YOSHUA 24 - Bibilia Kui Mdedie fo Kimochi

Waisraeli wawika kyasa keṟundia Mndumii-Ruwa

¹ Kyasia, Yoshua kasanyia handu hamu shishari shose sha Waisraeli kulya Shekemu. Kalaha wameku, wanene, wachili, na wanene walya wengi wa Israeli wose wakacha na oshangunyi lo Mndumii-Ruwa.

² Nalyo Yoshua kawawia, “Mndumii-Ruwa, Ruwa o Israeli nahamba adi; waku wanu ili kuwoka nyi wawekekaa kulya molyolya ya meda fo Efurate, nawo nyi Tera ai ndee o Abrahamu na Nahori, nawo nyi wawekeindia maruwa hengi.

³ Kyasia inyi Mndumii-Ruwa ngawuta wasahuye onu Abrahamu kulya molyolya fo meda fo Efurate, ngawemuende na kunu Kaanani na imsumba kishari king'anyi; ngamuinenga Isaki mana oke,

⁴ nao Isaki ngamwinenga Yakobo na Esau. Ngainenga Esau mafumvu ha Seiri kundu nahachilie. Kyaindi Yakobo handu hamu na wana wake wakahenda Misri.

⁵ Kyasia, ngaduma Mose na Aroni, ngawekapa Misri ngapo tsifoi, na lyefurumia ngamuwuta nyo kulya Misri.

⁶ Ambuya nyi njilewutapfo waku wanu ngawaende mṟasa ipalyipalyi lya Shamu. Nalyo Wamisri wakawaosha numa na mbahanyi ing'anyi na makari na wedoya frasi.

⁷ Kiheri Waisraeli walenjifihiṟia, ngawesotsa mema fukakaa kiidi kyawo na Wamisri, nalyo ipalyipalyi likashikia Wamisri. Nyo nyi mulewona isho njilewutia Wamisri wo, ambuya nanyo nyi mulekaa kulya nuka mfiri sa ifoi.

⁸ Ngawewasongoya mṟasa orukenyi lo Waamori wawekeri ora lulya lungi lo meda fo Yordani. Iwa wakakapana nanyo, ngawemukanyia iwawinga ngawarumatsa oshangunyi lonu na oruka lowo ngamwinenga.

⁹ Nao Balaki mana o Sipori mangi o Moabu kakure nache ikapana na Israeli. Ichu kalaha Baalamu mana o Beeri nache imsesa nyo;

¹⁰ kyaindi njilakunde iadanyia Baalamu; koikyo kawawikia mboṟa, koikyo ngawaashuo mawokonyi hake.

¹¹ Kyasia mukaambada meda fo Yordani mukacha na Yeriko, nalyo wandu wa Yeriko wakakapana nanyo, handu hamu na Waamori, Waperizi, Wakanani, Wahiti, Wag-irgashi, Wahivi na Wayebusi. Iwo wose ngawawika mawokonyi hanu.

¹² Ambuya njileduma shipfi oshangunyi lonu nasho shikadichiṟa wamangi, walya wawi wa Waamori, kyamba mulewakapa na oshu manya uda pfo.

¹³ Kii kidi nyi njilemwinenga madema sa mulawehademie, na mṟi sa mlaweiwikie, mukukeriepfo mukawelya ndunda tsa msabibu mulalemeiwaye.

¹⁴ “Koikyo wulalu, indienyi Mndumii-Ruwa ko mrima mhoṟotsu fuwei na wusumuhanyi, denyi piu iindia maruwa ha wongo halya waku wanu walehaindia kulya molyolya fo meda, na Misri, indienyi Mndumii-Ruwa.

¹⁵ Kokoya mlakundi iindia Mndumii-Ruwa, kyasia sambuṟenyi inu tichi nyiu mukundi imṟundiya ngesa nyi maruwa halya ha wongo wameku wanu walehaindia kulya mollolya fo meda fo Efrate, ang'u maruwa halya ha Waamori iwa mukeri kiidi kyawo. Kyaindi inyi na mba yako nyi lochiṟundia Mndumii-Ruwa.”

¹⁶ Nalyo wandu wakahaluo, “Lochiidima ilekana na Mndumii-Ruwa luhende iṟundia maruwa hengipfo.

¹⁷ Kyamba Mndumii-Ruwa, Ruwa odu, nyio aleluwutaso na waku wadu kulya Misri, mba ya wusinga, kawewuta shindo shinene mnu oshangunyi lodu, kaweluringa na ilusongoya njiyenyi kose luleida na kiidi kya wandu wose luleida kiidi kyawo,

¹⁸ nao Mndumii-Ruwa nyi alefuna wandu wose. Waamori wose wakeri kunu orukenyi, koikyo so nyi lukeri ihenda iṟundia Mndumii-Ruwa, kyamba oo nyi ai Ruwa odu.

¹⁹ Kyaindi Yoshua kawawia, “Ambuyenyi, nyo mochiidima iṟundia Mndumii-Ruwapfo, kyamba oo nyi ai mwele. Kyamba oo nyi Ruwa awode wunyenyi, elechiidima iwahoṟia madeko na njonyamaṟo tsanu.

²⁰ Kyamba kokoya molekana na Mndumii-Ruwa mukahenda iindia maruwa hengi mahenu, nyi echimukapa na imurumatsa, ma chandu awememuwutia mecha ho hose.”

²¹ Nalyo wandu walya wakahaluo Yoshua, “Ote nyi lochiṟundia Mndumii.”

²² Yoshua kawawia, “Nyo nyi mokuṟingishia muwenyi, ke nyi mosambuṟa Mndumii, na mukeri ihenda imṟundia, “Nawo wakamhaluo ‘So nyi waṟingishi.’”

²³ Nalyo kawawia, “Henda wutenyi maruwa ho mahenu hakeri kiidi kyanu, oshenyi Mndumii-Ruwa o Israeli ko mrima fonu fose.”

²⁴ Nawo wakahaluo, “Luhenda iṟundia Mndumii-Ruwa, Ruwa odu na imwindia.”

²⁵ Kyasia Yoshua kawika mkundana na wana wa Israeli alya Shekemu, kawewainenga wuwawaso na chile sa wechitsiosha.

²⁶ Naalyo Yoshua kaṟehia madedo ha kitapunyi kya wuwawaso wo Mndumii-Ruwa, kaweira iho sa ling'anyi kalihoṟotsa alya iṟaṟenyi kiidi kya mba i ya Ruwa.

²⁷ Kyasia Yoshua kawia wandu walya, “Ambuyenyi iho li nyi lyawa mṟingishi odu, kyamba nyi lyaicho madedo halya hose Mndumii adeda naso, koikyo nyi lyechiwa mṟingishi kiidi kyanu kundu mulahende ilekana na Mndumii-Ruwa, Ruwa onu.”

²⁸ Nalyo Yoshua kawainenga momu fo kuhendia orio mndu na koke.

Opfu lo Yoshua

²⁹ Kyasia shindo shi shammaa iida, Yoshua mana o Nuni, mṟundi o Mndumii-Ruwa kainutso awode maka ihana na ikumi (110).

³⁰ Waisraeli wakahenda imṟika alya hando awemhawie kyoṟa kyake kulya Timnath-sera, mafumvuhu ha Efraimu, ora lo huye lo fumvu lya Gaashi.

³¹ Kyasia Waisraeli nyi waleṟundia Mndumii-Ruwa kiheri kyose kya Yoshua na numa ya opfu loke wakaweengeṟa iṟundia Mndumii kiheri kyose wameku walya walewona ko meso hawo shindo shilya shose Mndumii-Ruwa alewutia Waisraeli.

³² Naho mafuo halya ha Yosefu, wana wa Israeli waweharie kuwuka Misri hakaṟiko alya Shekemu, alya handu Yakobo alehuṟa ko wana wa Hamori ndee o Shekemu ko shipeṟengu sha fesa ihana limu (100). Nalyo teri i ikawewa kyoṟa kya wana wa Yosefu.

³³ Nao Eliezeri mana o Aroni kaweinutso kaṟiko alya Gibea, mṟi fuweimnenge mana oke Finehasi orukenyi lo mafumvu ha Efraimu.