YOSHUA 15 - Bibilia Kui Mdedie fo Kimochi

Oruka luleinengo Wayuda luwe kyoṟa kyawo

¹ Oruka luleinengo oshari lo Yuda ko kuṟu kuhya sumuhana na mba tsawo nyi lulewokia ora lo seri na lo ngamenyi itane loshika oruka lo Edomu. Ora lulya lo seri nyi nuka ya Sini

² Ambuya mṟasa fowo ko ora lo seri nyi lulewokia membe ya seri ya ipalyipalyi lya Monyo,

³ fukaidia shifumvunyi sha Akrabimu, fukaweida mbai ya Sini, na ora lo seri lo Kadeshi-barnea, fukaidia Hesroni mṟasa Adari fukahaluka fukashika Karka.

⁴ Fomewuka iya fukaidia kufui na Asmoni fukoosha kimeda kya Misri mṟasa fukashika ipalyipalyi lya Mediteranea. Ifo nyifo mṟasa fo seri fo oruka lo Yuda.

⁵ Mṟasa fowo kya ora lo ngamenyi nyi ipalyipapyi lya Monyo itane mtsitsionyi fo meda fo Yordani alya handu futsitsie ipalyipalyi. Mṟasa fo huye nyi fuidie mbai ya ipalyipalyi lya Monyo lya hando meda fo Yordani fuida na ipalyipalyi.

⁶ Mṟasafo nyi fuidie Beth-hogla na ora lo huye lo Beth-araba itane foshika ihohu lya Bohani ai mana o Rubeni.

⁷ Fukawuka oo fukaidia Debri pichinyi lya Akori ora lo huye itane Gilgali, kufui na oruka lukuirie lo Adamimu lukeri kufui na kimeda ko ora lo seri, numa fukaembeṟukia sokenyi tsa En-shemeshi fukatsitsia Engrogeli.

⁸ Koikyo mṟasa fo nyi fuleida pichi lya Hiromu ora lo seri lo kifumvu kya Wayebusi, mahonyi ha Yerusalemu, fukohendia kitoṟomoso kya fumvu liwei ora lo kyukanyi lo pichi lya Hinomu fukashika mtsitsionyi fo mfo fo Refaimu.

⁹ Nahong'u mṟasa fukaida fumvuhu fukashika soka tsa Neftoa itane foshika mṟi ya fumvu lya Efroni. Iya mṟasa fukahaluka mṟasa Baala, napfo nyi Kiriath-Yearimu,

¹⁰ naipfo fukahalukia ora lo kyukanyi mṟasa Seiri; fukaweida na kya ora lo huye lo fumvu lya Yerimu, ipfo nyi Kesaloni, fukawesoka se itane foshika Beth-shemeshi kufui na Timna.

¹¹ Nafo fukahendase kya ora lo huye lo Ekroni fukatengeta fukashika Shikroni, fukaidia fumvu lya Baala mṟasa Yabneeli, fukamarisikia ipalyipalyi lya Mediteranea.

¹² Mṟasa fo ora lo kyukanyi nyi ipalyipalyi lya Mediteranea. Nyi wudo mṟasa ya oruka Wayuda waleinengo iwei sumuhana na shishari shawo.

Wandu wa Kalebu wachilia oruka lo Hebroni

¹³ Nao Kalebu mana o Yefune nyi aleinengo kyenga kya oruka lo Yuda chando Mndumii-Ruwa alewawasa Yoshua. Ambuya nyi aleinengo Kiriath-Arba ang'u mṟi fo Arba ichu awei sahuye o Anaki. Rina lya mṟi fo nyi fokelaho Hebroni wulalu.

¹⁴ Kii kidi Kalebu nyi alefuna shishari shiṟaṟu sha Anaki: nyi kyo kishari kya Sheshai, kishari kya Ahimani na kishari kya Talmai.

¹⁵ Amewuka Hebroni kahenda ikapa wandu wawekekaa Debri o kuwoka mṟi fu nyi fuwekelaho Kirath-seferi.

¹⁶ Nalyo Kalebu kahamba ke mndu msoṟo cho oose echiida na iwinga mṟi fo Kirath-seferi nyi echimwalikia mana oke o kika awekelaho nyi Aksa.

¹⁷ Kyasia, Othnieli mana o Kenazi ai mana o mae o Kalebu, kawinga mṟi fulya, nao Kalebu kamwalikia mana ulya oke.

¹⁸ Kyasia mkonu fo wali wowo, Aksa kawia Othnieli mii oke naterewe ndee oke Kalebu dema. Kiheri kyo Aksa nyi awedamie huye ya frasi, na kiheri alesokia wanda Kalebu kambesa, “Nyi kiki ukundi njikuinenge?”

¹⁹ Nalyo Aksa kamhaluo, “Njiinenga kya nnga; njiinenga handu hawode mṟinga kyamba kulya Negebu kundu ulenjiinenga nyi kukuumu.” Kyasia Kalebu kamwinenga soka tsose tsa mṟinga tsiwei shifuvunyi na tsilya tsiwekeri njora tsa rendewelenyi.

Mṟi ya Yuda

²⁰ Ilu nyilo oruka wana wa Yuda waleinengo sumuhana na mba tsawo.

²¹ Mṟi iya iwekeri ora lo seri lo oruka lo Yuda ikeri sumuhana na Edomu nyi Kabseeli, Ederi, Yaguri,

²² Kina, Dimona, Adada,

²³ Kedeshi, Hazori, Ithnani,

²⁴ Zifu, Telemu, Bealothi,

²⁵ Hazor-hadata, Kerioth-hezroni,

²⁶ Amamu, Shema, Molada,

²⁷ Hasar-gada, Heshmoni, Beth-peleti,

²⁸ Hazar-shuali, Bersheba, Biziothia,

²⁹ Baala, Iimu, Ezemu,

³⁰ Eltoladi, Kesili, Horma,

³¹ Siklagi, Madmana, Sansana,

³² Lebaothi, Shilhimu, Aini na Rimoni; mṟi yose waleinengo nyi iweshikie, makumi hawi na kenda (29), handu hamu na shihongo shayo.

³³ Mṟi iya iwekeri pichinyi nyi; Eshtoli, Sora, Ashna,

³⁴ Zanoa, Enganimu, Tapua, Enamu,

³⁵ Yarmithi, Adulamu, Soko, Azeka,

³⁶ Shaaraimu, Adithaimu, Gedera na Gederothaimu. Mṟi yose waleinengo nyi ikumi na ina (14) handu hamu na shihongo shayo.

³⁷ Wakaweinengose mṟi ya Senani, Hadasha, Migdalgadi,

³⁸ Dileani, Mispe, Yoktheeli,

³⁹ Lakishi, Boskathi, Egloni,

⁴⁰ Kaboni, Lahmamu, Kithlishi,

⁴¹ Gederothi, Bethdagoni, Naama na Makeda, mṟi yose waleinengo nyi iweshikie ikumi na iṟandaṟu (16) handu hamu na shihongo shayo.

⁴² Wakaweinengose mṟi ya Lebna, Etheri, Ashani,

⁴³ Yifta, Ashna, Nezibu,

⁴⁴ Keila, Akzibu na Maresha. Yose nyi kenda (9) handu hamu na shihongo shayo.

⁴⁵ Lingise wakainengo Ekroni na shimṟi shayo shitutu na shihongo shayo,

⁴⁶ mṟi yose na shihongo shayo iwekeri kufui na Ashdodi kiidi kya Ekroni na ipalyipalyi nyi waleinengo.

⁴⁷ Ashdodi na Gaza handu hamu na mṟi yose kimeda kya Misri mṟasa ushike wambaṟa ya ipalyipalyi lya Mediteranea.

⁴⁸ Mṟi iwekeri kufui na mafumvu nyi Shamiri, Yatiri, Soko,

⁴⁹ Dana, Kiriath-sana.

⁵⁰ Anabu, Eshtemoa, Animu,

⁵¹ Gosheni, Holoni na Gilo. Mṟi yose waleinengo nyi ikumi na fumu (11) hamu na shihongo shayo.

⁵² Wakaweinengose mṟi ya Arabu, Duma, Eshani,

⁵³ Yanimu, Beth-tapua, Afeka.

⁵⁴ Humta, Kiriath-arba na Siori. Iweshikie mṟi kenda (9) handu hamu na shihongo shayo.

⁵⁵ Wakaweinengose mṟi ya Maoni, Karmeli, Zifu, Yuta,

⁵⁶ Yezreeli, Deamu, Zanoa,

⁵⁷ Kaini, Gibea na Timna. Mṟi yose waleinengo nyi ikumu (10) handu hamu na shihongo shayo.

⁵⁸ Handu hamu na mṟi ya Halhuli, Beth-suri, Gedori,

⁵⁹ Maarathi, Bethanothi na Eltekoni, yose nyi iṟandaṟu (6) handu hamu na shihongo shayo.

⁶⁰ Wakaweinengo Kiriath-baali, nafo nyi fokelaho se nyi Kirath-yearimu, na Raba yose waleinengo nyi mbe iwi handu hamu na shihongo shayo.

⁶¹ Mṟi iwekeri nuka nyi; Beth-araba, Midini, Sekala,

⁶² Nibshani, mṟi fo Monyo na Engedi. Mṟi yose waleinengo nyi iweshikie iṟandaṟu (6) handu hamu na shihongo shayo.

⁶³ Ambuya Wayuda waleidima ifuna Wayebusi wawekekaa Yerusalemu pfo, koikyo itane inu Wayuda na Wayebusi nyi wakeri handu hamu mṟinyi fo Yerusalemu.