YOSHUA 11 - Bibilia Kui Mdedie fo Kimochi

Yoshua awinga Yabini

¹ Kyasia mangi Yabini o mṟi fo Hazori kekiicho mbonyi tso, kaduma ndumi ko mangi Yobabu o Madoni, mangi o Shimroni na mangi o Akshafi,

² na ko wamangi wawei mafumvuhu ora lo huye, na walya wawei Araba iwekeri ora lo seri lo Kinerethi, kulya mapichinyi na wawei Nafoth-dori kya ora lo kyukanyi.

³ Kawedumase ndumi ko Wakaanani wawekeri ora lo ngamenyi na lo kyukanyi, na ko Waamori, Wahiti, Waperizi, Wayebusi, wawekekaa mafumvuhu na wanda ya fumvu Hermoni orukenyi lo Mispa.

⁴ Iwa wose wakasanza mbahanyi tsawo tsing'anyi mnu. Nawo nyi wawefoi cha msanga fo kufui na ipalyipalyi warie magari hawo hafoi na frasi sa tsifoi.

⁵ Wamangi wa wose wakalungana wakawika kiṟaṟo kyawo kufui na soka ya Meromu kundu wakapane na Waisraeli.

⁶ Nalyo Mndumii-Ruwa kawia Yoshua, “Ambuya ulawaowuo iwo, kyamba ngama saa cha ii nyi njechiwadambikia mawokonyi ha Waisraeli, nanyo nyi mochidumbuo mri ya frasi tsawo na iongoṟa makari ho hawo ko modo.”

⁷ Kyasia alya sokenyi ya Meromu Yoshua kawapufukia handu hamu na mbahanyi tsake wakawakapa.

⁸ Mndumii-Ruwa kawadambikia mawokonyi ha Waisraeli wakawakapa na iwawingia mṟasa Sidoni ing'anyi na Misrefothi-maimu mṟasa ora lo ngamenyi kiidi kya ipichi lya Mispa. Nalyo Waisraeli wakawakapa na iwawaha wose.

⁹ Yoshua kadumbuo dumbuo mri ya madende ha frasi tsawo tsose kawekoṟa makari halya hawo ko modo chandu Mndumii-Ruwa alembawawasa.

¹⁰ Kiheri Yoshua alewuya, kawada mṟi fo Hazori nao kawaha mangi o mṟi fulya cha kipfa nyio awei mnene o mangi tsilya tsose.

¹¹ Lyefurumia karumatsa mṟi fulya fo Hazori ko modo, kawewaaha wandu wose wakeri kulya mṟinyi, manya alatsuhaṟe pfo manya mndu umu.

¹² Nyi wudo alerumatsa mṟi iya ingi yose ko modo, kawewaha mangi tsilya tsawo tsose chandu Mose mṟundi o Mndumii-Ruwa alembawawasa.

¹³ Ambuya Waisraeli walerumatsa mṟi iyo iwei mafumvunyipfo sile na fulya fo Hazori fulerumatso nyi Yoshua.

¹⁴ Kyasia Waisraeli wakaduo masaa hose hamu na shuma sha mṟiyo - kyaindi wakawaha wandu wose wa mṟi yo, aledeopfo manya umu.

¹⁵ Iwawaso li nyi Mndumii-Ruwa alewawasa Mose mṟundi oke, nao kawawasia Yoshua nao Yoshua kawewuta ado. Nyi wudo Yoshua alewuta alatehiye manya iwawaso lyose Mndumii-Ruwa awewawasie Mose.

Njoruka tsilewado nyi Yoshua

¹⁶ Kyasia Yoshua nyi alewada oruka lulya lose, luwekeri mafumvunyi, ora lo Negebu, ora lose lo Gosheni, oruka luwekeri mapichinyi ha Araba, mafumvu ha Israeli handu hamu na mapichi hayo.

¹⁷ Ambuya nyi alewada naiwaha wamangi wose wa njorukatso kuwokia fumvu lilawewode kindo lya Halaki kufui na Seiri mṟasa Baalgadi ipichinyi lya Lebanoni, ora lo kyukanyi lo fumvu lya Hermoni.

¹⁸ Yoshua nyi alekapana shida na mangi tsi mfiri sa ifoi.

¹⁹ Kuwode manya mṟi fumu Waisraeli walewikiana mkundano fo ofoṟo nafopfo shile nyi mṟi fulya fo Gibeoni tupu kulyandu wandu wawekekaapfo nyi Wahivi. Waisraeli nyi walewada mṟi iya ingi yose ko ikapana shida.

²⁰ Kii kidi nyi Mndumii-Ruwa amonyi aleumiṟa mrima ya wandu wa kundu wahende irumatso. Na wudo Mndumii-Ruwa alewawasa Mose.

²¹ Yoshua kahenda irumatsa Waanaki wawekekaa fumvu lya Hebroni, Debri, Anabu na walya wawekeri mafumvunyi ha Yuda na Israeli. Kawewarumatsa handu hamu na mṟi iya yawo.

²² Ambuya kuwode mndu o oshari lo Anaki aledeo orukenyi lo Israeli pfo; nyi sa waangu tupu waletsuhaa mṟinyi ya Gaza, Gathi na Ashdodi.

²³ Nyi wudo Yoshua alewada oruka lose sumuhana na shilya shose Mndumii-Ruwa awewawasie Mose. Yoshua kadambikia Waisraeli orukalo kundu luwe lowo wahende iluhawa sumuhana na njoshari tsawo. Nalyo kukawada ofoṟo orukenyi kulakikaesepfo shida.