YOSHUA 19 - Bibilia Kui Mdedie fo Kimochi

Oruka luleinengo wa oshari lo Simeoni

¹ Kuṟu kuhya ya kawi nyi ileolokia wana wa Simeoni, na oruka lowo nyi luweluṟingichie kiidi kya oruka lulya lo wana wa Yuda.

² Wana wa Simeoni nyi walehawio mṟi ya Beer-sheba, Sheba, Molada,

³ Hasar-shuali, Bala, Esemu,

⁴ Eltoladi, Bethuli, Horma,

⁵ Siklagi, Beth-markabothi, Hasar-susa

⁶ Beth-lebaothi, na Sharuheni. Koikyo mṟi yose waleinengo nyi iweshikie ikumi na iṟaṟu (13) handu hamu na shihongo shayo.

⁷ Kukawekaapfo na mṟi ingi En-rimoni, Etheri, na Ashani, yose waleinengo nyi ina (4) handu hamu na shihongo shayo.

⁸ Handu hamu na shihongo shose shiwetengetie mṟi yo mṟasa Baalath-beeri, Ramath ya Negeb. Iki nyi kyo kyoṟa kya wana wa Simeoni sumuhana na mba tsawo.

⁹ Kii kidi oshari lo Yuda nyi luwewainenge oruka lungi na lo ngoseṟa, koikyo wana wa Simeoni wakainengo kyenga kya oruka lo Yuda.

Oruka luleinengo wana wa Zebuluni

¹⁰ Kuṟu kuhya ya kaṟaṟu nyi ileolokia wana wa Zebuluni. Oruka lowo nyi luwehendie mṟasa Saridi.

¹¹ Mṟasa fukahenda ora lo kiukanyi itane foshika Mareali, fukaidia Dabeshethi, numa fukakoya kimeda kikeri ora lo ngamenyi lo Yokneamu.

¹² Iwuka Saridi mṟasa fulehenda kya ora lo ngamenyi itane mṟasa fo Kisloth-tabori, fukaidia Daberathi itane foshika Yafia.

¹³ Mṟasa fombuka Yafia nyi fulehenda kya ora lo ngamenyi itane Gath-heferi, Eth-kasini, fukado itane Rimmani fukalemekia Nea.

¹⁴ Ko ora lo huye mṟasa nyi fulehenda Hanathoni fukatsitsia pichinyi lya Yiftaheli.

¹⁵ Fukawesanzia mṟi Nahalali, Shimroni, Yidala na Bethlehemu, mṟi waleinengo nyi iweshikie ikumi na iwi (12) handu hamu na shihongo shayo shose.

¹⁶ Iki nyikyo kyoṟa waleinengo wana wa Zebuluni na mba tsawo, mṟi yo ya shihongo shayo.

Oruka lo oshari lo Isakari

¹⁷ Kuṟu kuhya ya kaana nyi ileolokia oshari lo Isakari.

¹⁸ Oruka lowo nyi luwewode mṟi ya Yezreeli, Kesalothi, Shunemu,

¹⁹ Hafaraimu, Shioni, Anaharathi,

²⁰ Rabithi, Kishioni, Ebesi,

²¹ Remethi, En-ganimu, En-hada na Beth-pasesi.

²² Mṟasa fowo nyi fuleshika Tabori, Shahasuma, Beth-shemeshi fukatsitsia medenyi fo Yordani. Mṟi yose waleinego nyi aweshikie ikumi na iṟandaṟu (16) handu hamu na shihongo shayo.

²³ Iki nyi kyo kyoṟa wana wa Isakari waleinengo mṟi yo na shihongo shayo.

Oruka lo wana wa Asheri

²⁴ Kuṟu kuhya ya katanu nyi ileolokia wana wa Asheri.

²⁵ Oruka lowo nyi luwewode mṟi ya Helkathi, Hali, Beteni, Akshapi,

²⁶ Alameki, Amadi na Mishali. Ora lo kyukanyi mṟasa nyi fulekoyana na Karmeli na Shihor-libnathi.

²⁷ Mṟasa fukahalukia ora lo ngamenyi itane Beth-dagoni fukakoyana na oruka lo Zabuluni na pichi lya Iftaheli. Fukahenda kya ora lo huye itane Beth-emeki, Neieli na idose kya ora lo huye itane Kabuli,

²⁸ Ebroni, Rehobu, Hamoni, Kana mṟasa Sidoni Ing'anyi.

²⁹ Mṟasa fukahaluka itane Rama fukashika Tiro fuwemwiṟihie na omombo. Fukahendase itane foshika Hosa na itsitsia ipalyipalyi lya Mediteranea. Kuwewodepfo mṟi ingi, nayo nyi: Maharabu, Azibu,

³⁰ Umu, Afeki na Rehobu. Mṟi yose waleinengo iweshikie makumi hawi na iwi (22) handu hamu na shihongo shayo shose.

³¹ Ikyo nyi kyo kyoṟa waleinengo wana wa Asheri, mṟi yo na shihongo shayo.

Oruka lo wana wa Naftali

³² Kyasia kuṟu kuhya ya kaṟandaṟu nyi ilehoya wana wa Naftali.

³³ Mṟasa fowo nyi fulewokia Helefu na mbai ya Zaananimu, fukaweidia Adami-nekebu na Yabneeli itane Lakumu fukatsitsia medenyi fo Yordani.

³⁴ Nawudo mṟasa fukohenda ora lo kyukanyi itane Aznoth-tabori, fukahenda Hukoki, fukakoyana na oruka lo Zebuluni ko ora lo kyukanyi, fukawekoyana na oruka lo wana wa Asheri ko ora lo kyukanyi, fukawekoyana na oruka lo wana wa Yuda. Ko ora lo ngamenyi nyi fuleida kiidi kya meda fo Yordani.

³⁵ Mṟi yawo iwewode njomombo nyi:- Zidimu, Zeri, Hamathi, Rakathi, Kirerethi,

³⁶ Adama, Rama, Hazori,

³⁷ Kedeshi, Edei, En-hazori,

³⁸ Yironi, Migelaleli, Horemu, Beth-anathi na Beth-shemeshi. Mṟi yose iweshikie ikumi na kenda (19) handu hamu na shihongo shayo.

³⁹ Iki nyikyo kyoṟa waleinengo wana wa Naftali, mṟi yo na shihongo sho shayo.

Oruka lo wana wa Dani

⁴⁰ Kuṟu kuhya ya mfungade nyi ileolokia wana wa Dani.

⁴¹ Oruka lowo luwewode mṟi ya: Sora, Eshtaoli, Ir-shemeshi.

⁴² Shaalabini, Aiyaloni, Yithla,

⁴³ Eloni, Timna, Ekroni,

⁴⁴ Elteke, Gibethoni, Baalathi,

⁴⁵ Yehudi, Bene-beraki, Gath-rimoni,

⁴⁶ Meyarikoni na Rakoni na oruka luwekeri hafui na Yopa.

⁴⁷ Kiheri wana wa Dani waledetsa oruka lowo nyi walehenda ikapa mṟi fo Leshemu, nawo wakafuwinga, wakawaha wandu wose wawekeripfo, nalyo wakafuikolonyia na ifudumbuya rina nyi Dani, rina liwei lya Wasahuyawo.

⁴⁸ Iki nyikyo kyoṟa kya wana wa Dani waleinengo, mṟi yo na shihongo shayo.

Ohawi lo ifurumia

⁴⁹ Kyasia kiheri walemarisa ihawiana oruka lose, Waisraeli nyi waleinenga Yoshua mana o Nuni ohawi loke makidi hawi hawo.

⁵⁰ Ko ikyo sumuhana na idedo lya Mndumii-Ruwa nyi waleinenga Yoshua mṟi sa alefusambuṟa amonyi, nafo nyi Tinath-sera; nafo nyi fuwekeri oruka lo mafumvuhu lo Efraimu. Kyasia Yoshua kafuwika ko wuhya mṟi fo kakaapfo.

⁵¹ Kyasia nyi wuding'u Eliezeri mkohanyi na Yoshua, handu hamu na wanene wa shishari sha wana wa Israeli walehawa oruka lu ko kuṟu kuhya oshangunyi lo Mndumii-Ruwa mongonyi fo ihema lyekoyanyi ipfo Shilo. Nyi wudo waleawutsia iṟundalyo lyehawa orukalo.