YONA 4 - Bibilia Kui Mdedie fo Kimochi

Yona asuo kipfa kya wuhoo wo Ruwa

¹ Indi idedoli likasuiṟa Yona mnu, kaichuo nyashi.

² Katerewa Mndumii kahamba ngakuterewa, “Hoi Mndumii; chi wudo njilehamba lilya mbekukerie orukenyi loko? Nkyo kitewe ndedichia Tarshishi, kipfa njiichi ke iyo nyi Ruwa menyi osaṟio, nyi ui mhoo, uwode nyashi ya kitusu pfo, nokeilacha mahiyo na ihooṟia wandu.

³ Wulalu Hoi Mndumii, ngakuterewa, ukunjiwutie moo foko; kipfa nanga inyi ngapfa kota njekaa na moo.”

⁴ Nao Mndumii kamhaluo, “Ngesa! Nowuta kicha ili uiduiko nyi nyashi?”

⁵ Nalyo Yona kakure kulya mṟinyi kahenda ikukaya ora lo ngamenyi lo mṟi fulya, kawikapfo wutengo kadamia wanda ya ria lyakyo, kundu nawone chando kihendeka kya mṟi fulya.

⁶ Mndumii-Ruwa kateseheṟa ishenge, likado likawikia Yona iria, liwike maṟinje huya mdo foke; na imtarama nalawone kechikoṟo nyi mu fo mfiri. Kyasia Yona kachihiyo mnu kipfa kya ishenge.

⁷ Kyaindi mfiri fuleituma koikikia, Ruwa kadika ndoko ikalya ishenge lilya itane lyauma.

⁸ Nalyong'u kiheri kya mfiri mnengeṟi fomedo huye, Ruwa kadika otanu luwuka ora lo ngamenyi lurie ngumia ing'anyi, mnengeṟi fukalasa Yona oo mdohu itane auma, kalanga opfu kahamba, “Nanga ngakupfiia kota ikaa na moo.”

⁹ Ruwa kawesa Yona, “Ngesa nyi nowuta kicha iduiko nyi nyashi kipfa kya ishenge?” Nao kamhaluo, “Ee njiwuta kicha na isuo mtano ngalanga ipfa.”

¹⁰ Mndumii kamhaluo, “Iyo nyi uisaṟia ishenge, ulaleliṟundia kindo, ulaleliwaaya; liledoho ko kio kimu na isaramaya ko kio kimu.

¹¹ Ngesa kiwenjiwaṟi isaṟia Niniwe mṟi fu fu ng'anyi fuwode wandu washike ngoseṟa ya shiku ihana na makumi hawi (120,000), walechiidima itambahaluo kiidi kya owoko lowo lo kulyo ang'u owoko lowo lo kumoso, ngoseṟa kuwode shuuma shifoi mnu?”