YOHANE 8 - Bibilia Kui Mdedie fo Kimochi

¹ Nahong'u Yesu kahenda kulya fumvunyi lya mtsinepfu.

² Ili lya ngama ngamenyi kaida-se na ipfo hekalunyi Wandu waipfo wose wakamwosha, nao kadamya-pfo kechiwalosha.

³ Nahong'u Walaanyi wa shitapu na Wafarisayo wakaende napfo mka amtumukyo wuṟuhuinyi. Wakamhoṟotsa oo makiidi hawi.

⁴ Wakawesa Yesu, “Alewo Maaria, Mka chu amtumukyo wuhuṟuinyi.

⁵ Mose aluwawasye ipfo Wuwawasonyi wodu kya waka wa mbaṟi ii ke lowakapa na maho. Na iyo nyi ohamba kuda kya iki ngesa?”

⁶ Kyainenga wadeda wadi nyi ili wakundi imhesha wawone kitewe kyemkumba. Na Yesu kakuaramya wanda kechiṟehia na kimnyo ipfo teri-hu.

⁷ Naho ili waleisima imbesa kahoṟoka kawawia, “Ichu onu alai na mti o naase imkapa na iho.”

⁸ Nahong'u kawuya kakuaramya-se lingi wanda kechiṟehya teri-hu.

⁹ Nawo wamicho wado wakawoka ituṟuka-ho umu umu wakawokia na wameku wakatana wasia-ho. Na Yesu kadeo-pfo amonyi na mka ulya ahoṟoki oo kiidi.

¹⁰ Nahong'u Yesu kekihoṟoka kawesa mka ulya, “Nyiku waya wandu walya? Kokaa-pfo ma umu akuwutya kya mti fulya?”

¹¹ Mka ulya kahamba, “Ma umupfo, Mndumii.” Nahong'u Yesu kambia, “Manya inyi njikuwonya kya mti fulyapfo. Kuhendye. Kowuka-ho dumbuya teṟe, ulakinyamaṟe-se.”]

Yesu saa ya Wuyana

¹² Nahong'u Yesu kawuya kadeda nawo lingi kahamba, “Inyi nyi sa ya wuyana. Mndu anjilatya nakihenda-se memenyipfo. Nechikaa ai na sa yende moo.”

¹³ Nahong'u Wafarisayo wakambia, “Iyo nyi okuṟingishya kyapfo kumonyi. Kiṟingishyo kyo kyapfo kii kya lohipfo.”

¹⁴ Yesu kahalwo kawawia, “Na kokoya ngakuṟingishya kyako njimonyi, kiṟingishyo kyako na kii kya lohi da nyi kipfa njiichi kundo njiwukye na kundo njihenda. Indi nyo mulaichi ma kundo njiwukye ma kundo njihenda.

¹⁵ Nyo mokedumbwo mochiambuya fana ya nja, indi inyi njidumbwo kya mndupfo.

¹⁶ Na kokoya ngadumbwo kya mndu mdumbuye foko nyi fo sungusihu fowa fuichi kimaenyi cha kipfa njilaiho njimonyi. Wande-chu alenjiduma nai na inyi.

¹⁷ Ma ipfo wuwawasonyi wonu nyi kii-kiṟehye kehamba, ke kiṟingishyo kii-kiwike nyi wandu wawi nyi kya lohi.

¹⁸ Nyio inyi njii mṟingishi njikuṟingishya kyako chando kii, na wandechu alenjiduma kaṟingishya kyako da.”

¹⁹ Nahong'u wakambia, “Wande chu opfo nyi ku aya?” Yesu kahalwo, “Inyi munjiichipfo ma Wande mumwichi-pfo. Kima muwenjiichi inyi na Wande oko na muwemmanya da.”

²⁰ Nyiho madedo Yesu alededa ipfo kiṟihenyi hando njosano tsekeambyo kechilosha wandu ipfo Hekalunyi. Ma kulakaepfo mndu ambada cha kipfa kiheri kyake kilawemeshikye.

Kundu njihenda mochiidima ishikaho-pfo

²¹ Yesu kawuya kawawia lingi, “Inyi njikuhendya nanyo mochinjipfula. Na mochikupfia ipfo wunyamarinyi wonu. Kundo kulya inyi njikuhendya nyo mochiidima ishika-ho pfo.”

²² Wasongoru wa Wayuda wakahamba, “Kulako akundi ikuwaha Nki ili ahamba ke kundo kulya njikuhendya mochiidima ishika-ho nyopfo?”

²³ Yesu kawawia, “Nyo nyi kunu wuyana mupaṟikye, inyi kipaṟika kyako nyi kulya huye. Nyo mui wandu wa wuyana, inyi chi o wuyanapfo.

²⁴ Nkyo kitewe ngamuwia-ng'u, Nyi ipfo wunyamaṟinyi wonu kundo mukeri mpfondo mochikupfia. Kyamba kokoya mulechiidikya kye, ‘Inyi nyio.’ Na ipfo wunyamaṟinyi wonu kundo mukeri mpfondo mochikupfia.”

²⁵ Nawo wakambia, “Alewo iyo o ku ngesa?” Yesu kawawia, “Njilemuwia wokia o, ke kilya njideda nanyo idumbwo kyanu njileicho.

²⁶ Njiwode shifoi shededa kyanu na idumbwo kyanu. Kya indi ichu alenjiduma akeri menyi-wukilohi, na inyi shilya njileicho shiwuka koke nsho njiiwia wa wuyana.”

²⁷ Nawo ma walamanye ke aideda nawo kii kya Wande.

²⁸ Nahong'u Yesu kahamba, “Mukamshika iiria Mana chu o mndu mpfondo mochimanya ke, ‘Inyi nyio;’ na imanya ke njiwode kindo ngiwuta ki kya chila yako njimonyi-pfo kyaindi ikyo Wande alenjilosha nkyo njihamba.

²⁹ Na ichu alenjiduma nyi ahendesanyi na inyi. Ma anjida njikae njimonyi-pfo kipfa nyi njiwuta shichihianyi nao mfiri yose.”

³⁰ Kyekimaa ideda ado wandu wafoi wakamwidikia.

Wukiilohi wochimwinenga mkuachie

³¹ Nahong'u Yesu kadeda na Wayuda walya wamwidikye kahamba, “Kokoya mokaa mukuwode na dedo lyako lyo-ng'u mochiwa wa kiloshyonyi kyako wa lohi.

³² Na imanya mochimanya wukilohi wu, na wukilohi wu wochimwashwo muwe wenyi-mkuachie.”

³³ Nawo wakamhalwo, “So lui luwa lya Abrahamu, lulandewe masinga ha mndu ma indipfo. Kyawa kida ili ohamba, Muwe wenyimkuachie?”

³⁴ Yesu kawahalwo, “Nyi lohi kya lohi ngamuwia, orio mndu mowuta wunyamaṟi akeri isinga lyesingya wunyamaṟi.

³⁵ Isinga lyekyekaa na menyi ipfo kanyi kiheri kyosepfo. Mndu mokaa kanyi kiheri kyose nyi Mana.

³⁶ Kokoya ichu ai Mana echimwashwo lyo-ng'u mochiwa wenyi-mkuachie.

³⁷ Njiweichi da nyi mukeri luwa lya Abrahamu. Kya indi nyi mukundi injiwaha kipfa muladikia idedo lyako.

³⁸ Inyi kilya njiwonyi ipfo ko Wande nkyo njikeri ihamba. Nanyo kilya momicho kiwukye ko ndeanu nkyo muiwuta.”

³⁹ Wakahalwo wakambia, “Ndeyadu nyio Abrahamu.” Yesu kawawia, “Kokoya muwei wana wa Abrahamu nyi muwewuta chandu Abrahamu alewuta.

⁴⁰ Inyi ngamuwia wukiilohi njilewuicho ko Ruwa; na ma kudo mukundi injiwaha. O Abrahamu alewika adipfo!

⁴¹ Nyo nyi mokewuta mawuto halya halya ha waku wanu walewuta.” Wakambia, “Chi lui-wafee wa njapfo. So luwode Wande umu da nao nyio Ruwa.”

⁴² Yesu kawawia, “Ukoye Ruwa awei Ndeyanu nyi muwenjikunda inyi kyamba inyi njilecha njiwuka ko Ruwa na wulalu njikeri iya. Njilecha kui kyama kyako inyi njimonypfo. Ruwa alenjiduma.

⁴³ A kimaduma nyi ki ili mulamanya mdedye foko? Manya mulaidima yadanya idedo li lyako.

⁴⁴ Nyo mui wana wa Mkumbi ulya onu, na mukundi iwuta lango tsa ndeanu. Na ishi shilango nyi Nde chu onyu nyisho mukundi ishiwuta. O awekeri mbahi, mowaha wandu wokia mawokyonyi; alakuwode wukilohi-hu ma hanga, kipfa wukilohi wulai nao. Ilindi adeda kii wongo kyo kii kyake akiende kii kya chure yake amonyi kipfa akeri mowongo kawa nyio mku mopaṟa shi wongo shose.

⁴⁵ Kya indi inyi njekehamba wukilohi wu nkyo kyaima mulanjiidikye.

⁴⁶ A le nyi wu o kunu konu aidima injiwonya mti fo kindo njiwenyamaṟye? Na kokoya ngahamba wukilohi wu, kitewe mulanjidikye nyi iki ngesa?

⁴⁷ Ichu apaṟikye ko Ruwa o nekeadanya madedo ha Ruwa. Nanyo muinjiadanyiapfo kipfa nyo chi wana wa Ruwapfo.”

Yesu naweipfo Abrahamu alamekaapfo

⁴⁸ Wayuda walya wakahalwo wakambia, “Chi lohamba kya lohi ke ukeri Msamaria uwodo nyi oṟuṟe?”

⁴⁹ Yesu kahalwo, “Inyi njiwodo nyi oṟuṟe manyalepfo. Inyi njiwikya Wande oko kiṟumi kya indi nyo muidetsa kilya kii kyako.

⁵⁰ Manya njipfula iwada kiṟumi kyakopfo. Na kwipfo umu mokiringa, nao nyi modumbuo mondu.

⁵¹ Nyi lohi kya lohi ngamuwia, Mndu awada madedoho hako echipfa ma indiipfo.”

⁵² Wayuda walya wakambia, “Wulalu lomanyang'u ke uwodo oṟuṟe! Abrahamu nalepfa na waikimbi wakawepfo da; na iyo kohamba, ‘Ichu echikuwada na idedo lyapfo echipfa ma indipfo.

⁵³ Akawo iyo ui mnene kong'anya mku odu Abrahamu ngesa, nao nyi alewepfa? Na waikimbi walya wakawepfa da. Nyi okutana cha wu iyo kumonyi ngesa?’”

⁵⁴ Yesu kahalwo, “Kokoya ngakung'anyisha njimonyi mng'ano foko fuwechiwa kindopfo. Wande chu oko mochekehamba nyio Ndeanu nyio ainjing'anyisha.

⁵⁵ Ma mulalememmanye. Kyaindi inyi njimwichi. Kokoya ngahamba njimwichipfo nyi njiwechiwa mowongo chanyo. Kya indi njimwichi na idedo lii lyake lyo njiliringa.

⁵⁶ Abrahamu mku chu onu nyi alekesa kya iwona mkonu fu foko nao kafuwona kachihio.”

⁵⁷ Nahong'u Wayuda walya wakambia, “Alewo iyo omshitsa ma maka makumi hatanu-pfo, kohamba nyi kulewona Abrahamu?”

⁵⁸ Yesu kawawia, “Nyi lohi kya lohi ngamuwia, Mandi Abrahamu alawemefeo inyi njiwei-pfo.”

⁵⁹ Nahong'u Wayuda walya wakaira maho wamkumbye. Nao Yesu kasheṟuka kawuka ipfo hekalunyi.