YOSHUA 7 - Bibilia Kui Mdedie fo Kimochi

Ideko na ngapo ya Akani

¹ Kyaindi Waisraeli walewa wahendeli ko shindo shilya walewio washirumatse pfo, kyamba Akani mana o Karmi, mana o Zabdi, mana o Zera, o kishari kya Yuda, nyi aleduo shindo maata kiidi kya shilya walewio washirumatse. Kipfa kya ikyo nyashi ya Mndumii-Ruwa ikahoya Waisraeli.

² Nalyo Yona kaduma wandu wawuka Yeriko wahende mṟi fo Ai, mṟi fuwekeri kufui na Beth-aweni ora lo ngamenyi lo Betheli. Nao kawawia, “Kehendenyi mukesoṟa mbonyi tsa oruka lu.” Nahong'u wakahenda wakasoṟa mbonyi tsa mṟi fo Ai.

³ Wekiwuya wakawia Yoshua, “Manya luladike wandu wose wahende ikapa mṟi fu fo Ai pfo, kyamba wandu waipfo nyi sa waangu. Lukaaduma wandu shiku shiwi ang'u shiṟaṟu nyi washikie.”

⁴ Nalyo wakaduma wandu shiku shiṟaṟu kundu wahende ikapana na wandu wa mṟi fo Ai, kyaindi wandu wa mṟi fulya wakawawingia.

⁵ Wandu wa mṟi fo Ai wakawaha Waisraeli makumi haṟaṟu na waṟandaṟu (36), wakawawingia wawuka ipfo mongonyi fo mṟi, itane wawashitsa Shebarimu, wakawaha wengi kulya mamsaṟinyi. Kyasia Waisraeli wakapfa mrima wakalehela cha mṟinga.

⁶ Kyasia Yoshua handu hamu na wanene wa Israeli wakaranduo maṟao hawo. Kiidima wakakuhutsa wanda ya isanduku lilya lya mkundana lya Mndumii-Ruwa, wakawekushia kiluli mdonyi yawo.

⁷ Yoshua kahamba, “Ochia nyi lodu hoi Mndumii-Ruwa. Nyi ki ili uleluambatsa meda fu fo Yordani kundu uludambikie mawokonyi ha Waamori walumarise? A ngesa chi nanga kokoya lulekukaya kulya molyolya fo meda fo Yordani.”

⁸ Ambuya Mndumii njihambeki wulalu kya Waisraeli, nyi waledicha oshangunyi lo wakituwa wawo?

⁹ Kyasia ili mandi Wakaanani hamu na wandu wose wa oruka lu ili wechiicho mbonyi tsi nyi wechilutengetia na iluarisa piu iya wuyanenyi. Ngesa nyi ochiwika kuda wulalu kundu uloṟe wunene wo rina lyapfo?

¹⁰ Mndumii-Ruwa kawia Yoshua, “Hoṟoka, nki lyi okukumba wanda kudo?

¹¹ Ambuya Waisraeli nyi walewuta wunyamaṟi, kyamba nyi walefunja mkundana foko njilewawia wafuwade; kyamba nyi waleduo shindo maata shiweshishimbuo ke washirumatse, ambuya nyi waleshiiwa wechilemba, wakashisanza hamu na shindo shawo.

¹² Kipfa kya ikyo Waisraeli wechiidima ilimbana na wakituwa wawopfo, nyi wakeri idicha wakituwa wawo kyamba wo nyi wawa wandu weariso. Koikyo njechikaase nawopfo, na itane monyamaṟa shindosho shikeri kiidi kyanu shiweshiwute ke shihende inyamaṟo.

¹³ “Kyasia kure nohende iheṟemtsa Waisraeli; ochiwawia wakuheṟemtse kipfa kya mkonu fongama, kyamba inyi Mndumii-Ruwa, Ruwa o Israeli nyi ngahamba njidi, ‘Kiidi kyanu nyi kuwode shindo shilewuto ke shinyamaṟo, koikyo mochiidima ilimbana na wakituwa wanu pfo na itane shindo sho shahenda iwuto ipfo kiidi kyanu, shihende irumatso.

¹⁴ Koikyo ngama nyi nochicha oshangunyi loko mose, mochioshana kishari kui kishari. Kishari kyo njechikisambuṟa wechiida oshangunyi loko kishari kui kishari. Kishari kyo njechikisambuṟa nyi kechiida oshangunyi loko mba kui mba na mba yo njechiisambuṟa nyi wechiida oshangunyi loko mndu umu umu.

¹⁵ Kyasia mndu cho echikoyo awode shindo shilya shilewuto kundu shinyamaṟo, nyi nechikoṟo modo o hamu na shindo shake, kyamba alekunda iosha mkundana fulya foko inyi Mndumii-Ruwapfo, kawuta kindo kileendiye Waisraeli wusutsu.’”

¹⁶ Kyasia, ili ngamenyi Yoshua kakure kaende Waisraeli wose hafui, kishari kya Yuda kikasambuṟo.

¹⁷ Kaweendese kishari kya Yuda kishari kui kishari, nalyo kishari kya Zerahi kikasambuṟo. Kaweendese mba tsa kishari kya Zerahi, mba kui mba, na mba na Zabdi ikasambuṟo.

¹⁸ Yoshua kaendese mba ya Zabdi kufui mba kui mba. Mba ya Akani mana o Karmi, mana o Zabdi, mana o Zera, o kishari kya Yuda, kasambuṟo.

¹⁹ Nalyo Yoshua kawia Akani, “Mana oko ṟumisha Mndumii-Ruwa, Ruwa o Israeli, mṟumishe, numa unjiwie shilya uwutie manya kulanjiṟike.”

²⁰ Nalyo Akani kamhaluo, “Nyi kyalohi nyi njilenyamaṟa oshangunyi lo Mndumii-Ruwa, Ruwa o Israeli. Nyi wudi njilewuta.

²¹ Kiheri njilewona nguo njicha iwukie Shinani kiidi kya shindo shilya shilewado shidenyi na shekeli mahana (200) hawi ha fesa na mnaṟa fo sahabu fulemeri cha shekeli makumi hatanu (50), nalyo ngashilanga ngashiduo, ambuya nyi njishiṟikie, ngashisumia terinyi ipfo ihemenyi lyako, na fesa yo ngaiṟika wanda ya shindo sho.”

²² Kyasia Yoshua kaduma wandu nawo wakadichia hemenyi lya Akani. Nyi lohi shindo shi nyi shiweshiṟike kulya hemenyi lyake na fesa iya iwekeri wanda ya shindo sho.

²³ Nalyo wakaduo shindo sho ko Yoshua na Waisraeli wose nalyo wakashileṟia wanda oshangunyi lo Mndumii-Ruwa.

²⁴ Kyasia Yoshua handu hamu na Waisraeli wose wakaduo Akani, mana o Zera, handu hamu na fesa iya, nguo iya, sahabu, wana wake wa kika na wa kisoṟo, mbe tsake, nzoi na machondi hake, hema lyake na orio kindo awewode numa wakawaduo pichinyi lya Akori.

²⁵ Yoshua kawesa Akani, “Nkilyi mandi oluendie mawukiwa? Mndumii-Ruwa nyi echikuendie mawukiwa iyo kumonyi mfiri fu fo inu.” Waisraeli wose wakakapa Akani ko maho mṟasa kafa. Wakawekapase walya wa mba yake mṟasa wakapfa. Nalyo wakawakoṟa wose ko modo.

²⁶ Kyasia wakawumbia maho sa hafoi huye yake, na maho ho nyi hakeri ho mṟasa inu. Nalyo nyashi ya Mndumii-Ruwa ikahuo, na handu halya hakalaho, rina nyi Ipichi lya Akori mṟasa inu.