YOSHUA 17 - Bibilia Kui Mdedie fo Kimochi

Ora lo kyukanyi lo Manase

¹ Wa oshari lo Manase ichu awei mana mbee o Yosefu wakawehawio oruka lowo ko ikapio kuṟukuhya. Makiri, ichu awei mana mbee o Manase handu hamu na ndee oke Gileadi wawemehawio mṟi ya Gileadi na Bashani kyamba nyi wawei warahari ko mbonyi tsa shida.

² Walya wengi wa oshari lo Manase nyi waleinengo handu hengi ko kuṟu kuhya sumuhana na mba tsawo. Shishari sho nyi shilya sha Abiezeri, Heleki, Asrieli, Shekemu, Heferi na Shemida iwa wose nyi wana wa kisoṟo wa Manase mana o Yosefu.

³ Kyasia Selofehadi mana o Heferi, mana o Gileadi, mana o Makiri, mana o Manase, awewode wana wa kisoṟopfo, indi nyi awewode wana wa waka tupu nawo nyi; Mahla, Noa, Hogla, Milka na Tirsa.

⁴ Kyasia wana wa kika wakacha oshangunyi lo mkohanyi mnene Eleazari na Yoshua, mana o Nuni handu hamu na wanene walya wengi wakawawia, “Mndumii-Ruwa nyi alewawasa Mose ke naso luwehawio oruka chandu wasoṟo wa oshari lodu wekehawio.” Kyasia kui wuwawaso wo Mndumii-Ruwa, Yoshua kawahawia oruka lowo chandu alehawia wasoṟo wa oshari lowo.

⁵ Kii kidi wa oshari lo Manase nyi waleengeṟio kawi oruka lo Gileadi na Bashani lukeri molyolya fo meda fo Yordani.

⁶ Iki nyi kilewa kido kipfa wana wa kika wa Manase nyi walehawio kyoṟa kyawo kya oruka chandu wana wa kisoṟo wa oshari lowo walehawio, (oruka lo Gileadi nyi lulehawio wana wengi wa Manase.)

⁷ Oruka lo oshari lo Manase nyi lulewokia Asheri itane Mikmethathi lukeri ora lo ngamenyi lo Shekemu, lukawehendase kya ora lo seri itane oruka lo wandu wa En-tapua.

⁸ Oruka lo Tapua nyi mbe lo Manase, kyaindi mṟi fo Tapua fuwei mṟasenyi nyi fuwei fo wana wa Efraimu.

⁹ Mṟasafo nyi fulehenda itane kimeda kya Kana. Mṟi iya iwei ora lo seri lo Kanani iwei ya wana wa Efraimu ma chandu orukalo luwei nyi lo wana wa Manase. Mṟasa fo ora lo huye lo kimeda kya Kana fukatsitsia ipalyipalyinyi lya Mediteranea.

¹⁰ Oruka lo seri nyi luwei lo oshari lo Efraimu na oruka lo ora lo huye nyi lo oshari lo Manase, mṟasa fowo nyi ipalyipalyi lya Mediteranea ko ora lo kyukanyi na ora lo Asheri nyi luwei huye ya ora lo kyukanyi lo Manase, ora lo huye lo ora lo ngamenyi nyi luwei lo oshari lo Isakari.

¹¹ Ko ora lungi kiidi kya oruka lo Isakari na oshari lo Asheri, oshari lo Manase nyi lulehawio mṟi ya Beth-shani na Ibleamu handu hamu na mṟi ya Donri, Endori, Taanaki na Megido handu hamu na wandu wa shihongo sho shayo; na kyenga kya kaṟaṟu kya oruka lo Naftali.

¹² Kii kidi wana wa Manase waleidima ifuna wandu walya wawekeri kiidi kya mṟi yapfo, kyasia Wakaanani wakakaapfo

¹³ manya kiheri Waisraeli walewada pfinya waleidima iwafunapfo, shile nyi walewahaluo masinga hewasingia.

Efraimu na ora lo kyukanyi lo Manase waterewa waengeṟio oruka

¹⁴ Kyasia wana wa oshari lo Yosefu wakahendia Yoshua, wakambia, “Nkili mandi oluhawia oruka lumu tupu na Mndumii-Ruwa nyi aleluwikia mboṟa lukawa wandu wafoi?”

¹⁵ Kyasia Yoshua kawahaluo, “Kokoya nyi mufoi mnu, na oruka lo mafumvu ha Efraimu lulawashike se, kyasia hendenyi ngeṟenyi tsa oruka lo Waperizi na ya Warefai, muduhune ngeṟatso kuwe handu hanu hekaa.”

¹⁶ Nawo wakawemhaluo, “Nyi kyalohi orukalu lo mafumvu lulushikiepfo; manya kudo Wakaanani wose wakeri ipfo mapichinyi nyi wawode makari ha menya, na walya wose wakeri Beth-shani na shihongo shake na walya wakekaa pichinyi lya Yezreeli.”

¹⁷ Nalyo Yoshua kawia wana wa Yosefu, wa oshari lo Manase, “Nyi kya lohi momewa wafoi, na muwode pfinya. Kiwaṟi muinengo oruka lumu tupu pfo.

¹⁸ Ambuya orukalu manya chandu lukeri ngeṟa, nyi mochiduhuna na iluchilia wokia ora lu itane ora lulya lungi. Kyamba nyi mochifuna Wakaanani manya chandu wawode makari ha menya na iwada pfinya.”