YOSHUA 2 - Bibilia Kui Mdedie fo Kimochi

Yoshua aduma lokitala mṟinyi fo Yeriko

¹ Kyasia Yoshua kaduma wandu wawi ko kiṟika wawuka Shitimu wahende isoṟa mbonyi tsa oruka lulya wechiwoka mṟinyi fo Yeriko. Nawo wekihenda wakakuidia mba imu ya mndu mka mmeluki elaho nyi Rahabu, wakakaapfo.

² Kyasia mangi o mṟi fulya fo Yeriko kaicho mbonyi tso kawio, “Ambuya nyi kuwode wasoṟo wawi wawukie ko Waisraeli wacheiye na kunu mṟinyi kio ki kya inu kundu wasoṟe mbonyi tsa oruka lu.”

³ Nalyo mangi kaduma wandu ko Rahabu echihamba, “Wuta wandu wo walecha kopfo na nja, kyamba nyi walecha isoṟa mbonyi tsa oruka lu.”

⁴ Kyaindi mndu mka ulya nyi aleṟika wandu walya wawawi, nalyo kahaluo walya waledumo koke, “Nyi lohi wandu wo nyi walecha na koko, kyaindi njiichi kundu wawukiepfo.

⁵ Ambuya kiheri mema fuleho na mongo fo mṟi fukashingo wandu nyi walehenda, njechiidima imanya kundu walehendapfo; kekambiṟenyi muwaoshe kyamba nyi mochiwawona.”

⁶ Kyaindi Rahabu nyi awewaṟikie kai kawashikia na mandusu ha katanyi awealie ipfo kai.

⁷ Kyasia wandu walya waledumo nyi mangi wakalaha wandu walya wesoṟa mbonyi wakaida njia tsiwode shitaṟa sheambada meda fulya fo Yordani. Kiheri walewuka kulya mṟinyi mongo fo mṟi fukashingo.

⁸ Kyasia Rahabu kahendia wandu walya wesoṟa mbonyi kulya kai walamelaa,

⁹ kawawia, “Inyi nyi njiichi ke Mndumii-Ruwa nyi alemmaa imuinenga orukalu. So nyi luwodo nyi wuowu wung'anyi mnu kipfa kyanu, na wandu wose wa oruka lu nyi wa wapfu mrima kipfa kyanu.

¹⁰ Kyamba so nyi luicho mbonyi tsanu chandu Mndumii-Ruwa aleumiṟa ipalyipalyi lya Mediteranioni oshangunyi lonu kiheri mulewuka kulya orukenyi lo Misri, na chandu mulewutia wamangi walya wawi wa Waamori wawekeri malyoolya fo meda fo Yordani, mangi Sihoni na Ogu, walya mlewarumatsa piu.

¹¹ Lokiicho kudo, ambuya nyi lulepfa mrima nakamu kipfa kyanu, pfinya ikalusiiya piu. Kyamba Mndumii-Ruwa onu, nyi ai Ruwa o Ruwehu na orukenyi.

¹² Ko kipfa kya ikyo njikeri imuterewa munjiliye nyamu ko rina lya Mndumii-Ruwa onu ke nyi mochinjiwutia sha wucha inyi na wa oshari loko, nyi chando na inyi njilemuwutia sha wucha muwenjiinenga kiṟingishio.

¹³ Wikenyi kyasa ke nyi mochiluashuo lulawoho, wande oko, mae oko, wasacha wako na washiki wako na oshari lowo lose, mochilekia luwohopfo.”

¹⁴ Nalyo wandu walya wakahaluo, “Moo yanu nyi moo yadu, kokoya mulechiluhamba, ili mandi Mndumii-Ruwa echiluinenga orukalu nyi lochimuwutia sha mawucha.”

¹⁵ Nalyo Rahabu kasotsia wandu wo nja ko shihowo kyamba itiṟisha nyi liwei omombonyi lo mṟi fo Yeriko.

¹⁶ Nao kawawia, “Hendenyi muowe ipfo mafumvunyi handu ha mfiri iṟaṟu, na ili walya waimulatia walamuwone wechiwuya na mṟinyi nanyo mukukurie muhende konu.”

¹⁷ Nalyo wandu walya wesoṟa mbonyi wakambia, “So nyi lochiawutsia kindo ki lokulia nyamu.

¹⁸ Ambuya kiheri ki lochicha kunu orukenyi, masa kihowo kya kimande iya itiṟishenyi lyapfo handu oluitsa. Ambuya uwesanyia wandu wapfo iya kopfo, hamu na wasacha wapfo, washiki wapfo na wose wa kishari kyose kya wandu wapfo.

¹⁹ Kyaindi kokoya mndu echiwuka kunu mba kahenda iṟahaṟaha ipfo nja, lochiwada mti kya opfu lokepfo. Kyaindi kokoya mndu akeri kunu mba, kapaayo, so nyi lochiwada mti kipfa kya opfu loke.

²⁰ Ko ora lungi kokoya iyo ochiwia mndu ose kya mbonyi tsi tsadu, so lochipfungo se kya nyamu ii lolya na iyopfo.”

²¹ Nao kawawia, “Kiwekuwia kidi chandu mohamba.” Nalyo kawainenga momu wakakuhendia nao kamasa kiwoho kilya kya kimande alya itiṟishenyi lyake.

²² Wandu walya wesoṟa mbonyi wakahenda ipfo mafuvuhu. Wakakukayapfo handu ha mfiri iṟaṟu itane walya wawewalatia wakawuya na mṟinyi fo Yeriko, wamewapfula walawawone.

²³ Kyasia wandu wo wawi wesoṟa mbonyi wakakusokia kulya fumvuhu wakawuya wakaambada meda wakawuya na ko Yoshua mana o Nunu. Wakamwongoya kya isho shose walekoyana nasho.

²⁴ Nalyo wakambia, “Nyi kya lohi Mndumii-Ruwa amewika oruka lu lose mawokonyi hadu. Kyamba wandu wa oruka lo wapfiie mrima kipfa kyadu.”