YOHANE 3 - Bibilia Kui Mdedie fo Kimochi

Yesu na Nikodemo

¹ Kukakaa-pfo mndu o ipfo kambenyi lya Wafarisayo, awio rina lyake nyi Nikodemo ai msongoru o Wayuda.

² Nao kakuchea ko Yesu ili kio kambia, “Hoi Maaria, nawo luichi ke ukeri mlosha umdume nyi Ruwa cha kipfa kulakeri ma mndu echiidima iwuta ṟiho tso owa mowuta iyo na koka nyi Ruwa akeri nao tupu.”

³ Yesu kahalwo kambia, “Kya lohi na lohi ngakuwia, Mndu kada lafeo wuhya nechiidima iwona wumangi wo Ruwapfo.”

⁴ Nikodemo kambia, “Aka-wo mndu namanye ifeo-se ada lingi ai meku? Ngesa nyi echiidima-se kuwuya na ipfo wusunyi wo mae nawefeo-se lya kawi?”

⁵ Yesu kahalwo, “Kya lohi na lohi ngakuwia, Mndu kada alafeo nyi mṟinga na Mumuyo echiidima ihenda ipfo wumanginyi wo Ruwa manyale-pfo.

⁶ Mndu nekefeo kimbihu nyi ndeye na mae, kya indi nekefeo kimrima nyi Mumuyo.

⁷ Ma kulaṟihio ili ngakuwia ke mkaki na mufeo wuhya.

⁸ Otanu lochekewiwita kundo lochikukundya na mrundumo folo na ochikuichyo, kya indi kulamanye ma kundo luwuka ma kundo loihenda. Kyasia-ng'u na orio mndu mofeo m Mumuyo na wudo akeri.”

⁹ Nikodemo kahalwo kambia, “A ikyo nyi kyechiidimika kida ngesa?”

¹⁰ Yesu kahalwo kambia, “Nyi ukeri mlosha o kunu Israeli kulamanye ikyo?”

¹¹ Kya lohi na lohi ngakuwia, Kilya lomemanya nakyo lochekehamba na kilya lomewona nakyo lochekeongwo kya iṟingishya lyadu. Na kiṟingishyo kyo kyadu nyo mulakiidikye.

¹² Ili njemwongoya kya shindo shii sha kunu orukenyi nanyo mulanjiidikye, a ili njemwongoya kya shilya sha ruwehu nyi mochikuidikya muda?

¹³ Ma kulelemedoe mndu kulya ruwehupfo, na ichu alewesoka ruwehu nyio Mana o Mndu ai ipfo ruwehu.

¹⁴ “Chando Mose ewedosya njoka iya huye kulya kundo ko olele na Mana o mndu na wudo echika nairio huye.

¹⁵ Kundu orio mndu momwidikiya nawone moo fo mlungana.

¹⁶ Kyamba Ruwa nyi awekundi wuyana katana alekya Mana oke kimumu mfi, kundu orio mndu ose amwidikye nalawone kedeka kya indi nawone moo fo mlungana.

¹⁷ Kyamba Ruwa alaleduma Mana oke nache na kunu wuyana kundu naanduye wuyana wu, kya indi nyi kundu wuyana wuhendekiṟo nyio.”

¹⁸ “Mndu aidikye Mana echiwonyo owingopfo. Mndu alamwidikie o ammaa iwonyo owingo kipfa ada alaidikya Mana chu o Ruwa kimumu mfi.

¹⁹ Na owingo lu lukeri luile: Nyi sa ilecha na kunu wuyana na wandu wakakunda meema kota sa. Kitewe kipfa nyi shindo watanye shiwei shiwicho.

²⁰ Kipfa orio mndu atanye shiwicho o asuo sa ma ekehenda kundo kuwode sa iipfo kundu mawutoho hake mawicho halalimiko.

²¹ Indi mndu ai motana kiwulohi kilya o ekehenda kundo kuwode sa kundu ngata tsake tsihende imanyishoho ke nyi tsinjiwute kui ihendelia Ruwa.”

Yesu na Yohane Mpatisi

²² Ishi shikawa Yesu kahenda kulya orukenyi lo Yudaya arianyi na waloshe wake, Katsinda-pfo nawo kechipatisa wandu.

²³ Na Yohane nyi awei-pfo echipatisa wandu kulya Ainon kulya kufui na Salemu ili kuweipfo mṟinga fufoi. Kukacha napfo wandu nao kawapatisa.

²⁴ (Kyamba kiheri kilya Yohane awemekumbo kipfungon-pfo.)

²⁵ Nakyo kikaenenga wa kiloshionyi wa Yohane Waleloyana na mndu Myuda wechiwesana nao kya isamba.

²⁶ Wakawuya Yohane wakambia, “Hoi Maaria, ulya awei na iyo kulya mataya ya Yordanyi, nao nyio iyo ulembikya kiṟingishyo nyi aipatisa na wandu wose wakamwosha.”

²⁷ Yohane kahalwo kahamba, “Kwipfo mndu eidima iwada kindo shila nyi kilya ainengo nyi Ruwapfo.

²⁸ Nyo muwenyi mkaṟingishia ke njilemhamba ke chio inyi njii Kristo-pfo. Kya indi njimdume njimsongoye.

²⁹ Ichu arie mka moaliko nyio menyi-wali. Indi mbuya ya menyi-wali ichu ahoṟoki oo afui kemwadanya nyi aichihio mnu na sia ing'anyi ili aicho menyi wali kechideda. Nyi wudo sia yako yaichuo pacha.

³⁰ Kimbaṟi o naengeṟe iṟumisho na inyi njinyie.”

Msa aicha awuka ruwehu

³¹ “Ichu acheye awukye huye nyio mnene o wose. Ichu apaṟikye kunu wuyana kawewa na o kunu wuyana kuwededa shii sha wuyana. Indi ichu achee awukye ruwehu o akeri mnene o wose.

³² Nao nekehamba kilya alekiwona na ikiicho na kiṟingishyo kyo kyake nyi

³³ akiwikya mhuri fohamba ke Ruwa nyio kiwulohi.

³⁴ Icho Ruwa alemduma nyi mbia tsa Ruwa aihamba, kyamba Ruwa aimnengya Mumuyo kulaipfo iikenya.

³⁵ O Wande nyi akundi Mana chu kamdambikya shindo shose.

³⁶ Mndu aidikye Mana o nakuwode na moo fo mlungana. Na mndu ada alaidikya Mana cho o echiwona moo fo mlunganapfo kya indi tuuke ya Ruwa yechikaa irianyi nao.”