YOHANE 7 - Bibilia Kui Mdedie fo Kimochi

¹ Nahong'u ili numa numa Yesu naweida kulya Galilaya. Kyamba alalekunda itengeta kulya Yudaya kipfa wasongoru wa Wayuda wawekundi imbaha.

² Na Mkonu mnene fo Wayuda fomanya Matengo iwei kufui.

³ Nahong'u wanawamae wakambia, “Kure kunu nohende ishika kulya Yerusalemu kundu na wa kiloshyonyi kyapfo wawone ngata tsi tsapfo otana.

⁴ Kyamba kwipfo mndu etana kindo kiṟika namanyikye isangenyi-pfo. Kokoya owuta shindo shii shidi henda kuloṟe-ng'u na wuyana wu.” (

⁵ Kyamba ma wanawamae wawememwidikie-pfo.)

⁶ Nahong'u Yesu kawawia, “Kiheri kyako kyamshikapfo. Indi nyo kiheri kii kyanu kyo kihianyi na mkonu yose.

⁷ Ma wuyana wu woidima imusuo nyopfo. Indi inyi wanjisuo kipfa kya kiṟingishyo kyako njiwikye kimaduma kyawo njihamba ke mawuto hawo hai mawicho.

⁸ Nyo kudoyenyi na kulya mkonu ii mnene. Inyi njihenda ido napfo mkonu yo mnenepfo kipfa heri lyako lilandeshika ihoya.”

⁹ Amdeda nawo ado o amonyi kakaa kulya Galilaya.

Yesu ai Mfirinyi mnene fo Matengo

¹⁰ Kyasia wanawamae wamedo napfo kya mkonu iya mnene iipfo nao Yesu kawedo napfo kyaṟo kilawei kya pata.

¹¹ Wasongoru wa Wayuda walya wakawa wempfula-pfula ili lya mkonu iya mnene wakahamba, “Alewo o nyiku-aya ngesa?”

¹² Na wandu walya wafoi waweiho wakachila mnu kyake. Walya maata wakahamba, “O ai mcha wyo.” Maata wakahamba, “Ote nyi adekesha wandu.”

¹³ Ma kudo kulakae-pfo mndu adeda kyake na pata kipfa nyi waowoye wasongoru walya wa Wayuda.

¹⁴ Nahong'u mkonu iya mnene ishikie kyenga Yesu kahenda kulya hekalunyi kadamia-ho echilosha wandu.

¹⁵ Nahong'u Wayuda walya wakaṟihio wakahamba, “A mndu chu nyi wuda aichi mapfundo nao alalesoma shule?”

¹⁶ Nahong'u Yesu kawahalwo kahamba, “Mloshye yo yako njilosha nayo chi yako inyipfo kya indi nyi ya ichu alenjiduma.

¹⁷ Mndu akundi iṟunda shilya Ruwa akundi nyio echimanya kya mloshye yo yako kokoya nyi ipfo ko Ruwa iwukye ang'u kokoya nyi ngadeda kiwukye koko inyi njimonyi.

¹⁸ Ichu ekyekuhambia kyake tupu o apfula iwikyo kiṟumi o amonyi. Indi mndu atambahanya iwonya ichu alemduma kiṟumi o akeri mhendeli alawode mtaambo, o lohi.

¹⁹ Alewo chio Mose amunengye wuwawaso? Na kunu kiidi kyanu kuipfo ma umu aiindia wuwawaso wupfo. Kimaduma nyi ki ili mukundi injiwaha?”

²⁰ Wandu walya wakuwumbie-ho wakahalwo. “Nyi uisuko! Nyiwu akundi ikuwaha?”

²¹ Yesu kahalwo kawawia, “Nyi ngata imu njiletana nanyo mukaṟihio kyayo.

²² Mose nyi amwinengye mṟumo fo odino, Ma chi ipfo ko Mose fuwukyepfo kya indi nyi ipfo ko waku walya. Nanyo mokedina mndu na mkonu fo Sabato.

²³ Kyasia kokoya mndu naidino ili lya Sabato kundu wuwawaso wo Mose wulahende itahachyo nkili monjiwadya nyashi ili njilechiṟa mndu pyu mkonu fo Sabato?

²⁴ Mulawone modumbwo mondu mochiadanya ora lumu. Dumbwonyi mdumbuye fo sungusihu.”

Alae ichu nyi Mesia?

²⁵ Nahong'u wandu maata wa kulya Yerusalemu wakahamba, “Alewo chio ichu wawempfulya mweke fombaha?

²⁶ Ambuyenyi! Nyi aiwaikimba na pata walambie ma kindo. Kulako wasongoru walemanya ke nyio Kristo ngesa?

²⁷ Kya indi mndu chu nyi lumwichi kundu awukye, na kiheri Kristo echicha kwipfo mndu echimanya kundo echichapfo. Kyaindi so luichi kundu awukie.”

²⁸ Lyo likaenenga Yesu ipfo hekalunyi kundo ailosha kaira ṟu kahamba, “Ee-da na muwenjiichi na kundo njiwukye na muweichi da. Na inyi njicheye kui chila yako njimonyipfo. Kwipfo mokilohi alenjiduma, nao ma mulamwichi nyo.

²⁹ Inyi njimwichi, kyamba nyi ipfo koke njiwukye nao nyi anjidumye.”

³⁰ Nahong'u wakawa wepfula mweke fombada mondu, ma kulakae-pfo mndu alekaria imleshia owokonyi kipfa kiheri kyake kilawemshike.

³¹ Nahong'u ipfo maminginyi fo wandu wafoi-ho wakawuta-ho imwidikya o, wakahamba, “Kiheri Kristo echicha a nechiwika shichano shing'anyie iishi ichu alewika ngesa?”

Waringi wadumo iwada Yesu

³² Wafarisayo wakaicho wandu waideda kya Yesu shiwehewehe shidi naho wakohanyi walya wang'anyi na Wafarisayo wakasangana wakaduma wasoṟo wawo wahende imbada.

³³ Yesu kahamba, “Nyi kiheri sa kyangu njitsinda-se nanyo njihende ko ichu alenjiduma.

³⁴ Mochinjiwalya mulechinjikoya. Kyamba kundo inyi njechikaa moidima ishika-ho nyopfo.”

³⁵ Nahong'u Wasongoru wa Wayuda walya wakadeda wo wenyi na wenyi, “Akawo mndu chu nyi hanga aihenda napfo naso lude lulamkoya-se? Kulako akunda ishika ko Wayuda walya wanyanyaṟikye ipfo masangenyi ha Wagriki nahendelosha-pfo Wagriki wo?

³⁶ Kimaduma nkiki ili ahamba, mochinjiwalya mulechinjikoya na ipfo kundo inyi njechikaa moidima ishika-ho nyopfo?”

Meda ya mṟinga fuwode moo

³⁷ Naho ili komshika mkonu fulya mnene foimarisya nafo fui mtoṟu kota ingi Yesu kahoṟoka-ho kaira ṟu ling'anyi kahamba, “Kokoya kwiho mndu awodo nyoda nakucheye na koko nache inyo.

³⁸ Mndu kanjiidikya inyi kyake kyechiwa chando kiikiṟehye kehamba, ke mndu chu ipfo mrimenyi foke kochisoka-pfo meda ya mra fo mṟinga fuwode moo.”

³⁹ Nakyo nyi alededa kya macheyenyi ha fo Mumuyo Mwele, fulya wandu wamwidikye wekaa wafuambie. Kyamba mandi halya Mumuyo Mwele fulawemsoke kipfa Yesu alawemeng'anyisho.

Mpaṟakano fo wandu kya mbonyi tsa Yesu

⁴⁰ Wandu maata wa ipfo maminginyi fo wandu wekiicho adeda adi wakahamba, “Ichu nyi lohi ai mwikimbi ulya.”

⁴¹ Wengi wakahamba, “Ichu nyio Kristo.” Wengi wakahamba, “Alewo Kristo nawukye kulya Galilaya?

⁴² Maṟeho Maele hahambieki? Hahambye, ke Kristo echicha awukye kisharinyi kya Dawidi,” na echifeo ipfo Betlehemu ipfo mṟinyi fo Dawidi.

⁴³ Nahong'u mamingi fulya fo wandu fukadumbukana kawi kimaduma kyake.

⁴⁴ Kukawekaa-pfo wandu wangu wakundi imbada indi kulakaepfo mombada.

Wasongoru wa Wayuda walawode iidikia

⁴⁵ Nahong'u wasoṟo walya wadume wakawuya na kulya ko wakohanyi wanene na Wafarisayo. Nawo wakawawia, “A nyi ki kyaima mulamwende?”

⁴⁶ Wasoṟo walya wakahalwo, “Kulandewoneke msa adeda cha mndu chupfo.”

⁴⁷ Wafarisayo wakawahalwo, “Nanyo namuiwatandawushe?

⁴⁸ Mlemewona mndu msongoru ma umu tupu amemwidikya ang'u o ipfo ko Wafarisayo?

⁴⁹ Kya indi moṟimboho fu fo wandu fulaichi wuwawaso, wo Mose; wai wasese!”

⁵⁰ Umu-ho nyi Nikodemo ulya alesahya Yesu kacha, nao nyi o ipfo kiidi kyawo kawawia.

⁵¹ “Alewo wuwawaso wu luwode nyi wokewonya mndu owingo kulawode nyi ammaa yadanyo komeshika itichyo kilya kyake aletana ngesa?”

⁵² Nawo wakahalwo wakambia, “Kulako na iyo nyi uwukye kulya Galilaya? Suma Maṟehyo Maele teṟe nomanye, ke kulya Galilaya kochikure-pfo mwikimbi manyale-pfo.” [

⁵³ Wakahenda orio mndu na kanyi koke.