YOSHUA 23 - Bibilia Kui Mdedie fo Kimochi

Madedo hefurumia ha Yoshua

¹ Kyasia komeida ho mfiri sa ifoi Mndumii-Ruwa kasumba Waisraeli ofoṟo, kawewakiṟa na wakituwa wawo wuka njora tsose. Nao Yoshua nyi awei mndu mmeku o maka sa ifoi.

² Kyasia, Yoshua kalaha Waisraeli wose na wanene wawo, wachili wawo, na wasongoru wawo kawawia, “Ambuyenyi inyi ngakuo, mmeku o maka sa ifoi;

³ Ambuyenyi, nyo nyi mulewona shindo shilya shose Mndumii-Ruwa, Ruwa onu alewutia wandu wa mkambo iya ingi yose kipfa kyanu. Ambuya, Mndumii-Ruwa, Ruwa onu nyi alewakapanyia.

⁴ Ambuyenyi nyi njilemuhawia njoruka tsilya tsa mkambo ya wandu wai kiidi kyanu na tsa walya njilewarumatsa tsiwe kyoṟa kya oshari lonu, kuwokia Yordani itane Mediterania ko ora lo kiukanyi.

⁵ Kii kidi Mndumii-Ruwa, Ruwa onu nyi echiwawuta oshangunyi lonu na iwafuna piu, nanyo muhende ioṟa oruka lowo chandu Mndumii-Ruwa awewawikie kyasa.

⁶ “Kyasia, hoṟokenyi mui wawanzi, mochiosha na iwuta isho shose shii shiṟehie kitapunyi kya wuwawaso wo Mose, mlaembeṟukie ora lo kulyo manya lo kumoso,

⁷ iki nyi kundu mulakusanze na wandu wa wa mkambo i iledeo kiidi kyanu, manya mlasende marina ha maruwa hawo, manya ilya nyamu ko maruwa ho, manya ihaindia, manya iharamia kyamu,

⁸ kyaindi mukuwade na Mndumii-Ruwa onu chandu muwekuwode nao itane inu.

⁹ “Ambuyenyi chando Mndumii-Ruwa alefuna wandu wa mkambo ing'anyi iwewode pfinya kota nyo, kyaindi kuwode mndu oose alemeidima iwawinga nyo itane inu pfo.

¹⁰ Ambuya, mndu umu tupu o konu nyi ekeidima ikapana na wandu kiku, kyamba Mndumii-Ruwa, Ruwa onu nyio akewakapanyia chandu awewawikie kyasa.

¹¹ Koikyo, kuṟisenyi mnu, mochikunda Mndumii-Ruwa, Ruwa onu.

¹² “Kyamba kokoya nyi mochiwuya nduma, mukakulonga na wandu wa mkambo wa waledeo kiidi kyanu, mukawoka ialika kowo nawo wakawealika konu,

¹³ kyasia, kimanyike konu kii lohi ke Mndumii-Ruwa echifunase mkambo fu oshangunyi lonu sepfo, ambuya nyi wechiwa wemdekesha na mdeho fomudeha, iṟinga lyemukapa njora tsose, na msha yemutocha ipfo mesonyi hanu, itane moarisika mochiwuka kunu orukenyi lui lucha ludi. Mndumii-Ruwa, Ruwa onu alemwinenga.

¹⁴ “Ambuyenyi, kiheri kyako kewuka wuyanenyi nyi kishikie, nanyo nyi muichi mrimenyi yanu na ngoonyi tsanu ke shindo shose shicha Mndumii-Ruwa awewawikie kyasa kuwode manya kimu kileda kilawutikapfo. Shose nyi shileawutsio chando awewikie kyasa.

¹⁵ Kyaindi wulalu ambuyenyi, Mndumii-Ruwa ichu ai Ruwa onu, chandu aleawutsia shiasa sha shindo shicha alemuwutia nyi na wudo echeidima imuendie shindo shiwicho na imukapa muwuke kunu orukenyi lui lucha alemuinenga.

¹⁶ Kokoya mowumbuya mawawaso hake na itehiya mma fulya mulie nao mukawoka iindia maruwa hengi na ihaṟundia, nyi wudo ng'u nyashi ya Mndumii-Ruwa yechimusokia muhende isaramaya ko oweṟe muwuke kunu orukenyi luilucha alemwinenga.”