YOSHUA 4 - Bibilia Kui Mdedie fo Kimochi

Maho ha ngumbuo ikumi na hawi

¹ Kyasia mkambo fulya fose fo Waisraeli wamemarisa iambada Mndumii-Ruwa kawia Yoshua,

² “Sambuṟa wandu ikumi na wawi kiidi kya Waisraeli, nosambuṟe umu umu ko orio kishari,

³ nowawase kudi, irenyi maho ikumi na hawi iya kiidi kya meda fo Yordani, oo handu wakohanyi wahoṟoki, muhaduo mṟasa handu halya mukeri ihenda ilaa inu.”

⁴ Yoshua kalaha wandu wo ikumi na wawi alewasambuṟa kiidi kya Waisraeli, orio kishari mndu umu umu,

⁵ kawawia, “Songoyenyi isanduku lyo lya mkundana lya Mndumii-Ruwa, Ruwa onu itane makidi hawi ha meda fo Yordani. Orio umu onu nakudike kosohu lyake iho limu liwe nyi handu ha kishari kimu kya Waisraeli.

⁶ Kindoki nyi kechiwa kichano kyanu ili nduma, ili wana wanu wechimmbesa, mafiri ho hechicha ngesa maho ha nyi heloṟa ki konu?

⁷ Nyi lyo mandi mochiwawia, ‘Kiheri isanduku lya mkundana lya Mndumii-Ruwa lileambatso medenyi fo Yordani, mṟinga fo meda fo nyi fuletirima fulakisoke se.’ Koikyo maho ho nyi hechiwa ngumbuo ya Waisraeli mlungana.”

⁸ Kyasia wasoṟo walya wakawewuta chando Yoshua alewawia, wakawuta maho ikumi na hawi kiidi kya meda fulya fo Yordani, orio kishari kya Waisraeli iho limu limu likawewa chandu Mndumii-Ruwa alewia Yoshua, na wo wakakudika maho halya mṟasa alya handu walehenda ilaa wakahaleṟia ho.

⁹ Yoshua nao kahoṟotsa maho ikumi na hawi kiidi kya meda fulya fo Yordani, alya handu wakohanyi walya wawekudikie isanduku lilya lya mkundano wawehoṟoki. Kii kidi maho ho nyi pfo kundu hakeri mṟasa inu.

¹⁰ Wakohanyi walya wawekudikie isanduku lilya lya mkundana nyi walehoṟoka makidi hawi ha meda fulya itane orio kindo Mndumii-Ruwa alewia Yoshua nawie wandu nalyo Yoshua kawewawia chando Mose alembia. Nalyo wandu wakapfuṟukana iambada.

¹¹ Kyasia wandu walya wekimarisa iambada wakohanyi walya wakaida kusonguo na isanduku lilya lya mkundana lya Mndumii-Ruwa.

¹² Wasoṟo wa kishari kya Rubeni na kya Gadi hamu na kyenga kya oshari lo Manase wakasongoya Waisraeli wose warie shisha shawo kikawehendeka chandu Mose alewawasa.

¹³ Wandu waweshikie shiku makumi hana (40,000) warie shisha sha shida, wakaida oshangunyi lo Mndumii-Ruwa wechisoka na pichinyi lya mṟi fulya fo Yeriko.

¹⁴ Kyasia mkonu fo Mndumii-Ruwa kaṟumisha mṟundi oke Yoshua oshangunyi lo Waisraeli wose, na Waisraeli wo wakaindia Yoshua kiheri kya moo foke fose na chandu waleindia Mose kiheri kya ohendo lo moo foke.

¹⁵ Nalyo Mndumii-Ruwa kawia Yoshua,

¹⁶ “Wia wakohanyi wo wakudikie isanduku lyo wakure ipfo medenyi fo Yordani.”

¹⁷ Yoshua nao kawia wakohanyi walya, “Kurenyi ipfo medenyi fo Yordani.”

¹⁸ Kyasia wakohanyi walya wawekudikie isanduku lilya lya mkundano lya Mndumii-Ruwa wekiwuka alya makidi hawi ha meda fo Yordani wakadoya hambehu ha meda fulya, nalyo mṟinga fo meda fo Yordani fukasokase na iichuo cha kuwoka.

¹⁹ Wana wa Israeli wakaambada meda fo Yordani meri fo kuwoka fushikie mkonu fo ikumi, nawo wakawika kiṟaṟo mṟinyi fo Gilgali ora lo ngamenyi lo mṟi fo Yeriko.

²⁰ Kyasia Yoshua kahoṟotsa maho halya ikumi na hawi walehawuta kulya Yordani, kahahoṟotsa kulya mṟinyi fo Gilgali.

²¹ Nalyo Yoshua kawia wana walya wa Israeli, “Kokoya ili nduma wana wanu wechimmbesa, ngesa maho ha nyi ha iki?”

²² Nyi lyondi mochiwawia mudi, “Mkambo fu fo Israeli nyi fuleambada meda fo Yordani handu hahadutsu.

²³ Mndumii-Ruwa, Ruwa onu, nyi aleumiṟa mṟinga fo meda fo Yordani kipfa kyanu itane moambada, nyi nawudose aleumiṟa ipalyipalyi lya Shamu kipfa kyadu naso lukaambada,

²⁴ nyi kilewutika kido kundu wandu wose wa wuyana wawone ke owoko lo Mndumii-Ruwa nyi luwode pfinya, nanyo muwuteho iindiya Mndumii-Ruwa onu mlungana.”