YOSHUA 6 - Bibilia Kui Mdedie fo Kimochi

Waisraeli wawada mṟi fo Yeriko

¹ Kyasia mongo iya ya Yeriko nyi iwenjishingie kyamba kundu iime Waisraeli walaidime iida napfo. Kuwode mndu aleidima iwuka kulya mṟinyi manya iida napfo pfo.

² Nalyo Mndumii-Ruwa kawia Yoshua, “Ambuya inyi njikeri ihenda iolotsa mṟi fu fo Yeriko njifuwike mawokonyi hapfo handu hamu na mangi yafo na mbahanyi tsake wai warahari.

³ Ambuya iyo na mbahanyi tsapfo warie shisha nyi mochitengetia mṟi limu orio mkonu ko mfiri iṟandaṟu.

⁴ Na wudo wakohanyi mfungade warie maranda hawo ha membe tsa masuwa nyi wechisongoya isanduku lilya lya mkundana. Ili mkonu fo mfungade nyi mochitengetia mṟi fo ka mfungade, kunu wakohanyiwo wechikapa membe tsawo.

⁵ Kyasia kiherikyo wechikapa marandaho ko ṟu ling'anyi, mukomeicho ṟu lyo wandu wose wafahiye ko ṟu ling'anyi, nalyo njomombo tsose tsa mṟi fo nyi tsechioloka wanda. Koikyo orio mndu nyi echiolokia mṟi fo iwuka njora tsose handu muwehoṟoki.”

⁶ Kyasia Yoshua mana o Nuni kalaha wakohanyi kawawia, “Kudikenyi isanduku lya mkundana na wakohanyi mfungade waire maranda mfungade ha masuwa waide kusonguo ko isanduku lilya lya mkundana lya Mndumii-Ruwa.”

⁷ Nalyo Yoshua kawawia, “Hendenyi kusonguo tengetienyi mṟi fo, na walya warie shisha wasongoye isanduku lya mkundana lya Mndumii-Ruwa.”

⁸ Kii kidi kui wuwawaso wo Yoshua wakohanyi walya mfungade wawerie maranda mfungade ha membe tsa masuwa wakaida oshangunyi lo Mndumii-Ruwa wechikapa maranda ho na isanduku lilya lya Mndumii-Ruwa likawaosha.

⁹ Kyasia wandu walya wawerie shisha wakaida kusonguo ko wakohanyi walya wawekapa maranda, na waringi wengi wakaosha numa ya isandukulyo, na maranda hekapo kitsitsi.

¹⁰ Yoshua kawawasa wandu wo, “Mlafahie ma itoṟotsana, manya iwuta idedo lyose dumbunyi lyanu, itane mkonu fo njechimmbia fahienyi nyi lyo mandi mochifahiya.”

¹¹ Nalyo Yoshua katana wandu walya watengetie mṟi fulya limu ko orio mfiri wakudikie isanduku lilya lya mkundana lya Mndumii-Ruwa na iwuya kiṟaṟonyi ikulaya.

¹² Kyasia ili lya ngama Yoshua kakure kilawo, nalyo wakohanyi wakakudika isanduku lilya lya mkundana lya Mndumii-Ruwa.

¹³ Nalyo wakohanyi walya mfungade wawerie maranda halya mfungade ha membe tsa machondi wakasongoya isanduku lilya lya mkundana lya Mndumii-Ruwa wekapa maranda halya kitsitsi. Wandu walya wawerie shisha wakasongoya isanduku lilya lya Mndumii-Ruwa na waringi wengi nduma yalyo. Maranda halya hakaengeṟa ikapo.

¹⁴ Mkonu fo kawi nyi waletengetia se mṟi fo limu, wakawekuwuya se na kiṟaṟonyi kyawo. Wakaengeṟa iwuta kudi ko mfiri iṟandaṟu.

¹⁵ Mfiri fo mfungade wakure kilawo wakatengetia mṟi fo ka mfungade chando wawekewuta. Nyi mkonu fo tupu waletengetia mṟi fo ka mfungade.

¹⁶ Kiheri waletengetia ka mfungade na wakohanyi wamemaa ikapa maranda halya, nalyo Yoshua kawia Waisraeli, “Fahiyenyi kyamba Mndumii-Ruwa amemudambikia mṟi fu.

¹⁷ Kyasia mṟi fulya fukarumatso na orio kindo kyose kiwekeripfo, kyamba nyi fulewa mshimbuo ko Mndumii-Ruwa. Rahabu mka ulya mmeluki nyio alekia pfo handu hamu na walya wawei kulya mba koke, kyamba nyi aleṟika wandu walya wesoṟa mbonyi.

¹⁸ Kyaindi mukuṟise mladuo kindo kyose kikishimbuo kyamba mukaduo kindo kyose kikishimbuo mochiendie kiṟaṟo ki kya Waisraeli irumatso, nakyo kimwendie tewe.

¹⁹ Kyaindi fesa yose, na sahabu na shilya shishisungusie ko aṟeṟa na menya isho nyi shii shiele ko Mndumii-Ruwa, koikyo nyi shechisanyio shiwiko kisenyi kya Mndumii-Ruwa.”

²⁰ Kyasia wandu wakafahia na kunu maranda haweikapo. Kiheri wandu waleicho maṟu ha maṟanda wakakapa kitohio king'anyi, nalyo njomombo tsilya tsa mṟi tsikaoloka wanda piu, nalyo wandu wakapufukia mṟi fulya, orio umu awuka handu awei wakafuwada.

²¹ Kyasia wakarumatsa orio kindo kiwei kulya mṟinyi wakawaha ko oshu wasoṟo na waka, rika na wameku, mbe, machondi na nzoi.

²² Kyasia Yoshua kaduma wasoṟo walya wawi wesoṟa mbonyi kawawia, “Hendenyi kanyi ko mka ulya mmeluki mumwende o na wa mba yake chandu mlemlia nyamu.”

²³ Kyasia wanake walya wesoṟa mbonyi wakahenda wakaende Rahabu, ndee oke na mae oke, wana wa mae na wandu wose wa kishari kyake, wakawahoṟotsa oshangunyi lo kiṟaṟo kya Waisraeli.

²⁴ Kii kidi wakakoṟa mṟi fulya fo Yeriko na modo na orio kindo kiweipfo. Kyaindi fesa, sahabu, shindo shi shisungusie ko aṟeṟa na menya isho nyi shilesanyio shikawiko kisenyi kya mba ya Mndumii-Ruwa.

²⁵ Kyaindi Yoshua kakiṟa mka ulya mmeluki Rahabu handu hamu na wandu wa mba yake wose. Nalyo Rahabu kakaa kiidi kya wa Israeli mṟasa inu, kyamba nyi aleṟika wadume walya Yoshua alewaduma isoṟa mbonyi tsa mṟi fulya fo Yeriko.

²⁶ Kyasia Yoshua kada oseso oshangunyi lo Waisraeli kechihamba, “Mndu cho echikaa nawike mṟi fu fo Yeriko, Nyi echikaa ai msese nyi Mndumii-Ruwa, Mndu cho echikaa nawike se njomombo tsa mṟi fu, Mana oke mbee napfe. Na ichu ose echiwika mongo fo mṟi fu, Ambuya mana oke mtutu nechipfa.”

²⁷ Kyasia Mndumii-Ruwa nawei hamu na Yoshua na kiṟumi kya Yoshua kikadungana kulya orukenyi kose.