YOHANE 6 - Bibilia Kui Mdedie fo Kimochi

¹ Kyasia ili numa Yesu kahenda yambada nduwa ya Galilaya (ilaho ya Tiberia) kaambadya kya kulya molyolya.

² Mamingi fung'anyi fo wandu wakamwosha kipfa ili wandu wo walewona ṟiho alewuta tsechiṟa wandu waluo.

³ Yesu kahenda ido na kundo ko fumvu-hu wakadamya-ho wo na wa kiloshyonyi kyake.

⁴ Na mkonu fulya mnene fo Wayuda fulya fo Pasaka nyi kufui fuhoye.

⁵ Nahong'u Yesu kekiirya meso hake kekiwona mamingi fung'anyi fochikuchea na alyando ai nao kawia Filipo, “A kundo lochihuṟa mkate fo wandu wa wakulie nyi ku ngesa?” (

⁶ Nao kehamba ado nyi kyeseenga Filipo cha kipfa nyi aweichi kindo arie iwuta.)

⁷ Filipo kamhalwo, “Kyakyo ma mkate fo shilingi (dinari) mahana hawi fochiwashika mndu nawone-ho ma kipeṟengupfo.”

⁸ Umu o wa kiloshyonyi kyake ewio rina lyake nyi Andrea ai manomae o Simon Petro kambia.

⁹ “Kunu nyi kuwode manake awode mkate ya ngano itanu na makunga hawi. Kyechiwiko cha iki wandu wamfo wado?”

¹⁰ Yesu kahamba, “Damiṟenyi wandu wo wadamye wanda.” Napfo nyi kuwewode-pfo maṟa hafoi. Nahong'u wasoṟo walya wakadamya wanda washikye cha shiku shitanu.

¹¹ Naho Yesu kawada mkate iya kaidapfuma Ruwa kahawya wandu walya wadamye, na mkunga halya kawewahawya chando wakundi.

¹² Wekiidima ikuihudya Yesu kawia walya wa kiloshyonyi kyake, “Doduonyi-ho shipeṟengu sho shitsihee-ho shiladekye wanda.”

¹³ Wakadodwo-ho shipeṟengusho sha mkate shiletsuha wandu wamlya wakaichuṟa shikunja ikumi na shiwi.

¹⁴ Kyasia wandu wekiwona ṟiho lilya Yesu awuta wakahamba, “Nyi kya lohi ichu nyi akeri mwikimbi ulya aimteṟye nache kunu wuyana.”

¹⁵ Kyasia Yesu kekimanya nyi icha wai wache wahende imbika mangi nao kasheṟuka, kahenda alya fumvu-hu o amonyi.

Yesu achumia huya mṟinga

¹⁶ Kyasia ili kyukanyi wa kiloshyonyi kyake wakasoka na kulya mawambao ha nduwa.

¹⁷ Wakado alya ngalawehu, wakahenda yambadya kya kulya Kapernaumu. Na mema fuhoye-pfo na Yesu alawemewakoye.

¹⁸ Na nduwa iya ikahalukahaluka mnu masinanu otanu lochiida-ho sa lung'anyi.

¹⁹ Naho ili wa kiloshionyi wammaa ihendesho na ngalawa iya mhendo fo saa imu ang'u kufui nayo (kilometa 5-6) nalyo wakawona Yesu kyechichumia huya mṟinga, amshika kufui na ngalawa iya wakaangalala.

²⁰ Yesu kawawia, “Nyio inyi, ma mulaowuo.”

²¹ Nawo wakakunda imdosya ipfo ngalaweny. Nalyo liyenyi wakakoya ngalawa yamshika alya ohambe-hu lo oruka lulya kundo waihenda.

Wandu waipfula Yesu

²² Nahong'u ili lya ngama mamingi fulya fo wandu walya waledeo wahoṟoki kulya molyolya ya nduwa iya wakakoya ke kwipfo-se ngalawa ingipfo shile iya imu iweipfo na Yesu alesangana na wa kiloshyonyi kyake ido nawo alya ngalawe-hupfo. Nyi walya wa kiloshyonyi kyake walehenda wo wawenyi.

²³ Kyasia kukacha napfo ngalawa tsingi tsiwuka kulya Tiberia tsikashika kufui na alya ndo walelia mkate iya Mndumii ammaa iadapfuma Ruwa.

²⁴ Nahong'u mamingi fulya fo wandu ili wakoya Yesu nalaiho manya wa kiloshyonyi kyake wakahenda ido alya ngalawehu tsilya wakashika kulya Kapernaumu, wechimpfula.

Yesu mkate fo moo

²⁵ Nawo ili walemkoya alya ohambe-hu lulya lungi lo nduwa wakambia, “Maaria a nyi indi omshika kunu?”

²⁶ Yesu kawahalwo kahamba, “Nyi lohi kya lohi ngamuwia, Kyamwenenga monjiwalya chi maṟiho halya mulewonapfo, nyi kimaduma kya mkate iya mulelya mukaihuda.

²⁷ Mlawinyie kelya kyechipuo; winyienyi kelya kyechikaa kipfa kya moo fo mlungana nakyo nyi Mana chu o mndu echimwenenga. Kyamba Wande nyio Ruwa nyi alembikya mhuri yemṟingishya ke nyio.”

²⁸ Nawo wakambia, “Alewo luwike luda lukoye itana maṟunda ha Ruwa?”

²⁹ Yesu kahalwo kawawia, “Iṟunda lilya liwawaso nyi Ruwa aili, ke kundu muhende iidikya ichu alemduma.”

³⁰ Nahong'u wakambia, “A nyi kiki otana kyeluloṟa kichano so lukiwone luwute-ho ikuidikya iyo. Nyi owika-pfo kuda ngesa?

³¹ Waku walya wadu wo walelya Manna kulya olelenyi lulya chando ki-kiṟehye kehamba, Alewaenenga mkate folya fuwukye ruwehu.”

³² Nahong'u Yesu kawawia, “Nyi lohi kya lohi ngamuwia, Chi Mose amuinengye mkate fu fuwukye ipfo ruwehupfo. Nyio Wande oko amuenenga mkate fu fo lohi fuwukye ruwehu.

³³ Kyamba mkate fu fui fo Ruwa nyio ichu asoke ruwehu kechienenga wuyana wu moo.”

³⁴ Nahong'u wakambia, “Hoo Mndumii, keluenengewo mkate fu kiheri kyose.”

³⁵ Yesu kawawia, “Nyio inyi njikeri mkate fu fo moo. Mndu akuchea na koko akiwado-se nyi njaapfo, na mndu awa monjiidikya nakirohyo-se nyi nyoda ma indipfo.

³⁶ Kya indi ngammaa imbia, ke nyi mulenjiwona manya mulanjiidikie.

³⁷ Iwo wose Wande amenjienenga wo wechikuchea na koko. Na mndu akuchea na koko njechimfunya njapfo.

³⁸ Kipfa kyannenga ngasoka ruwehu chi kundu njiwute kya chila yakopfo kya indi kundu njihende iwuta kii kya chila ya ichu alenjiduma.

³⁹ Na kilya ichu alenjiduma achilia kikeri kii-le, njiladetseho ma umu o walya alenjiinenga kya indi kundu njiṟutse wose Mfiri fulya fofurumia.

⁴⁰ Kyamba kindo Wande oko akundi nyi iki ke orio mndu awona Mana na imwidikya nawade moo fo mlungana. Na inyi njechiwaṟutsa Mfiri fo furumia.”

⁴¹ Nahong'u Wayuda wakawoka inunuwa kyake ili ahamba, “Inyi nyi mkate fu fo moo fuchee ruwehu.”

⁴² Wakahamba, “Ashika-wo ichu chio Yesu ai mana o Yosefu? Nde na mae na luwaichi. Nyi kyawa kida ili ahamba ke nyi asoke ruwehu?”

⁴³ Yesu kahalwo kawawia, “Lekyenyi inunuwa nyo muwenyi na wenyi.

⁴⁴ Kwipfo mndu eidima icha na kokopfo, kulawode wande ichu alenjiduma amhomwo napfo, na inyi njechimṟutsa Mkonu fulya foimarisya.

⁴⁵ Waikimbi waleṟehya, ‘Wandu wose wechilosho nyi Ruwa.’ Nahong'u orio mndu ose aadanyia kiwuka ko Wande na ikulosha nyi aicha na koko.

⁴⁶ Chi kikeri cha ili kwipfo mndu alemewona Wandepfo, shila nyi ichu awukie ko Ruwa, nyio alemewona Wande.

⁴⁷ Nyi lohi kya lohi ngamuwia, Ichu aidikie nyi awode moo fo mlungana.

⁴⁸ Inyi nyi mkate fo moo.

⁴⁹ Waku walya wanu wo walelya Mana kulya nuka wakawepfa.

⁵⁰ Aifu mkate fusokie ruwehu; kundu wandu wechilya-ho walakikoyese ipfa.

⁵¹ Nyio inyi nji mkate fu fo moo fusokie ruwehu. Mkate fu mndu ailya-ho nechikaa na moo mlungana. Na mkate fo njechimnenga mfo mbihufu foko njifulekia njiwonesye nafo wuyana wu moo.”

⁵² Lyo likatewa Wayuda wakaloyana wawenyi na wenyi wakahamba, “A nyi wuda ichu echiidima iluhavya nyama tsake lukulie ngesa?”

⁵³ Nahong'u Yesu kawawia, “Nyi lohi kya lohi ngamuwia, Mukada mulalya nyama tsa Mana chu o mndu na inyo samu yake mochikaa ma na moo fu mufuriepfo.

⁵⁴ Mndu kalya nyama tsako na inyo samu yako nyi awode moo fo mlungana na inyi njechimṟutsa Mkonu fulya foimarisya.

⁵⁵ Kyamba nyama tsako tso kando ka lohi na samu yako nyi yo kyenyo kya lohi.

⁵⁶ Na mndu kalya nyama tsako kawenyo samu yako nyio akaa kiidi kyako na inyi njikaa kiidi kyake.

⁵⁷ Kikawa chando Wande chu alenjiduma akeri menyi-moo na inyi njii na moo kimaduma kya Wande na wudo da ichu anjilya inyi nyi akaa na moo kimaduma kyako.

⁵⁸ Ifu mfo mkate fusokie ruwehu, fulai fo mbaṟi imu na mana iya waku walya walelya wakawepfa. Mkate fu mndu kafulya o echiwada mo mlungana.”

⁵⁹ Na kundo alehambya madedo ho nyi ipfo sinagogenyi ya kulya Kapernaumu echiloshya-ho.

Madedo hekeende moo fo mlungana

⁶⁰ Nahong'u wa kiloshyonyi kyake wamwicho adeda ado wafoi wakahamba, “Madedo ho nyi maumu. A mndu eidima ihaicho nyi wu?”

⁶¹ Nao Yesu kamanya ke wa kilohyonyi kyake nyi wainunuwa kya ikyo. Nalyo kawawia, “A ikyo kyamutewa mkawa kiṟumaṟuma?

⁶² Alewo nyi kyechiwa kida kiheri mochiwona Mana chu o Mndu echido na alya kundo awekukerye-ho kacha?

⁶³ Mumuyo mfo fuiwika moo, mbihufu fumenyi fochiidima kindopfo. Madedo ho ngamemuwia ho hai ha Mumuyo hakawewa na moo.

⁶⁴ Indi ipfo kiidi kyanu nyi kwipfo maata walai waidiki.” (Kyamba wuka kiwokyonyi Yesu aweichi walya walamwidikye nyi wahya na ulya echimtwaṟa nyio u.)

⁶⁵ Nalyo kahamba, “Nkyo kimaduma ngamuwia, Kwipfo aidima icha na kokopfo shila nyi ichu ai mṟamtse nyi Wande oko.”

⁶⁶ Kipfa kya madedo-ha, wandu wa ipfo kiloshyonyi wafoi wakawuya na numa walakihendesane-se nao.

⁶⁷ Nahong'u Yesu kawesa walya ikumi na wawi, “Kulako nanyo mokunda ikuhendya ngesa?”

⁶⁸ Simon Petro kamhalwo, “Hoi Mndumii lukuhendye ko u ngesa? Nyio iyo uwode madedo haende moo fo mlungana.

⁶⁹ Naso lomekuwutya-ho ikuidikya lukakumanya ke iyo nyi ukeri Mwele chu o Ruwa.”

⁷⁰ Yesu kawahalwo, “A chio inyi njilemusambuṟa nyo ikumi na wawi? Na ipfo kiidi kyanu umuho kawuya iwa mkumbi?”

⁷¹ Yesu alehamba ado kya Yuda Iskariote ai mana o Simon. Kyamba nao nyio alehenda imtwaṟa ma ili awei umu o walya ikumi na wawi.