YOHANE 9 - Bibilia Kui Mdedie fo Kimochi

¹ Na ili Yesu aweiida kawona mndu apfie meso kui ifeo.

² Na walya wa kiloshyonyi wakambesa, “Alewo Mwaria, mndu anyamaṟyeho nyi uhya, nyio ichu a nyi wafee wake ili alewoneka ado ai mpfu meso?”

³ Yesu kahalwo, “Ma chi ichu ma chi wafee wakepfo. Kya indi nyi kilewa kido kundu pfinya Ruwa iwono yechiṟunda ipfo koke.

⁴ Kui na sa kiluwaṟi luṟunde maṟunda na ichu anjidumye; kipfa kio kiicha kiheri mndu elechiidima iṟunda maṟunda.

⁵ Mandi njikeri kunu wuyana njii sa ya wuyana.”

⁶ Kyekihamba ado kapuchya mada ipfo wanda, mada halya kawumbawumba naho mbumba fo teri. Mbumba fulya fo teri kafushia kulya mesonyi ha mpfu meso.

⁷ Kambia, “Kehenda kusanje kulya nduwenyi ya Siloamu.” (Kohalwo nyi kimu na “Mndu mdume.”) Nao mpfu meso ulya kakuhendya-pfo kakusanja, adi kawuya kechiambwo.

⁸ Kyasia walya wamṟasa wake na walya walembona lya awei maliomba wakahamba, “A lae ichu chi mkiwa ulya echidamya kawa maliomba?”

⁹ Wengi wakahamba, “Chiopfo lang'u.” Wengi wakahamba, “Ote nyi mndu afananyi nao.” Nao kahamba, “Ee nyio inyi da.”

¹⁰ Nahong'u wakambia, “A meso hapfo nyi wuda halewuya itambaṟuka?”

¹¹ Nao kahalwo, “Nyi mndu ulya alaho nyi Yesu o amewumba mbumba fo teri kafushia aa mesonyi hako kanjiwia, ‘Henda samba kulya nduwenyi ya Siloamu.’ Nalyo ngamhenda, ngasamba ngaidima iambuo.”

¹² Wakambia, “A mndu chu nyi ku aya?” Kahamba, “Njichinyi.”

Isuma mbonyi chandu kipfufuṟe alechiṟo

¹³ Nalyo wakahenda iduo mndu ulya awei kipfupfure kulya ko Wafarisayo.

¹⁴ Na mfiri-pfo Yesu alewumbawumba teri nyi mkonu fo Sabato katambaṟuo meso halya hake.

¹⁵ Kyasia Wafarisayo nawo da wakambesa-se, “Kuleambuo kuda?” Nao kawawia, “Nyi aleshia mbumba fo teri aa mesonyi, ngamhenda isamba ngakoya-ng'u yambwo.”

¹⁶ Nahong'u Wafarisayo maata-ho wakahamba, “Mndu chu awukie ko Ruwapfo kyamba ada alaindya Sabato.” Wengi wakahamba, “A mndu mnyamaṟi naidime iwuta ado ṟiho tsa mbaṟi ii ngesa?” Kyasiang'u wakadumbukana kawi.

¹⁷ Wakawuya wakawia-se kipfupfuṟe ulya, “A iyo kyake nohamba kuda ili akuambuṟye meso?” Nao kahamba, “Nyi akeri mwikimbi.”

¹⁸ Nahong'u wasongoru wa Wayuda walya walaidikye kyake ke nyi awepfie meso kawuya yambwo. Wakatana walaha wafee wa mndu ulya alekoya yambwo.

¹⁹ Wakawawesa wakahamba, “Ichu na mana onu ulya mochekehamba nyi amfee ai mpfu meso? Aka nyi wuda alewiko ili aambuo wulalu?”

²⁰ Wafee wake wakahalwo wakahamba, “Nawo luweichi nyi ai mana odu na ifeo nawei mfee ai mpfu meso.

²¹ Kya indi kundo aendye wuamburu wu kyakyo lokimanyasepfo ma mndu cho alemwambuṟa meso lumwichipfo. Kekumbesyenyi amonyi atoṟikye nechekudedya kyake amonyi!”

²² Na kyaenenga wafee walya wakadeda wado nyi waleowuo wasongoru walya wa Wayuda. Kyamba Wayuda walya wawemmaa ideda kyama kyawo ke kokoya mndu echimhamba na pata ke nyio Kristo nawo wambute siṟinyi yawo.

²³ Nkyo kiletewa wafee wake wakahamba, “Nyi atoṟikye, kembesenyi o amonyi!”

²⁴ Nahong'u wakawuya wakalaha-se mndu ulya awei kipfupfuṟe wakambia, “Hamba lohi oshangunyi lo Ruwa. Kya mndu chu luichi ke nyi akeri mnyamaṟi.”

²⁵ Nahong'u mndu ulya kahalwo, “Koka nyi ai mnyamaṟi kyakyo njiichi-pfo. Na kimu tupu njiichi ke mbei kipfupfuṟe ngawuya yambwo wulalu.”

²⁶ Wakambia, “A ngesa nyi alekuwika ada? Kakuambuṟa ada meso ho?”

²⁷ Mnducho kawahalwo, “A ili ngamembia-se nanyo mulaadanye. Nyi kya ki-se mukundi ikiicho lya kawi. Ngesa nanyo na mbekundi imhalukya muwe wa kiloshyonyi kyake?”

²⁸ Wakamruma wakahamba, “Mndu o kiloshyonyi kyake na iyo. So lui wa kiloshyonyi kya Mose.

²⁹ Kya Mose nyi luichi ke Ruwa alededa nao. Kya indi mndu chu lumwichi o kupfo!”

³⁰ Mndu ulya kahalwo kawawia, “Iki nyi kindo kya kiṟiha ili mulaichi ke nyi o ku, nao alenjiambuṟa meso ha hako.

³¹ So nyi luichi ke Ruwa echiadanya wandu wanyamaṟipfo. Na msa aowoye Ruwa kawuta shilya shimchihie nyio ekyemwadanya.

³² Wokya mawokenyi ha wuyana kulemewonekye mndu aambuṟye meso ha mndu a mfee ai kipfupfuṟe-pfo.

³³ Kima chila mndu chu awei o ko Ruwa aweidima iwuta kindo-pfo.”

³⁴ Nawo wakambia, “A iyo ui mfee kudo ui mnyamaṟi kotana olulosha so?” Nawo wakamtuhuta na nja.

Kipfupfuṟe wo kimrima

³⁵ Kyasia Yesu kaicho ke nyi wamtuhutye na nja. Kekimkumbuhana kambia, “Uidikye Mana chu o mndu ngesa?”

³⁶ Nao kahalwo kahamba, “A nyi o wu Mndumii na inyi njikekumwidikya-ng'u.”

³⁷ Yesu kambia, “Iwona omembona, na ichu aipfo adeda na iyo nyio.”

³⁸ Nao kahamba, “Akawo ngakuidikya hoi Mndumii!” Kakuhutsa wanda na kyamu oo madendeny hake.

³⁹ Na Yesu kahamba, “Inyi kindo njikucheye na kunu wuyana nyi ianduya, iwa walawonyi kundu wakoye iwona, na iwa wawonyi kundu wawe shipfupfuṟe.”

⁴⁰ Wafarisayo maata-ho warianyi nao waicho wado wakambesa, “Ngesa naso lui wapfu meso?”

⁴¹ Yesu kawawia, “Kima mbei wapfu meso muwewa wanyamaṟipfo. Kya indi wulalu momhamba, ‘So nyi lui waamburu,’ na ikyo kyaloṟa mui wanyamaṟi.”