YONA 1 - Bibilia Kui Mdedie fo Kimochi

Yona ahesha idicha Ruwa

¹ Nahong'u mkonu fumu idedo lya Mndumii likachea Yona mana o Amitai, lyehamba,

² Kure nohende Niniwe, mṟi fulya fung'anyi, nofupoṟohoṟie na pfinya, kochiwawasa; kipfa madeko hawo na wunyamaṟi wowo woshika oshangunyi loko.

³ Kyaindi Yona kakure kadichia Tarshishi, kundu nakushowe na oshangu lo Ruwa; kasoka kahenda mṟasa Yafa, adi kakoya wandu wahenda Tarshishi kui ngalawa ya otano, kawuta heleri tsishikie kiheo kewukia Yafa noshike Tarshishi, kadoya ngalawenyi kahendesana na wandu walya wengi Tarshishi, kundu nadiche kyamu kya Ruwa.

Yona asutso nyi wandu wa mkambo ingi

⁴ Indi Ruwa kadika otanu sa lwapfinya kulya ipalyipalyinyi, kukaamka kiwiriwiri king'anyi mṟinga fukafohika mnu, ngalawa iya ikawa cha ili ikundi ifunjika.

⁵ Walya weduo ngalawa iya wakaowuo wose, na walya wa kyaṟo handu hamu, orio mndu katerewa ruwa oke; wakakumba nzohoṟa tsilya kulya ipalyipalyinyi kulako wulemeri wochianguoanguo. Kyaindi Yona nawesokie kakaa kulya kiidi kya ngalawa iya kalaa mado.

⁶ Umu o walya weduo ngalawa iya kamkoya kambesa, “Nkiki kikuwode, Iyo ili olaa mado? Kure, noterewe ruwa opfo; kofia ruwacho nelukumbuo lulawone loisaramaya.”

⁷ Wakawiana orio mndu na odoe, luwike kuṟu kuhya, luwuteho imanya mawichoha haendo nyi u. Wakakapa kuṟu kuhya, kuṟu kuhya iya ikakoya Yona.

⁸ Naho wakambia, “Keluwie, ishi shose shalukooya kipfa kyapfo; iṟunda lyapfo nlyiki? Iyo nku uwukie? Oṟuka lopfo luhya na iyo nyi o kishari kihya?”

⁹ Kawawia, “Inyi nyi Mwebrania; na inyi njiidikie Mndumii-Ruwa na ikumsiria Ruwa o Ruwehu, awumbie handu ha hadutsu na ipalyipalyi.”

¹⁰ Wandu walya wakahoyo nyi wuowu wung'anyi mnu, wakambesa, “Nkiki iki owuta! Kipfa wandu walya walemanya ke naledicha oshangu lo Ruwa, kipfa awemewawia.

¹¹ Wakawuya wakambesa-se, Lukauwutie luda kundu ipalyipalyi lyitsie? Kipfa ipalyipalyi lileengeṟa ifohika na otanu lukaengeṟa ikuma.”

¹² Nao kawawia njiirenyi munjikumbe ipalyipalyinyi, “Otanu lu lochitsia; kipfa njiichi ke ishi shose shawutika kipfa kyako.”

¹³ Indi wandu walya wakatambahana mnu na pfinya kulako wechiidima iwuya na wambaṟa ya ipalyipalyi walaidime kipfa ipalyipalyi lileengeṟa ifohika mnu

¹⁴ Wakaterewa Mndumii wakahamba, “Lokuterewa iyo Mndumii, lokuterewa, lulaarisike kipfa kya moo fo mndu-chu umu, manya ulawuwuye samu yake ilawode mti, kipfa iyo Mndumii nyowuta chando uwekundi.”

¹⁵ Nahong'u wakawada Yona, wakamkumba kulya ipalyipalyinyi, oweṟe cha ili otanu lukahusa na masinanu hakatsia kukaho olele wyoo.

¹⁶ Wandu walya wose wakaowuo mnu Mndumii, wakawutia Mndumii mwaano na iwikaho shaasa.

¹⁷ Mndumii kateseheṟa ikunga ling'anyi kundu limeṟe Yona, nao Yona kakaa ndewunyi ya ikunga lilya mkonu iṟaṟu kio na mfiri.