YOSHUA 5 - Bibilia Kui Mdedie fo Kimochi

¹ Kyasia wamangi wose wa Waamori wawei molyolya ora lo kyukanyi lo meda fo Yordani, na wamangi wose wa Wakaanani wawekeri mbai ya ipalyipalyi lya Mediterania, wekiicho ke Mndumii-Ruwa nyi alehadutsa mṟinga fo meda fo Yordani kipfa kya Waisraeli mṟasa wakaambada, nyi walepfio nyi mdo, pfinya tsikawasia piu, kipfa kya iowuo wana walya wa Israeli.

Waisraeli wahenda idino ipfo mṟinyi fo Gilgali

² Nalyo Mndumii-Ruwa kawia Yoshua, “Henda sungusia shoshu sha maho maumu kundu uhende idina nasho Waisraeli.”

³ Kyasia Yoshua kasungusia shoshu sho sha iho liumu kadina Waisraeli ipfo Gibea - haaralothi.

⁴ Kitewe Yoshua nadine Waisraeli nyi kipfa Waisraeli wose wasoṟo washitsie walewuka kulya Misri weidima ihenda shidenyi nyi walepfia kulya nuka.

⁵ Kyamba iwo wose wawewukie kulya Misri nyi wawewadine, kyaindi walya wose walefeyo kyaṟonyi kulya nuka wawewadinepfo.

⁶ Waisraeli nyi walechumia kyaṟonyi kulya nuka handu ha maka makumi hana (40), koikyo wasoṟo wose waweshitsie maka yehenda shidenyi nyi walearisikia kulya nuka kipfa walalekunda iicho kilya Mndumii-Ruwa alewawia. Kyamba Mndumii-Ruwa nyi naweliye wandu wo nyamu ke nyi echiwainenga oruka luichuo maruwa na wuki, nyi wudo aweteṟie wandu wo.

⁷ Koikyo ilyo nyilyo luwa lya wandu wo, sa Mndumii-Ruwa alelidosa handu ha wandu wo; iwo nyiwo Yoshua alewadina cha kipfa wawemedino kiherikyo wawei kyaṟonyi kulya nukapfo.

⁸ Kyasia wasoṟo wose wekimarisa idino nyi walekaa ipfo shiṟaṟonyi shawo mṟasa wakachia.

⁹ Nao Mndumii-Ruwa kawia Yoshua, “Ambuya inu kudi nyi ngambuta sonu iya ya Misri.” Koikyo handu halya hakalaho nyi Gilgali mṟasa inu.

¹⁰ Kiheri Waisraeli wawei kiṟaṟonyi ipfo Gilgali wakaṟumisha Pasaka kyukanyi kya mfiri fo ikumi na kana fo meri alya pichinyi lya mṟi fo Yeriko.

¹¹ Ili lya ngama Pasaka yameida wakalya mkate ilanjitarang'ashe na maimba makaange shindo sha mdeminyi sha oruka lulya.

¹² Kyasia kuwokia mandi ho walelya shelya shiwukie mdemenyi ya oruka lulya, Waisraeli walelyase mana iya pfo. Wokialyo Waisraeli walewooka ilya shiwukie mademenyi ha oruka lulya lo Kaanani.

Yoshua hamu na mnene o mbahanyi ya Mndumii-Ruwa

¹³ Kyasia mkonu fumu Yoshua ahoṟoki hafui na mṟi fulya fo Yeriko, kudi peṟeseng'u kawona aichu mndu oshangunyi loke arie oshu mawokonyi hake. Nalyo Yoshua kamhendia kambesa, “Ngesa iyo nyi ukeri umu odu ang'u nyi umu o wakituwa wadu?”

¹⁴ Nao kamhaluo kambia, “Njikeri onu manya o wakituwa wanupfo. Kyaindi inyi njikeri mnene o mbahanyi ya Mndumii-Ruwa na wulalu nyi ngacha.” Nalyo Yoshua kaarama wanda kamwindia, kambesa, “Hoi Mndumii oko inyi mṟundi opfo nyi ukunndi njiwuteki?”

¹⁵ Nalyo mnene ulya o mbahanyi ya Mndumii-Ruwa kawia Yoshua, “Wuta shadu shapfo kyamba handu ha uhoṟoki nyi hai haele.” Nalyo Yoshua kawuta kudo.