YOSHUA 14 - Bibilia Kui Mdedie fo Kimochi

Oruka lo Kaanani lohawo

¹ Ishi nyi sho shioṟa sha oruka shilehawio Waisraeli kulya orukenyi lo Kaanani; chando mkohanyi Eliezeri na Yoshua mana o Nuni, handu hamu na wanene wa shishari sha Waisraeli walewahawia.

² Njorukatso nyi tsilehawo ko kuṟu kuhya, chandu Mndumii-Ruwa alewawasa Mose nahawe ko njoshari tsilya kenda na kyenga.

³ Mose nyi alehawia njoshari tsilya kyenga ora lo ngamenyi lo meda fo Yordani, kyaindi wana wa Lewi walehawio kindopfo.

⁴ Wana wa Yosefu nyi wawei shishari shiwi; Manase na Efraimu. Kishari kya Lewi kileinengo kyoṟa kyose pfo sile nyi waleinengo mṟi yekaa tupu na handu helisa shuma shawo ko kelya kyawo.

⁵ Nyi wudi Waisraeli walehawa orukalo chandu Mndumii-Ruwa alewawasa Mose.

Mṟi fo Hebroni foinengio Kalebi

⁶ Kyasia mkonu fumu wandu wa kishari kya Yuda walehendia Yoshua kulya Gilgali, nao Kalebu mana o Yefune ichu awei Mkenizi, kawia Yoshua, “Ngesa na ukumburie chandu Mndumii-Ruwa alewia mṟundi oke Mose kyadu so luwawi kiheri kilya luwei Kadeshi-Barnea?

⁷ Kiherikyo nyi njiwewode maka makumi hana (40), kyamba Mose mṟundi o Rwa nyi alenjiduma njihende isoṟa mbonyi tsa oruka. Kiheri njilemwendie mbonyi tsose chandu njiletsiwona na itsiidikia mrimenyi foko.

⁸ Kyaindi wadume walya wengi njilehenda nawo nyi waletewa wandu wakapfiiyo nyi mdo, kya indi inyi njileosha Mndumii-Ruwa, Ruwa oko ko wuhendeli.

⁹ Mkonufo tichi Mose nyi alenjilia nyamu ke orukalu njileluida nyi lochiwa lo kishari kyako mlungana. Kipfa kya wuhendeli woko ko Mndumii-Ruwa oko.

¹⁰ Ambuya wulalu komeida maka makumi hana (40) wokia Mndumii-Ruwa alededa na Mose, kiheri kyo Waisraeli waweṟahaṟaha kulya nuka. Kyasia wokia kiheri kyo chandu Mndumii-Ruwa awenjiwikie kyasa, nyi alenjiringa ngakaa na moo mṟasa inu, na wulalu njiwode maka makumi nyanya na itanu (85).

¹¹ Ambuya wulalu nyi njiwode pfinya cha kiheri kilya Mose alenjiduma, nyi njiwode pfinya yehenda ikapana shidenyi na iṟunda maṟunda hengi hose.

¹² Ambuya nyi njikuterewa unjiinenge orukalu lo mafumvuhu chandu Mndumii-Ruwa alenjiteṟia mkonu fulya. Kyamba iyo kumonyi nyi uleicho ke Waanaki nyi wawekekaa kulya mṟinyi iwode njomombo, kofia Mndumii-Ruwa nyi nechioshana na inyi njiwafune chandu Mndumii-Ruwa aleteṟia.”

¹³ Nalyo Yoshua kawikia Kalebu ona, kamnengia mṟi fulya fo Hebroni fuwe kyoṟa kyake.

¹⁴ Kyasia mṟi fo Hebroni fukawa kyoṟa kya wana wa Kalebu mana o Yefune Mkenizi itane inu kyamba Kalebu nyi alewa mhendeli ko Mndumii-Ruwa, Ruwa o Israeli.

¹⁵ Ili mboko mṟi fo Hebroni nyi fuwekelaho Kiriatharba; mndu chu awekelaho nyi Arba nyi awekeri mndu ang'anyi mnu kiidi kya Waanaki. Kyasia oruka lukawada ofoṟo kulakiwade se shida.