YONA 2 - Bibilia Kui Mdedie fo Kimochi

Kiterewo kya Yona

¹ Yona katerewa Mndumii, Ruwa oke, ai ndewunyi ya ikunga lilya,

² “Kahamba, ‘Njilefihiṟia Mndumii kipfa kya ngataṟa yako, Nao kanjiidikia; Ngaterewa njii makidihawi ha ko wapfu, Na iyo koicho ṟu lyako.

³ Kipfa nulenjikumba kundu kuṟungukie, Kiidi kya makidi hawi ha ipalyipalyi; mfu fo mṟinga fukanjitengeta riti; njora tsose masinamu hapfo na mfu ya mṟinga fopfo shileida huyako.

⁴ Na inyi ngahamba, ‘Njimkumbe haleshe na meso hapfo,’ Indi njechiambuya njii sumhana na mba yapfo njele.

⁵ Mṟinga fulenjitengeta, kiidi kya mrima foko. Kulya kuṟungukie kukanjitengeta, Kuṟeṟa ikaoṟowia mdo foko;

⁶ Njilesoka itane ngashika wanda ya mafumvu; Orukalo na ngapo tsalo shilenjioṟowia mlungana; Indi koiria mrima foko fuwuka ṟungunyi, Hoi Mndumii, Ruwa oko,

⁷ Mrima foko fuleuma kiidi kyako, Njilekumbuo Mndumii; Shiterewo shako shilekushikia, Ipfo hekalunyi lyapfo lyele.

⁸ Wandu wekeambuya shindo sha maai na wongo, wekelekana na osaṟio lowo wawenyi;

⁹ Indi inyi njechikuwutia mwaano kui ṟu lyeana; Njechiawutsiaho shaasa shako shose. Okiṟo luwukie ko Mndumii.’”

¹⁰ Mndumii kadeda na ikunga lilya, nalyo likadaika Yona wambaṟa ya ipalyipalyi.