YOSHUA 16 - Bibilia Kui Mdedie fo Kimochi

Oruka lo Efraimu na lo Manase

¹ Wana wa Yosefu nyi walehawio kuwokia meda fo Yordani, ora lo ngamenyi lo soka tsa Yeriko wakaidia mafumvuhu itane Betheli.

² Kuwokia Betheli mṟasa Luzu mṟasa fukaidia Atarothi kundu wawekekaa Waarki.

³ Fukawesoka ora lo kyukanyi orukenyi lo Wayafleti mṟasa Beth-horoni ya seri na Gezeri fukomarisikia ipalyipalyi lya Mediteranea.

⁴ Wana wa Yosefu kishari kya Manase na oshari lo Efraimu nyi waleinengo orukalo luwe kyoṟa kyawo.

Oruka lo oshari lo Efraimu

⁵ Ilu nyi oruka wana wa Efraimu waleinengo luṟinganyi na mba tsawo, ko oralo ngamenyi nyi lulewokia Ataroth-adari mṟasa Beth-horoni ko ora lo huye,

⁶ na lukahenda mṟasa ipalyipalyi lya Mediteranea. Ko ora lo huye mṟasa nyi fuweidie Mikmethathi na ko ora lo ngamenyi nyi fuletengeta tane Taanath-shilo fukaidiase ora lo ngamenyi tane foshika Yanoa.

⁷ Fukawuka Yanoa tane Atarothi na Naara, fukoshika Yeriko, fukamarisikia medenyi fo Yordani.

⁸ Fukawuka Tapua, fukahenda kya ora lo kyukanyi itane kimeda kya Kaana fukatsitsia ipalyipalyi lya Mediteranea. Ilu nyilo oruka wana wa Efraimu waleinengo luweṟinganyi na mba tsawo.

⁹ Wakaweengeṟese mṟi ingi na shihongo shayo wuka orukenyi lo oshari lo Manase.

¹⁰ Ambuya Waefraimu walefuna Wakaanani walya wawei Gerezi. Koikyo Wakaanani wo nyi walekaa kiidi kya wana wa Efraimu itane inu, wakawa masinga hawo wechiwaṟundia maṟunda halya maumu.