YOHANE 20 - Bibilia Kui Mdedie fo Kimochi

¹ Nahong'u mkonu fulya fo Ruwa, ngamenyi kilawo na iwushiwushi, Maria ulya o Magidala kahenda ishika alya opangenyi. Kakoya iho lilya lyambuto oo momunyi fo opangenyi.

² Nalyo kawikya mteṟa kashika kulya ko Petro na ulya o kiloshyonyi wawekotanyi na Yesu, kawawia, “Ate nyi wamira Mndumii-pfo opangenyi naso lulamanye ma kundo wahendye imlaṟa.”

³ Wadi Petro wakakure-pfo na ulya ungi o kiloshyonyi. Wakawada njia yeshika kulya opangenyi.

⁴ Wakahenda wechidicha wa wawi. Nalyo ulya ungi o kiloshyonyi kadicha kasongoya Petro, kawoka ikushikya alya opangenyi.

⁵ Nao aimehya-ho kawona nguo tsilya tsa owiṟo tsii-njiṟeṟye ipfo wanda, kya indi nalaide naho.

⁶ Naho Simon Petro kashika-pfo kecha oo numa yake adi kakuhendya ipfo opangenyi kawona nguo tsilya tsii-njiwike-ho.

⁷ Na kidami kilya kya mbiṟuko kiwei kipfunge alya mdonyi fo Yesu kila-kiṟye handu hamu na nguo tsilya, nyi kikeri hando hakyo kyenyi kii kikunjiṟye.

⁸ Nalyo na ulya ungi o kiloshyonyi ulya alewooka ishika alya opangenyi kaweanga napfo, ulya alewoka ishika alya opangenyi Kawona kakuidikya. (

⁹ Kyamba lyandi walandemanye kilya kii-kiṟehye kehamba, ke nyi kii-kiteṟie nahende iṟuka awuka ko wapfu.)

¹⁰ Nahong'u walya wa kiloshyonyi wakakure-ho wakawuya na kanyi.

Yesu awonekia Maria Magidalena

¹¹ Kyasia mandi nalyo Maria kadeo ahoṟoki oo sumuhana na ipfo opangenyi kelia ipfo nja. Adi kelia kaimehya ipfo opangenyi.

¹² Kawona wasu wa Ruwa wawi waṟee nguo njiili wadamye-ho. Ulya umu kakaa oo mdonyi na ungi madendenyi alyando mnying'a fo Yesu fuwei mlaṟe.

¹³ Nawo wakambia, “A iyo mka, nyi ki ili uilia?” Kawawia, “Nyi ili wamira Mndumii oko na inyi ndamanye-se hando wahendye imlaṟa.”

¹⁴ Kekihamba ado kaindukya numa kawona Yesu ahoṟoki-ho nao nalamanyie ke nyio Yesu.

¹⁵ Yesu kambia, “A nyi kiki olia, mka? Nyiwu uimpfula?” Nao kahamba lako nyi ulya moikalya kyungu kambia, “Koka nyi iyo umuirye-ho, Mndumii, kembiawo hando uhendye imlaṟa, na inyi njihende imwondwo-pfo.”

¹⁶ Adi Yesu ambia, “Maria.” Nao kainduka kambia kiebri, “Rabunyi.” Nakyo kii cha ili kohambo, “Maarya oko.”

¹⁷ Yesu kambia, “Ma kulawone koikuwasha na inyi. Kipfa ili ndamekudoya na kulya ko Wande. Kya indi uhende kulya ko wanawawama nowawie, Njikudoya na ipfo ko Ndeyako nao Ndeyanu na ko Ruwa oko nao Ruwa onu.”

¹⁸ Maria o Magidalena adi kawehenda kacha iwia walya wa kiloshyonyi, “Inyi ngambona Mndumii.” Kawewaongoya na kilya ambia.

Yesu awonekia wa kiloshionyi kyake

¹⁹ Nahong'u mfiri fo Ruwa kyukanyi na mongo ili impfunge ya mba iya ipfo kundo wa kiloshyonyi wakuwumbye nyi kipfa waowoye Wayuda. Kudi Yesu a ichu amcha kahoṟo kidi kyawo kawawia, “Kaenyi na ofoṟo.”

²⁰ Kekihamba ado kawaloṟa mawoko na owari. Nalyo walya wa kilsohyonyi wakafuda mnu ili wawuya iwonana na Mndumii.

²¹ Yesu Kawuya kawawiase, “Kaenyi na opfoṟo. Chando Wande anjidumye na inyi na wudo ngawemduma nyo.”

²² Adeda ado kawaomoya kawawia, “Keambuyenyi Mumuyo Mwele.

²³ Wesa mochiwahooṟya njonyamaṟo tsawo wametsihooṟyo, na wesa mochiwapfungiṟya njonyamaṟo tsawo wametsipfungiṟyo.”

Yesu na Toma

²⁴ Kya indi Toma (aleho o mbasa) ulya ai o ipfo kiidi kya walya ikumi na wawi alawei nawo lya mandi Yesu alecha.

²⁵ Naho wa kiloshyonyi walya wengi wakambia, “So lombona Mndumii.” Nao Toma kawawia, “Ngamda njilambona ngoru tsa msomari ipfo mahinyi hake, njilambika ma kimnyo kyako ipfo ngoru-hu tsa msomari ma owoko loko ipfo owarinyi loke njechikuidikya ma ngashika indipfo.”

²⁶ Kyasia ili numa komeida-ho mfiri nyanya walya wa kiloshyonyi kyake wawekeri-se ipfo mba na Toma ai ipfo kiidi kyawo. Kudi aichu Yesu acha-ho mongo ii-mfunge kahoroka ipfo kiidi kyawo, kahamba, “Kaenyi na ofoṟo.”

²⁷ Kiidima kawia Toma, “Keende-ng'u kimnyo kyapfo na aa noweambuya na mawoko hako, uweende na owoko lopfo noluwike aa owarinyi loko. Ma kulawe mlemeshi iidikya kya indi uwe mwidiki.”

²⁸ Toma kahalwo kambia, “Hoi Mndumii oko. Hoi Ruwa oko!”

²⁹ Yesu kambia, “Omenjiwona n kyo kyakuenenga iidikya! Nanga iwo walalemewone indi wakaweidikya.”

Kitewe kya kitapuki

³⁰ Nahong'u kukawekaa-pfo ngata tsingi sa tsifoi Yesu aletana, walya wa kilsohyonyi watsiwonyi, natso tsilai njiṟehye kunu kitapunyi.

³¹ Kya indi itsi tsii-njiṟehye-ho kundu mukuutyeho iidikya ke Yesu akeri Kristo Mana o Ruwa, na ipfo kundo mwidikye mudi mushike ikoya-pfo moo kui pfinya ya rina lyo lyake.