YOSHUA 12 - Bibilia Kui Mdedie fo Kimochi

Mangi tsilewingo nyi Waisraeli

¹ Iwa nyiwo wamangi walewingo shidenyi na Waisraeli wakaweduo oruka lowo wokia ora lo ngamenyi lo meda fo Yordani kuwokia pichi lya meda Armoni mṟasa mafumvu ha Hermoni na oruka lose lo Araba ora lo ngamenyi:

² Mangi Sihoni o Waamori ichu nawekekaa Heshboni kachilia awuka Aroeri fuwekeri wambaṟa ya pichi lya Armoni. Kawechilia awuka kiidi kya pichi lyo mṟasa meda fo Yahoki fuwei nyi mṟasa fo Waamoni, kimu na kenga kya oruka lo Gileadi.

³ Kawechilia oruka lose lo Araba, wokia ipalyipalyi lya Kinerethi, ora lo ngamenyi mṟasa Beth-yeshimothi ipalyipalyi lya mongo itane oshika oruka lo lui fumvu lya Pisga.

⁴ Mangi ungi nyi mangi Ogu, umu o Warefai wawetsuhee. Ichu nyi awechilie Bashani kakaa Ashtorothi ang'u Edrei.

⁵ Wumangi woke nyi wuwewokie fumvunyi lya Hermoni, ipfo Saleka, Bashani yose mṟasa, kyenga kya Gileadi mṟasa mṟasenyi fo oruka lo mangi Sihoni o Hesboni.

⁶ Ambuya Mose mṟundi o Mndumii-Ruwa, handu hamu na Waisraeli nyi alewinga Wamangi wo nao Mndumii-Ruwa kainenga shishari sha Rubeni, Gadi na kyenga kya oshari lo Manase tsiwe kyoṟa kyawo.

Wamangi sa walewingo nyi Yoshua

⁷ Kyasia, Yoshua handu hamu na Waisraeli wakawinga wamangi wose wawekeri oruka luwei ora lo kyukanyi lo meda fo Yordani, wokia Baalgadi pichinyi lya Lebanoni mṟasa fumvunyi lilawewode kindo lya Halaki ora lo seri kufui na Seiri. Nalyo Yoshua kahawia shishari sha Waisraeli njoruka tso tsiwe shioṟa shawo.

⁸ Njorukatso nyi tsiwei tsa mafumvu, oruka luwei rendewele, oruka lo Araba, oruka luwei mpiṟimko fo mafumvu, oruka luwei nuka na oruka lo Negebu; njoruka tsi nyi tsiwei tsa Wahiti, Waamori, Wakanani, Waperizi, Wahivi na Wayebusi.

⁹ Wamangi walewawinga umu umu nyi mangi o Yeriko, mangi o Ai, mṟi fuwei kufui na Betheli,

¹⁰ mangi o Yerusalemu, mangi o Hebroni,

¹¹ mangi o Yarmuthi, mangi o Lakishi,

¹² mangi o Egloni, na mangi o Gezeri,

¹³ mangi o Debri, mangi o Gederi,

¹⁴ mangi o Horma, mangi o Aradi,

¹⁵ mangi o Libna, mangi o Adulamu,

¹⁶ mangi o Makeda, mangi o Betheli,

¹⁷ mangi o Tapua, mangi o Heferi,

¹⁸ mangi o Afeka, mangi o Lashanoni,

¹⁹ mangi o Madoni, mangi o Hazori,

²⁰ mangi o Shimroni-meroni, mangi o Akshafi,

²¹ mangi o Taanaki, mangi o Megido,

²² mangi o Kedeshi, mangi o Yokneamu mṟi fukeri fumvuhu Karmeli,

²³ mangi o Dori oruka lo Nafothidori, mangi o Goiimu kulya Gilgali,

²⁴ Mangi o Tirza. Wamangi wo wose nyi waweshikie makumi haṟaṟu na umu (31).