YOHANE 5 - Bibilia Kui Mdedie fo Kimochi

¹ Ili numa kuweshikye mkonu mnene fo Wayuda Yesu kahenda ido na kulya Yerusalemu.

² Nahong'u kulya Yerusalemu oo kufui na kichumi kilya kya machondi kukeri-pfo nduwa ilaho rina lyayo. Kiebrinia nyi Betesida. Nayo ii na shidangasha sha mholo-holo shitanu.

³ Napfo kudamye-pfo mamingi fo wandu waluo wapfu meso na wahuli madende ho, na watangaṟimi. [Nawo wechiwedia mṟinga fulya fochikupayapaya,

⁴ cha kipfa ili malaika echisokya kulya nduwenyi ku kiheri kapayapaya mṟinga fulya. Na ulya amewooka isokya ipfo mṟingenyi ili fomekupayapaya kawekuchia ndaṟe yo yake.]

⁵ Kyasia hando ho kwipfo mndu aluo amaye maka makumi haṟaṟu na nyanya.

⁶ Yesu kawona mndu ulya alee-pfo. Kamanya ke amaye-pfo maheri hafoi. Kambia, “Okunda ichia woe?”

⁷ Mndu ulya aluo kamhalwo, “Mndumii njiwode ma mndu nanjisotsie ipfo nduwenyi ili mṟinga fochikupayapayapfo. Indi ili njii-pfo njihendahenda ungi kawenjiida kasonguo ikusokya-ho.”

⁸ Yesu kambia, “Kyekureng'u nokudike kitaṟa kyapfo nokuchumie-ng'u.”

⁹ Nalyo liyenyi mndu ulya kachia kakudika kitaṟa kilya kyake kachumia. Na mfiri fulya fuwei fo Sabato.

¹⁰ Nahong'u Wayuda wakacha iwia mndu ulya alechiṟo “Inu nyi Sabato kikusumhanyi iduo kitaṟa kyapfopfo.”

¹¹ Nao kawawia, “Mndu ulya anchiṟa anjiwia, kudike kitaṟa kyapfo nokuchumie.”

¹² Wakambesa, “A mndu ulya akuwia kundike kitaṟa kyapfo nochumia nyiu?”

¹³ Na ulya alechiṟo nalakimanye mbeo-u kyamba Yesu awemedekya ipfo kidi kya mamingi fung'anyi fo wandu fukeri hando halya.

¹⁴ Kyasia ili numa Yesu kamkoya ipfo hekalunyi kambia, “Ambuya omekuchia-ng'u, ma kulakae unyamaṟe-se ukae nowone kindo kiwichowicho kyechikutowokia.”

¹⁵ Mndu ulya kakure-pfo kahenda iwuuya Wayuda walya ke mbeo Yesu eemkiṟa.

¹⁶ Nakyo kikaenenga Wayuda wakawa weṟinjawya Yesu wakapfula meeke fombaha cha kipfa lya alewuta ado mkonu fo Sabato.

¹⁷ Nao kawahalwo, “Ndeyako nyi aiṟunda kiheri kyose na inyi daa njiṟunda.”

¹⁸ Nakyo kikaengeṟa iitika Wayuda wapfule mwaanya fombaha chi kipfa atahachye Sabato tupupfo kya indi nyi ili ahamba ke Ruwa nyi ndee amonyi kechikung'ang'anyisha adi na Ruwa.

Pfinya ya Mana o Ruwa

¹⁹ Nahong'u Yesu kahalwo kawawia, “Nyi lohi kya lohi ngamuwia, Mana echiidima itana kindo kui chila yake amonyi kulawode nyi ikyo awona Nde aitana-pfo. Kyamba kindo ndee atana na Mana nakyo kawekitana ado da.

²⁰ Kyamba o Wande nyi akundi Mana, kamloṟa orio kindo aitana amonyi shose. Nao echimloṟa na shetana shing'anyi kota isho mukuwutye-ho iṟihio.

²¹ Kyamba chando Wande aṟutsa walya wapfu kawainenga moo, nao Mana na wudo-ng'u iwo akunda kawainenga moo.

²² Kyamba Wande alaanduya mndu o wandu ma umu kya indi Mana nyio amdambikye yanduya li lyose.

²³ Kundu wandu waindye Mana chando wekeindya Nde. Ichu ada alaindya Mana nyi ada iindya na Nde alemduma.”

²⁴ “Nyi lohi kya lohi ngamuwia, Ichu moanguya dedo lyako madu na iidikya ichu alenjiduma nawode moo fo mlungana. Nao echianduyo manyalepfo, kya indi nyi amsama auka opfunyi kasamya moonyi.

²⁵ Nyi lohi kya lohi ngamuwia, Kukaa kuche kiheri na wulalu na kikeri-pfo da lyondo wapfu wechiicho ṟu lya Mana o Ruwa na iwo weliicho wechiwona moo.

²⁶ Kyamba chando Wande awode moo fuwukye ipfo kiidi kyake kwenyi nyi wudo da aleinenga Mana ikaa na moo fuwukye ipfo kiidi kyake kwenyi.

²⁷ Kawemnenga na wuchili wo idumbwo mondu kipfa akeri Mana chu o Mndu.

²⁸ Ma mulaṟihyo kya ikyo, kipfa kukaa kuhoye kiheri ili iwo wose walee ipfo shipfunyi wechiicho ṟu lyake.

²⁹ Nawo nyi wechiṟuka. Iwo wawutye hai mecha waṟuke kyewada moo, na iwo wawutye hai mawicho waṟuke kya yanduyo mondu fulya.”

Waṟingishi wa Yesu

³⁰ “Inyi ngaidima iwuta kindo kii kya chila yakopfo. Njekeanduo mondu mdumbuye fuidikyanyi na kilya ngaicho njewio nyi Wande, na mdumbuye foko nyi fusumuhanyi. Kindo njiiwalya chi kilya njikundi inyipfo; kya indi nyi kilya ichu alenjiduma akundi.

³¹ Kokoya ngakuṟingishya njimonyi kiṟingishyo kyako kyeidikyo ke kii kya lohipfo.

³² Indi nyi kuipfo ungi monjiṟingisha. Na inyi njiichi ke kiṟingishyo anjiṟingishya nyi kya lohi.

³³ Nyo nyi muleduma watichi wanu ko Yohane nao kaṟingishiaho kiilohi kilya.

³⁴ Na inyi ma njekewada kiṟingishyo ki-kiwike nyi wandupfo kya indi nyi ngahamba ikyo kundu muhende ikiṟo.

³⁵ Yohane nyio awei cha taa yewaa yechilimika, nanyo nyi mlelanga ikukesya na saa yo ya oweṟe lulya.

³⁶ Indi inyi njiwode kiṟingishyo kyako king'anyi kota kilya kya Yohane. Kyamba maṟunda njiṟunda halya wande alenjienenga njihaṟunde, naho nyiho haiṟingishia ke nyi Wande alenjiduma.

³⁷ Nao Wande monjiduma kawenjiwikya kiṟingishyo o amonyi. Nanyo mlemeicho ṟu lyake ma mantapfo, ma fana yake mlemeiwone-pfo.

³⁸ Ma idedo li lyake mukuwodye nalyo likae ipfo mrimenyi-pfo kipfa ichu alemduma mulalemwidikya.

³⁹ Nyo mokeweṟuwetsa Maṟehyo Maele muichi kulako mochiwonapfo moo fo mlungana, ate maṟeho ho nyi inyi. Naho hainjiṟingishya.

⁴⁰ Nanyo ma mulakunde ikuchea na koko kundu muwade moo fulya.”

⁴¹ “Kitewe kyako chi iwona kiṟumi ko wandupfo.

⁴² Kya indi nyo njimwichi ke ikunda lya Ruwa muliwode ipfo mrimenyi yanupfo.

⁴³ Inyi njicheye kui rina lya Ndeyako, nanyo ma mulanjiambye. Kokoya ungi echicha kui rina lyake amonyi nyi mochimwambya.

⁴⁴ Nyi wuda moidima iidikya nyo ili mokeringa kiṟumi mukeri muiwikyana muwenyi na wenyi, na kiṟumi kilya kicheye ko Ruwa amonyi mulaikiwalya?

⁴⁵ Ma mulawone mohamba ke nyio inyi nyechimkumba ipfo ko Wande. Mose chu mumkusihye nyio echimkumba.

⁴⁶ Kyamba kokoya muweidikye Mose na inyi muwenjiidikya, kyamba Mose o aṟehye kya injihamba inyi.

⁴⁷ Indi kokoya mulaidikie shilya aleṟehya, nyi wuda mochiidikya madedo inyi njideda?”