembetseṟa ke nyi wawingo wakadichia kulya ora lo nuka.

¹⁶ Kyasia wandu walya wose wawei kulya mṟinyi wakalaho kundu walatie Waisraeli walya, mandiho wawelatia Yoshua wakakure wose wahende haleshe na mṟi fulya fowo.

¹⁷ Kyasia kuladeo manya mndu umu kulya kiidi kya mṟi fo Ai na Bethel, wakada mṟi fo pang'a wakahenda ilatia Waisraeli.

¹⁸ Kyasia Mndumii-Ruwa kawia Yoshua, “Hoṟuya pfumu lyapfo mṟi fo Ai, kyamba nyi njihenda idambikia mṟi fu mawokonyi hapfo.” Nalyo Yoshua kahoṟoya pfumu lyake mṟi fo Ai.

¹⁹ Kiheri Yoshua alehoṟoya pfumu lyake mṟi fulya fo Ai, mbahanyi iya iwekeri maowionyi ikapufukia mṟi fulya ikaida na kulya mṟinyi ikafuwada na ifurumatsa ko modo.

²⁰ Kyasia wandu wa mṟi fo Ai wakainduka numa wakawona mtsu fudoye huye mṟasa ruwehu. Kii kidi walawone handu hedichia cha kipfa Waisraeli walya wawewalatia nyi walewahalukia.

²¹ Kyasia Yoshua handu hamu na Waisraeli wose wekiwona mbahanyi iya iwei maowionyi yammaa iwada mṟi fulya wakawewona mtsu fulya fuwedo huye, wakawahalukia wakawoka iwawaha.

²² Wandu walya wawetsuhee kulya mṟinyi wakawuka kulya mṟinyi, nalyo Waisraeli wakawatengetia wakawawaha wose alatsuhaeho manya mndu umu.

²³ Kyaindi Mangi ulya o mṟi fulya wakambada ai na moo, wakamduo ko Yoshua.

²⁴ Kyasia Waisraeli wekimarisa iwaha wandu wose wa mṟi fulya fo Ai kulya nuka, wakawuya na kulya mṟinyi wakawaha wose wawetsuhee pfo.

²⁵ Wandu wose walewoho mkonu fo womi na waka wa mṟi fulya fo Ai ni shiku ikumi na shiwi (12,000).

²⁶ Yoshua alesotsia wanda owoko loke lulya luwewode pfumu lilya awehoṟoye mṟi fo Ai 'pfo mṟasa alemarisa iwaha wandu wose wa mṟi fo.

²⁷ Kii kidi Waisraeli nyi walewada shuma na masaa hengi chandu Mndumii-Ruwa alewawasia Yoshua.

²⁸ Nalyo Yoshua karumatsa mṟi fulya fo Ai ko modo kafuhaluo ngafu mṟasa inu.

²⁹ Kyasia kamasa mangi ulya o mṟi fulya fo Ai, mdihu mṟasa kyukanyi. Kyasia kiheri mnengeṟi fuweolokia Yoshua kawawasa ke mnying'a fulya fo mangi fusotso kulya mdihu fuhende ikumbo alya mongonyi fung'anyi foida na kulya mṟinyi na huya ya mnying'a fo wasanyie ho maho sa hafoi, na sohuyo ya maho ikeriho mṟasa inu.

Mawawaso hasomio fumvuhu lya Ebali

³⁰ Yoshua kawikia Mndumii-Ruwa, Ruwa o Israeli handu hedasia alya fumvunyi lya Ebali,

³¹ kikawekuwia kido chandu Mose mṟundi o Mndumii-Ruwa awewawasie Waisraeli, chando kiwei kiṟehie ipfo kitapunyi kya mawawaso ha Mose ke handuho hedasia nyi hechiwiko ko maho halamapaṟepaṟe manya kulakae pfo menya yose. Huye ya rasio lyo nyi hondo walewuta shidaso shemaya modonyi na shidaso sha ofoṟo.

³² Kyasia Yoshua kaṟehiya huye ya maho ofano lo uwawaso wo Mose oshangunyi lo mamingi fo Waisraeli.

³³ Kyasia Waisraeli wose handu hamu na wanene wawo, wameku, wa wachili, na wahenu wose wawei kiidi kyawo, wakahoṟoka njora tsose oshangunyi lo isanduku lilya lya mkundana lya Mndumii-Ruwa, oshangunyi lo wakohanyi wa Kilewi wawekudikie isanduku lya mkundano lya Mndumii-Ruwa. Kyenga kya wandu wo wakahoṟoka oshangunyi lo fumvu lya Gerizimu na kyenga kingi oshangunyi lo fumvu lya Ebali, kiwekuwia chandu Mose mṟundi o Mndumii-Ruwa awewawasie ili lya mboko lya iwikia Waisraeli mboṟa.

³⁴ Kyasia Yoshua kasomia Waisraeli mawawaso hose, handu hamu na mboṟa tsose na njoseso chandu tsiwetsiṟehie kitapunyi kya mawawaso.

³⁵ Kyasia kulakaeho manya idedo awewawasie Mose lilalesomo oshangunyi lo mamingi fo Waisraeli na waka, wana watutu na wahenu wawei kiidi kyawo.