YOSHUA 21 - Bibilia Kui Mdedie fo Kimochi

Mṟi ya Walewi

¹ Kyasia wakeri kulya Shilo orukenyi lo Kaanani wanene wa shishari sha Walewi wakachea Eliezeri mkohanyi, na Yoshua mana o Nuni, na wanene wa shishari sha Waisraeli wose.

² Wakawawia, “Ambuyenyi, Mndumii-Ruwa nyi alewawasa Mose ke luinengo mṟi handu lochikaa na mapata helisa shiuma shadu.”

³ Kyasia, sumuhana na wuwawaso wo Mndumii-Ruwa, Waisraeli wakasambuṟa wuka njoruka tsawo, mṟi na shihongo shelisa shiuma, wakashiinenga Walewi shiwe shawo.

⁴ Kuṟu huhya ya kuwoka nyi ileolokia kishari kya Kohathi. Kiidi kyawo nyi wana wa Aroni mkohanyi, iwa nyi waleinengo ko kuṟu kuhya mṟi iwekeri orukenyi lo kishari kya Yuda, Simeoni, na Benyamini. Mṟi yose waleinengo nyi iweshikie ikumi na iṟaṟu (13).

⁵ Walya waletsuhaa wa oshari lo Kohathi nyi waleinengo mṟi iwekeri orukenyi lo Efraimu, Dani na kyenga kya oruka lo Manase.

⁶ Wandu wa kishari kya Gershoni waleinengo ko kuṟu kuhya mṟi ikumi na iṟaṟu (13) iwekeri kiidi kya oruka lo shishari sha Isakari, Asheri, Naftali na kyenga kya oruka lo Manase kulya Bashani.

⁷ Mba tsa kishari kya Merari nyi waleinengo mṟi ikumi na iwi (12) kiidi kya oruka lo shishari sha Rubeni, Gadi na Zebuluni.

⁸ Nyi wudi Waisraeli waleinenga Walewi mṟi yo na shihongo shelisa shiuma shawo chandu Mndumii-Ruwa alewawasa Mose.

⁹ Iha nyi ho marina ha mṟi ilewuka ko oshari lo Yuda na lo Simeoni ileinengiyo ko

¹⁰ wandu wa Aroni mkohanyi, ko mba ya Kahathi awei o kishari kya Lewi. Nyi wudo kilewa kyamba kuṟu kuhya ilewaolokia kuwoka.

¹¹ Ambuya nyi waleinengo Kiriath-arba nafo nyi Hebroni (Arba nyi awei ndee o Anaki), ifu nyi fuwekeri mafumvuhu ha Yuda handu hamu na mapichi hawefuṟingichie.

¹² Kyaindi madema ha mṟi fo handu hamu na shihongo shayo iwemmaa iinengo Kalebu mana o Yefune hawe hake.

¹³ Kii kidi wawememaa iinenga wana wa mkohanyi, Aroni mṟi fo Hebroni, fuwekeri mṟi fodichia ko mndu alewaha alakusirie, nyi walewainengase mṟi fo Libna handu hamu na mapichi helisia shiuma,

¹⁴ Yatiri na pichi lyelisia shiuma, Eshtemoa handu hamu na handu helisia shiuma,

¹⁵ Holoni handu hamu na pichi lyelisia shiuma, Debiri handu hamu pichi lyelisia shiuma,

¹⁶ Aini na handu helisia shiuma, Yuta na handu helisia shiuma na Beth-shemeshi handu hamu na handu helisia shiuma. Yose nyi mṟi kenda ilewuka kiidi kya shishari shi shiwi.

¹⁷ Kiidi kya oruka lo Benyamini nyi waleinengo se pfo mṟi ingi. Gibeoni na handu helisia shiuma,

¹⁸ Anathothi na handu helisia shiuma. Almoni handu hamu na handu helisia shiuma.

¹⁹ Kyasia mṟi yose ya wana wa Aroni wawei wakohanyi iweshikie ikumi na iṟaṟu (13) handu hamu na handu helisia shiuma.

²⁰ Wandu walya waletsuhaa wawei wa mba ya Kohathi, nawo waweise na oshari lo Lewi nyi waleinengo mṟi kiidi kya oruka lo oshari lo Efraimu.

²¹ Nawo nyi waleinengo Shekemu, mṟi fuweimsambuṟe fodichia ko mndu awaha, handu hamu na mapata hake helisia shiuma hawei mafumvuhu ha oruka lo Efraimu, na Gezeri na mapata helisia shiuma,

²² Kibzaimu na mapata helisia shiuma na Beth-horoni na mapata helisia shiuma. Mṟi yose waleinengo nyi iweshikie ina.

²³ Kiidi kya oruka lo Dani nyi waleinengo Elteke na mapata helisia shiuma, Gibethoni na mapata helisia shiuma,

²⁴ Aiyaloni na mapata hake helisia, Gath-rimoni na mapata hake helisia shiuma; mṟi waleinengo nyi iweshikie ina.

²⁵ Kiidi kya kyenga kya oruka lo Manase nyi waleinengo Taanaki handu hamu na mapata helisia shiuma, na Gath-rimoni na mapata hake helisia shiuma.

²⁶ Mṟi waleinengo iya iweshikie iwi. Koikyo mba tsa Kohathi tsiletsuhaa waleinengo mṟi ikumi (10) handu hamu na mapata helisia shiuma.

²⁷ Mba tsa Walewi wa kishari kya Gershoni nyi waleinengo mṟi iwi kiidi kya kyenga kya oruka lo oshari lo Manase, nayo nyi Golani, kulya Bashani fuwei mṟi fodichia handu hamu na mapata helisia shiuma, na Beeshtera na mapata hake.

²⁸ Kiidi kya oruka lo oshari lo Isakari nyi waleinengo Kishioni na mapata helisia shiuma, Daberathi na mapata helisia shiuma,

²⁹ Yurmuthi na mapata hayo helisia shiuma, na En-ganimu na mapata helisia shiuma. Mṟi yose waleinengo nyi iweshikie ina.

³⁰ Na kiidi kya oruka lo oshari lo Asheri nyi waleinengo Mishali na mapata helisia, Abdoni na mapata helisia,

³¹ Helkathi na mapata helisia na Behobu na mapata helisia. Mṟi waleinengo nyi iweshikie ina.

³² Kiidi kya oruka lo oshari lo Naftali nyi waleinengo Kedeshi, fuwei nyi mṟi fodichia fukeri Galilaya hamu na mapata helisia, Hamoth-dori na mapata hafo helisia na Kartani na mapata hafo helisia shiuma na Kartani na mapata hafo helisia.

³³ Mṟi yo yose ya mba tsa kishari kya Gershoni nyi iweshikie ikumi na iṟaṟu (13) handu hamu na mapata helisia shiuma.

³⁴ Walewi wengi waletsuhaa wawei wana wa Merari, nyi waleinengo mṟi kiidi kya oruka lo oshari lo Zebuluni. Yokneamu na mapata hafoi helisia, Karta na mapata hafoi helisia.

³⁵ Dimna na mapata helisia na Nahalali na mapata hake, mṟi yose iweshikie iina.

³⁶ Kiidi kya oruka lo Rubeni nyi waleinengo Bezeri na mapata hafo helisia, Yahazi na mapata hafo helisia.

³⁷ Kedemothi hamu na mapata hake helisia shiuma na Mefaathi na mapata hake helisia shiuma yose ikawa mṟi ina.

³⁸ Kiidi kya oruka lo oshari lo Gadi, nyi waleinengo Ramothi fo Gileadi nafo nyi fuwei mṟi fodichia handu hamu na mapata hafo helisia shiuma, Mahanaimu na mapata hake helisia shiuma,

³⁹ Heshboni na mapata hafo helisia shiuma, na Yezeri na mapata hafo helisia shiuma yose ikashika mṟi ina.

⁴⁰ Koikyo mṟi yose waleinengo wana wa Merari, wawei na oshari lo Walewi walya wawetsuhee nyi iweshikie ikumi na iwi (12).

⁴¹ Kii kidi Walewi nyi waleinengo mṟi makumi haana na nyanya (48) na mapata hayo helisia shiuma kiidi kya oruka lo Waisraeli.

⁴² Mṟi i yose nyi iwenjiṟingichie na mapata helisia shiuma.

Israeli yaoṟa oruka

⁴³ Kyasia Mndumii-Ruwa nyi aleinenga Waisraeli oruka lose chandu awewikie kyasa na waku wawo. Nawo wekiambia wakakaapfo na iluchilia.

⁴⁴ Nawudo Mndumii-Ruwa kawasumba ofoṟo orio handu alya orukenyi chandu awewikie kyasa na wafee wawo. Kulakaepfo wakituwa waleidima iwasembelia, kyamba Mndumii-Ruwa nyi aledambikia wakituwa wawo mawokonyi hawo.

⁴⁵ Kulakikaepfo manya kyasa kimu Mndumii-Ruwa aweteṟie Waisraeli kilaleawutsio. Shasa shose nyi shileawutsio.