YOSHUA 13 - Bibilia Kui Mdedie fo Kimochi

Oruka lulawemechilio

¹ Kyasia, kiherikyo Yoshua nyi awekeri mmeku o maka sa ifoi. Nalyo Mndumii-Ruwa kambia, “Ambuya iyo nyi mmeku o maka sa ifoi, ambuya nyikuwodesepfo oruka sa lung'anyi, lulamechilio.

² Njorukatso nyi oruka lose lo Wafilisti, na oruka lose lo Wageshuri,

³ oruka lulusende nyi lo Wakaananyi kuwokia kimeda kya Shihori mṟasenyi na Misri mṟasa oruka lo Ekroni kya ora lo huye. Njoruka tsose tsa wamangi watanu wa Ufilisti Gaza, Ashdodi, Ashkeloni, Gathi na Ekroni handu hamu na oruka lo Avi,

⁴ ora lo seri. Lya ngoseṟa njoruka tsa Wakaanani wokia Ara ya Wasidoni mṟasa Afeki mṟasenyi na Waamori.

⁵ Lingise oruka lo Gebali na Lebanoni ora lo ngamenyi lo Baal-gadi wanda ya fumvu lya Hermoni mṟasa Lebo-hamathi;

⁶ na oruka lo lukeri fumvuhu kiidi kya Lebanoni na Misrefoth-maimu, na wandu wekekaapfo nyi Wasidoni. Kyasia wandu wo wose wa njorukatso nyi njechiwafunapfo na iyo uhawe njoruka tso ko Waisraeli tsiwe kyoṟa kyawo chandu njilekuwawasa.

⁷ Ambuya nyi ochihawia njoshari tsilya kenda na kenga kya oshari lo Manase walya walawemehawio kindo.”

Oruka lukeri ora lo ngamenyi lohawo

⁸ Wandu wa kishari kya Rubeni na Gadi na kyenga kya kishari kya Manase iwa wawemaa ihawio oruka lo ora lo ngamenyi lo meda fo Yordani chandu Mndumii-Ruwa alewawasa Mose mṟundi oke.

⁹ Oruka lowo nyi luwokie Aroeri mbai ya pichi lya Armoni na mṟi fulya fukeri makidi hawi ha ipichilyo na oruka lulya lukeri rendewele kuwokia Medeba mṟasa Diboni,

¹⁰ handu hamu na mṟi iya ya mangi o Sihoni o Waamoni, iwechilie Hesboni kashika mṟasenyi na Waamoni;

¹¹ oruka lo Gileadi, oruka lo Wageshuri na Wamaakathi, fumvu lya Hebroni na oruka lose lo Bashani mṟasa Saleka,

¹² na oruka lose lo wumangi wo Ogu sa awetsuhee o Warefai, ichu nyi awechilie Ashtaroti na Edrei oruka lo kiidi kya Bashani. Ambuya Mose nyi alewinga iwa wose na iwafuna.

¹³ Manya kudo Waisraeli walefuna Wageshuri na Wamaakapfo koikyo nyi wakeri kiidi kya Waisraeli mtano inu.

¹⁴ Mose alehawia oshari lo Lewi orukapfo kyamba shidaso shilya Waisraeli walewutia Mndumii-Ruwa, Ruwa owo shemaya modonyi nyisho ohawi lowo, chando Mndumii-Ruwa alewawasa Mose.

Kihongo kiwekinengie Rubeni

¹⁵ Mndumii-Ruwa nyi alehawia kishari kya Rubeni oruka luṟinganyi na oshari lowo.

¹⁶ Orukalo nyi lulewokia Aroeri, mṟasenyi na pichi lya Armoni, handu hamu na mṟi fo fuwekeri kiidi kya pichilyo, na oruka lose luwei rendewele luwekeri kufui na Medeba;

¹⁷ nyi handu hamu na Heshroni na mṟi yake yose iwei kulya rendewelenyi, nayo nyi Diboni, Barmoth-baeli na Bethbaalmeoni;

¹⁸ na Yahasa Kedemothi, Mefaathi,

¹⁹ Kiriathaimu, Sibma, Sereth-shahari, fumvu lya ipichi lyo,

²⁰ Beth-peori, mpiṟimko fo fumvu lya Pisga, na Beth-yeshimothi,

²¹ na mṟi yose iwekeri kulya orukenyi rendewelenyi, ya wumangi wose wo mangi Sihoni mangi o Waamori, ulya awechilie Heshboni, ichu nyi ulya Mose alemkapa handu hamu na wanene wa Midiani nao nyi: Evi, na Rekemu, na Suri, na Huri, na Rebba, iwa nyi wawechilie orukalu handu ha mangi Sihoni.

²² Baalamu, msawi, mana o Beani, ulya Waisraeli walembaha nyi awei umu owo.

²³ Mṟasa fo oruka lo Rubeni ora lo kyukanyi nyi meda fo Yordani. Ikyo nyi kyo kyoṟa kyawo mṟi yo yose na shihongosho.

Oruka luweinengie Gadi

²⁴ Oruka sa Mose aleinenga oshari lo Gadi sumuhana na wana wawo,

²⁵ nyi Yazeri, mṟi yose ya Gileadi na kyenga kya oruka lo Waamoni mṟasa Aroeri ikeri ora lo ngamenyi lo Raba,

²⁶ na wuka Heshboni mṟasa Ramathi-mizpe, Betomimu, na wokia Mahanaimu mṟasa fo Debiri;

²⁷ na mṟi iwekeri ipichinyi lya Bethharamu, Bethnimra, Sukothi na Zafoni na oruka lose luwechilie nyi Mangi Sihoni o Heshboni, orukalo nyi luwei ora lo ngamenyi lo meda fo Yordani na ko ora lo seri lukaṟaosana na ipalyipalyi lya Kinerothi.

²⁸ Mṟi yo handu hamu na shihongo shayo nyi shileinengo oshari lo Gadi sumuhana na mba tsawo.

Oruka luweinengie ora lo ngamenyi lo Manase

²⁹ Kii kidi Mose nyi aleinenga kyenga kya oshari lo Manase sumuhana na mba tsawo,

³⁰ oruka lose kuwokia Mahanaimu mṟasa oruka lose awechilia mangi Ogu lo Bashani; handu hamu na mṟi makumi haṟandaṟu (60) ya Yairi,

³¹ kyenga kya Gileadi, Ashtarothi, Edrei, ii yose nyi iwenjichilie nyi mangi Ogu o Bashani; oruka lo nyi luleinengio wana wa Makiri awei mana o Manase sumuhana na mba tsawo.

³² Itsi nyi tso njoruka Mose alewahawia tsiwei ora lo ngamenyi lo Yeriko na meda fo Yordani kiheri kilya awei orukenyi lui rendewele lo Moabu.

³³ Kyaindi oshari lo Lewi Mose aleluhawia kyoṟa kya orukapfo kyamba nyi alewawia kyoṟa kyawo nyi Mndumii-Ruwa, o Israeli.