YOSHUA 22 - Bibilia Kui Mdedie fo Kimochi

Shishari sha ora lo ngamenyi shawuya na kanyi

¹ Nalyo Yoshua kalaha wandu wa oshari lo Rubeni, na lo Gadi na kyenga kya oshari lo Manase,

² kawawia, “Ambuya nyo nyi muleosha shose Mose mṟundi o Mndumii-Ruwa alemuwawasa, mukaweindia wuwawaso woke njilemuwawasa.

³ Kyamba kiheri kyose nyi muleoshana na wana wa mayanu, mulakiwade wawenyi itane inu, kyamba nyi muleosha kui osaaṟe mawawaso ha Mndumii-Ruwa onu.

⁴ Kyasia wulalu Mndumii-Ruwa onu ammaa iinenga wana wa wamayanu ofoṟo chando aweteṟie oo amonyi, kekuwuyenyi wulalu na kulya orukenyi lonu, lulya Mose mṟundi o Mndumii-Ruwa alemwinenga, luwekuwia lonu kulya molyolya ya meda fo Yordani.

⁵ Muwe wahendeli, mwindie necha mawawaso halya Mose mṟundi o Ruwa alemuwawasa. Mkunde Mndumii-Ruwa, Ruwa onu, mochiosha kilya akundi na iringa mawawaso hake, muhende ikaa kimu nao mochimṟundia ko mrima na ngoo yose.”

⁶ Nahong'u Yoshua kawawikia ona kawainenga momu wakuhendie kawawia,

⁷ “Wuyenyi na konu na wusuṟi wu wose, mbe tsanu tsose, fesa, sahabu, menya tsa aṟeṟa na nguo sa tsifoi.

⁸ Hawienyi wana wa wama wanu shindo shi muleshisoka wakituwa wanu.” Mose nyi alehawia kyenga kya wana na Manase oruka lo Bashani, nao Yoshua kainenga kyenga kya kawi kya wana wa Manase oruka lukeri ora lo ngamenyi lo meda fo Yordani.

Rasio kufui na Yordani

⁹ Kyasia, wana wa Rubeni, Gadi, na kyenga kya wana wa Manase wakasamana na shishari shilya shingi sha wana wa Israeli kulya Shilo, orukenyi lo Kaanani, wakawuya na orukenyi lowo lo Gileadi waweiwanenge nyi Mndumii-Ruwa kui owoko lo Mose.

¹⁰ Kyasia, wakashika kufui na meda fulya fo Yordani wai kiidi kya oruka lo Kaanani wakawika rasio sa ling'anyi alya kufui na meda.

¹¹ Nalyo mbonyi tsi tsikamanyika kiidi kya shishari shilya shingi sha wana wa Israeli ke! Kishari kya Rubeni, Gadi na kyenga kya kishari kya Manase nyi walewika rasio sa ling'anyi kufui na meda fo Yordani, orukenyi lo Kaanani, luwei oruka lowo.

¹² Wamemaa iicho wado Waisraeli wakakoyana kulya Shilo kundu waire shida wakapane na shisharisho sha ora lo ngamenyi.

¹³ Kyasia, wana wa Israeli wakaduma Finehasi, ai mana o mkohanyi Eliezeri, nahende Gileadi ko wana wa Rubeni, Gadi na kyenga kya wana wa Manase.

¹⁴ Finehasi kakure na wanene ikumi, orio umu owo nyi awei mnene o mba ya kishari kyake.

¹⁵ Nalyo wakahendia shishari sha Rubeni, Gadi na kyenga kya wana wa Manase kulya orukenyi lo Gileadi, wakawawia,

¹⁶ Siṟi yose ya Mndumii-Ruwa ikeri iwesa idi, “Nyi kiki kya wulembi wu wung'anyi wudi mowutia Mndumii-Ruwa o Israeli mukawika rasio li mukalekana na Mndumii?

¹⁷ Ngesa njonyamaṟo tsilya lulewuta kulya Peori tsishikie? Itsi lulalemeheṟemtso kyatso na chandu tsikeri ilisa wukiwa siṟi i ya Mndumii?

¹⁸ Nyi ki ili moda ioshana na Mndumii-Ruwa? Mukalekana na Mndumii-Ruwa inu, ngama nyi echisuo mnu kya siṟi i yose ya wana wa Israeli.

¹⁹ Ambuyeni, kokoya nyi muwonyi ke oruka lonu nyi lufanyi, njonyi kunu orukenyi lo Mndumii-Ruwa handu ihema lyake likeri, muwekuwonyiapfo kyoṟa handu hamu naso. Mukuṟise muladekio Mndumii manya ilutewa so luhende imdekio mochikuwikia rasio lingi lilai lya Mndumii-Ruwa odu.

²⁰ Ngesa Akani akeri mana o Zera, aledeko ko iwuṟa wuhendeli ko shindo shii shiele na ngapo ikakoya siṟi yose ya wana wa Israeli? Nyi wudo Akani alepfa amonyi pfo, ko kipfa kya wunyamaṟi wokepfo.”

²¹ Kyasia, wana wa Rubeni na Gadi hamu na kyenga kya wana wa Manase wakahaluo wanene walya wa wandu kudi,

²² “Ruwa onu, o maruwa, nyio Mndumii-Ruwa! Ruwa chu o maruwa nyio Mndumii-Ruwa! Oo nyi aichi kitewe lukawuta ludo, nyi wudo na Waisraeli wose wamanye. Kokoya iki nyi alekana na Mndumii-Ruwa ang'u iwuṟa wuidiki koke, kyasia, Mndumii-Ruwa alalukiṟe inu.

²³ Kokoya so nyi lulelekana na Mndumii-Ruwa lukawika rasio lyadu kundu lukoṟiepfo shidaso shemaya modonyi, na shidaso sha ofoṟo na ofoṟo, na shidaso sha mso, kyasia, Mndumii-Ruwa nalutae kiṟache.

²⁴ “Chi wudopfo; ambuya rasio li nyi luleliwika ko wuowu ke ili numa wana wanu wechikaa wawie wanawadu, ‘Ngesa nyo nyi mui kuda na Mndumii-Ruwa, ichu ai Ruwa o Israeli?

²⁵ Ngesa muwonyi ke Mndumii-Ruwa nyi awikie meda fo Yordani fuwe mṟasa fonu naso? Nyo wa oshari lo Rubeni na Gadi muwode kyoṟa kyose ko Mndumii-Ruwapfo.’ Koikyo wana wanu nyi waweidima itewa wana wadu walaindie Mndumii-Ruwa.

²⁶ Ikyo nyi kyo kileluinenga lukawika rasio li, luleliwika kundu luwutie ho shidaso manya sahabu pfo,

²⁷ nyi luleliwika rasio li kundu liwe kiṟingishio kiidi kyadu na nyo na shishari shadu shechicha ke manyaso nyi lusumhanyi iṟundia Mndumii-Ruwa, lochimbutia shidaso shadu shekoṟa modonyi na shidaso shadu sha ofoṟo, kundu wana wanu walache iwia wana wadu ke wawode kyoṟa kyose ko Mndumii-Ruwa pfo.

²⁸ Ambuya lukawekusaṟase lingi lochihamba ke kokoya idedo cha ilyo lyadedo kipfa kyadu na wa kishari kyadu mfiri yo yechicha, nyi lochihamba, ‘Ambuyenyi ofano lo rasio ya Mndumii-Ruwa sa lilewiko nyi waku wadu, manya waleliwika kundu wadasie ho pfo, kyaindi nyi kundu liwe wuṟingishi kiidi kyanu naso?’

²⁹ Kyamba so luwekusaṟie ilekana na Mndumii-Ruwa manya le pfo, lochiwikia rasio lingi lyedasia shidaso shemaya modonyi manya shidaso sha mso ang'u shidaso shingi. Kyamba so lukundi idasia handu hengipfo sile rasio lya Mndumii-Ruwa odu likeri hemenyi lyake.”

³⁰ Kyasia mkohanyi Finehasi, na wanene wose handu hamu na wanene wose wa shishari wawekeri handu hamu nao wekiicho madedo ha wana wa Rubeni na Gadi na kyenga kya wana wa Manase, wakaidikiana nawo.

³¹ Nalyo Finehasi mana o mkohanyi Eliezeri, kawia oshari lo Rubeni, Gadi na kyenga kya wa oshari lo Manase, “Inu nyi lomanya ke Mndumii-Ruwa nyi akeri kiidi kyanu kyamba mulemekuletsane nao pfo. Ko ikyo wulalu nyi mokiṟa Waisraeli na ngapo ya Mndumii-Ruwa.”

³² Nalyo Finehasi mana o mkohanyi Eliezeri handu hamu na wanene walya wengi wakasamana na oshari lo Rubeni na Gadi, wakakure orukenyi lulya lo Gileadi, wakawuya Kaanani ko Waisraeli wakawaongoya mbonyi tso.

³³ Kyasia, Waisraeli wakachihiyo kya mbonyitso waleongoyo, wakaana Mndumii-Ruwa. Nalyo wakawealacha makusaṟo hawo hekapa shida yerahanyitsa oruka lulya lo Rubeni na Gadi.

³⁴ Kyasia, wa oshari lo Rubeni na Gadi wakalaha rasio lilya nyi, “Wuṟingishi,” wechihamba, “Rasio li wuṟingishi wodu ke Mndumii-Ruwa nyio ai Ruwa.”