YONA 3 - Bibilia Kui Mdedie fo Kimochi

Yona aosha ndumi ya Ruwa

¹ Idedo lya Mndumii likachea Yona lya kawi, lyehamba,

² “Kure, nohende Niniwe, mṟi fulya fung'anyi, uonguopfo mbonyi njechikuwawasia.”

³ Kyasia Yona kakure kahenda Niniwe, chando Mndumii alehamba. Mṟi fo Niniwe fuweng'anyi mnu, fung'anyi hando ochichumia mfiri iṟaṟu.

⁴ Yona kawoka iida na kulya mṟinyi mfiri fumu mfi, kakoṟoṟoma kechihamba, “Kukamsia mfiri makumi haana Niniwe fochirumatso.”

⁵ Nahong'u wandu wa Niniwe wakaidikia Ruwa, wakakapa ombe, ke orio mndu nakuotoe, naṟae nguo tsa makunyia tsii masaṟa wokia ang'anyi itane mtutu.

⁶ Mbonyi tsikashikia Mangi ya Niniwe, nao kawuka loṟikehu loke lo wuitoṟi, kaatuo ṟao lyake, kaṟaa masaṟa, na makunyia, kadamya ifunyi.

⁷ Nao kakapa ombe, kawawasa wandu wa mṟi fose fo Niniwe, kui iwawaso lya Mangi na wachili wake ke wandu wose, na orio mndu, shuma shose, mbe, mburu, machondi, nzoi walalye kando ma inyo mṟinga;

⁸ indi washikio na masaṟa ha makunyia, mndu na shuuma shose wafuhie Ruwa na pfinya tsose, ee da na ihaluka, orio mndu nade mkao foke mmbicho, na mkao iterefutsie yose.

⁹ Nacho aichi ke Ruwa echiluhooṟia madeko hadu nawelusaṟia alechilurumatsa kui nyashi yake?

¹⁰ Ruwa kawona mawuto hawo, ke wandu wadumbuya lohi wakada mkao yawo njiwicho. Nahong'u Ruwa kada kilya kiwicho alehamba awekundi ikiwuta, kailacha mahiyo hake.