YOSHUA 18 - Bibilia Kui Mdedie fo Kimochi

Shishari shilya shingi shahawio oruka

¹ Kyasia Waisraeli wekiwinga oruka lulya, Waisraeli wose nyi walekoyana alya Shilo kundu washimbuo ihema lyekoyana.

² Ambuya nyi kuwetsuhee shishari mfungade shilawemehawio oruka lowo.

³ Kyasia Yoshua kawia Waisraeli, “Nyi mochikuriisa mudi itane indii, mulahende ichilia oruka lulya Mndumii-Ruwa, Ruwa o wandeanu alewainenga?

⁴ Kyasia njisambuṟienyi wandu waṟaṟu wawuka ko orio kishari njiwadume ipfo orukenyi kose, waṟehie ramani sumuhana na shishari shawo, nalyo wanjiendie mbonyi.

⁵ Nawo nyi wechihawa orukalo shenga mfungade. Oshari lo Yuda nyi wechideo ora lowo lo seri na oshari lo Yosefu wechideo ora lo huye.

⁶ Achikienyi necha shengasho mfungade mochiloṟa chando shikeri, numa munjiendie nalyong'u njikape kuṟu kuhya oshangunyi lo Mndumii-Ruwa odu, kya ora lo orio kishari kyanu.

⁷ Kyaindi Walewi wechihawio kindo kyose kiidi kyanupfo, kyamba kyoṟa kyawo nyi wakohanyi weṟundia Mndumii-Ruwa. Gadi na Rubeni na kenga kya oshari lo Manase wo waleinengo ohawi lowo kulya ora lo kyukanyi lo meda fo Yordani. Mose mṟundi o Ruwa nyio alewainenga ohawi lu lowo.”

⁸ Kyasia wandu wa wakawoka kyaṟo kesoṟa mbonyi tsa orukalo. Kyasia walamhenda Yoshua kawawawasa: “Hendenyi ipfo orukenyi kose muṟehiye shose shisumuhanyi na orukalo muche injiwia, kundu na inyi njiwekapa kuṟukuhya iya Shilo oshangunyi lo Mndumii ko ohawi mochihawio.”

⁹ Wasoṟo walya wakatengeta kulya orukenyi kose wakaweloṟa shenga mfungade na iṟehiya necha mbonyi tsatso tsose handu ha mṟi iya yake yose. Nalyo wakawuya kulya Shilo handu Yoshua awekeri.

¹⁰ Kyasia Yoshua akeri kulya Shilo kakapia kuṟu kuhya njohawi tso oshangunyi lo Mndumii-Ruwa katsihawia Waisraeli orio kishari ora lokyo.

Oruka lo kishari kya Benyameni

¹¹ Kuṟu kuhya ya kuwoka nyi ileolokia oshari lo Benyameni sumuhana na mba tsawo. Iwa nyi walehawio oruka lo kiidi kya oshari lo Yuda na lulya lo Yosefu.

¹² Mṟasa folyo ko ora lo huye nyi kuwokia meda fo Yordani fukaidia huye ya Yeriko na oruka lo mafumvu lochihenda ora lo kiukanyi itane nuka ya Beth-aveni.

¹³ Mṟasa fukaidia ora lo seri sumuhana na Luzu fukaidia seri ya Luzu itane fokoya Ataroth-adari fumvuhu likeri seri ya Beth-horoni ya seri.

¹⁴ Ora lo kyukanyi lo fumvu lyo likeri ora lo seri lo Beth-horoni mṟasa fukahalukia itane foshika Kiriath-baali, ko rina lingi nyi fokelaho Kiriath-yearimu, mṟifu nyi fui fo oshari lo Yuda. Ifu nyifo fuwei mṟasa fowo ko ora lo kyukanyi.

¹⁵ Mṟasa fo ora lo seri nyi fulewokia shihongo sha mṟi fo Kirath-yearimu, itane foshika Efroni fukashika sokenyi tsa mṟinga tsa Neftoa.

¹⁶ Fukawehendase kya seri fukaidia mbai ya fumvu likeri kufui na pichi lya mana o Hinomu, sa liwei ora lo huye lo pichi lya Warefai. Mṟasafu fukawesoka kufui na pichi lya Hiromu, ora lo seri lo fumvu lya Wayebusi, fukawesoka itane foshika En-rogeli,

¹⁷ nalyo mṟasa fu fukalemekia kya ora lo huye fochihenda itane foshika En-sheshi, fukaidia Gelilothi kundu kukuirie ko Adumimu fukasoka itane foshika ihonyi lya Bohani mana o Rubeni.

¹⁸ Kyasia mṟasa fokiuka oo fukatengeta ora lo huye mbarinyi ya Betharaba fukomarisikia ipfo Araba.

¹⁹ Mṟasafu fukaidiase ora lo huye lo fumvu lya Beth-holga fukaidia ora lo huye lo ipalyipalyi lya Monyo ora lo seri lo meda fo Yordani; ifu nyi fo mṟasa fo ora lo seri.

²⁰ Meda fo Yordani fukawa mṟasa foke ko ora lo ngamenyi. Ilu nyilo oruka lo oshari lo Benyameni walewio na chando mṟasa ilewiko mba kui mba.

²¹ Nalyo mṟi ya oshari lo Benyameni sumuhana na mba tsawo nyi; Yeriko, Beth-hogla, Emek-kesisi,

²² Beth-araba, Zemaraimu, Betheli,

²³ Avimu, Para, Ofra,

²⁴ Kefar-amoni, Ofri na Geba, yose nyi mṟi ikumi na iwi (12) hamu na shihongo shayo.

²⁵ Mṟi ingise nyi Gibeoni, Rama, Beerothi,

²⁶ Mispa, Kefira, Moza,

²⁷ Rekemu, Irpeeli, Tarala,

²⁸ Zela, Ha-elefu, Yebusi, nyifo Yerusalemu, Gibea na Kiriath-yearimu, yose waleinengo nyi mṟi ikumi na ina (14) handu hamu na shihongo shayo. Iki nyi kyo kyoṟa kya wana wa Benyameni na mba tsawo.