YOSHUA 3 - Bibilia Kui Mdedie fo Kimochi

Waisraeli waambada meda fo Yordani

¹ Kyasia ngamenyi kilawo Yoshua handu hamu na Waisraeli wose wakawoka kyaṟo wawuka Shitimu wekishika alya medenyi fo Yordani wakawikaho kiṟaṟo walammboka iambada.

² Nalyo mfiri iṟaṟu yameida, wanene wawo wakawooka iida kiidi kya kiṟaṟo kyo,

³ wechiwia wandu, “Ili mandi mochiwona wakohanyi wa Walewi wakudikie isanduku lya mkundana lya Mndumii-Ruwa, ruwa onu, nyi mochikure mulioshe;

⁴ nyi wudo mochimanya njia yeida kunu kyamba mulemeidese kunu pfo. Mulakae hafui mnu na isandukulyo lya mkundano, nyi mochikaa handu haleshe cha kilometa imu.”

⁵ Nalyo Yoshua kawia wandu, “Kekuheṟemtsenyi, kyamba ngama Mndumii-Ruwa nahenda iwuta ṟiho kiidi kyanu.”

⁶ Kawewawiase wakohanyi, “Irenyi isandukulyo lya mkundana, muhende isongoya nalyo wandu.” Nawo wakaliira wakahenda isongoya nalyo wandu.

⁷ Nalyo Mndumii-Ruwa kawia Yoshua, “Inu kudi njihenda ikuṟumisha oshangunyi lo wana wa Israeli kundu wawute ho imanya ke, chandu njiwei hamu na mṟundi oko Mose na wudo njikeri ihenda ikaa handu hamu na iyo.

⁸ Ambuya nyi ochiwia wakohanyi wo wakudikie isanduku lya mkundana, wakashika mbai ya meda fulya fo Yordani nyi wechihoṟoka oo mbai ya meda.”

⁹ Kii kidi Yoshua kalaha Waisraeli kawawia, “Nchonyi hafui kundu muadanyie madedo ha Mndumii-Ruwa, Ruwa onu!

¹⁰ Nalyo Yoshua kahamba, ‘Wulalu nyi muhenda iwio napata ke Mndumii-Ruwa ichu ai na moo nyi akeri kiidi kyanu nao nyi akeri ihenda ifuna oshangunyi lonu Wakaanani, Wahiti, Wahivi, Waperizi, Wagirgasi, Waamori na Wayebusi mlawode iwingo.

¹¹ Ambuyenyi isanduku lya mkundana lya Mndumii o wuyana wose nyi likeri iida oshangunyi lonu lyechihenda Yordani.

¹² Kyasia sambuṟenyi wandu ikumi na wawi wawuka shisharinyi ikumi na shiwi sha Waisraeli, orio kishari mndu umu.

¹³ Ambuya ili mandi ndifo tsa wakohanyi wo wakudikie isandukulyo lya mkundana lya Mndumii-Ruwa, Ruwa o wuyana wose tsechichumia mṟingenyi fo Yordani, mṟinga fo meda fo nyifochitirima na mṟinga fo fuwesoka ora lo huye nyi fochikuumbia handu hamu.’”

¹⁴ Nalyo wandu wakawuka shiṟaṟonyi shawo kundu wahende iambada meda fo Yordani, na wakohanyi walya wawekudikie isanduku lilya wakawasongoya.

¹⁵ Oweṟe cha ilu walya wawekudikie isanduku lilya lya mkundano wakashika medenyi fo Yordani na ndifo tsawo tsikachuma mṟinga fulya wambaṟa ya meda (meda fo Yordani nyi fokefohika kiheri kya shilimu).

¹⁶ Mṟinga fulya fuwekeri isoka fuwuka ora lo huye fukotirima fukokuwumbiya handu hamu mṟasa Adamu, kihongo kiwekeri kufui na Sarethani. Mṟinga fuwekeri soka fuhende Arabu, ipalyipalyi lya Monyo fukosia fose, wandu wakaambada sumuhana na Yeriko.

¹⁷ Mandiho Waisraeli wawekeri iambada, wakohanyi walya wawekudikie isanduku lilya lya mkundana nyi walehoṟoka handu hai hahadutsu makidi hawi ha meda fulya fo Yordani itane Waisraeli wose walemarisa iambada.