YOHANE 19 - Bibilia Kui Mdedie fo Kimochi

¹ Kikashika oo Pilato kaanduya Yesu kembawasya nakapo na ngowa tsa shiteecho.

² Nalyo wasikari walya wakaoka oṟo ya msha wakambika mdonyi, wakamṟika nguo ya king'aring'ari.

³ Wakacha ihoṟoka oo sumuhana nao wakahamba, “Lokuiṟikiṟa Mangi ya Wayuda!” Wakawuya wakamkapa ngofi.

⁴ Naho Pilato kacha-se na nja kawawia, “Ambuya, ngamwende na iya nja kundo mukeri kundu mochiwuta-ho imanya ke njilaidima iwona owingo loke.”

⁵ Nahong'u Yesu kacha na ipfo nja aṟee oṟo iya ya msha na nguo tsa king'aring'ari. Nalyo Pilato kawawia, “Ambuyenyi! Aichu mndu chu.”

⁶ Wakohanyi wang'anyi wekimbona na waringi walya wakafunja kisangalale wehamba, “Henda imkapya msalabehu, Henda imkapya msalabehu.” Pilato kawawia, “Kyekumdayenyi nyo mbembambya msalabehu cha kipfa inyi ndawona mti koke.”

⁷ Wayuda wakamhalwo, “So luwode wuwawaso wo kikodu na kui wuwawaso wo nyi kimsumuhanyi ipfa kipfa amekutana Mana o Ruwa amonyi.”

⁸ Pilato kekiicho kihambo kido kaengeṟa yowuo.

⁹ Kawuya kaida-sa na kipfo mba ya chila kawia Yesu, “A iyo nyi o ku?” Kya indi Yesu nalamhalwo ma kindo.

¹⁰ Pilato kambia, “Nyi kuladeda na inyi? Ngesa nyi kulaichi njiwode pfinya yekulekya na pfinya yekuwambia msalapenyi?”

¹¹ Yesu kamhalwo, “Kuwewode pfinya na inyi kima chila kuleinengo iwuka huye ko Ruwapfo. Nakyo kiinengye ichu anjidambikye kunu kopfo kawada wunyamaṟi wung'anying'anyi.”

¹² Wokya o Pilato kapfula mweeke fomlekya. Indi Wayuda wakasambahada wehamba, “Koka ochilekya ichu ukeri ma mbuya ya Kaisaripfo. Orio mndu mokuhalwo Mangi amonyi nyi alehya Kaisari.”

¹³ Kyasia Pilato kekiicho madedo ho kaende Yesu na ipfo nja, kadamya alya loṟikehu lo yanduya ipfo kundo koelaho Menge njiale maho. Na rina lyayo lya Kiebrinia nyi Gabata.

¹⁴ Nahong'u mkonu fulya fuwei foikuteseheṟa ilya Pasaka saa ya kaṟandaṟu mfiri: Nalyo Pilato kawia Wayuda, “Aichung'u Mangi yanu.”

¹⁵ Wadi wakafunja kisangalale, Mduo mduo, mbambye msalabenyi. Pilato kawawia, “Ntane ngawambya Mangi yanu msalabehu?” Wakohanyi walya wang'anyi wakahalwo. Luwode Mangipfo sile nyi Kaisari amonyi.

¹⁶ Kikashika oo nalyo Pilato kadambikya Yesu mawokonyi nahende ikapyo msalabehu.

Yesu awambio Msalabenyi

¹⁷ Wakahenda warie Yesu. Nao kahenda akudikye msalaba foke amonyi. Kawuka kulya mṟinyi kashika kundo koelaho nyi ko mbuonyi. (Na rina lya Kiebri nyi Goligota.)

¹⁸ Hando naapfo wakambambya msalabenyi, wakamsanza na wengi wawi, umu ora lo kulyo na ungi ora lo kumoso. Yesu kakaa oo makidi hawi.

¹⁹ Kyasia Pilato kaṟehya kiṟehyo kyeolongya kaikapya oo msalabehu huye. Na kindo kii-kirehye-ho nyi kikeri kiile “YESU MNASARETI MANGI YA WAYUDA.”

²⁰ Naho kiṟehyo ki Wayuda wafoi wakakisoma kipfa alya Yesu awambyo msalabehu kuwekeri kufui na mṟinyi. Nakyo kiwei kiṟehye mdedye fo Kiebri, Kiroma, na kigriki.

²¹ Naho wakohanyi walya wang'anyi wa Wayuda wakawia Pilato, “Ma kulaṟehye kehamba, ‘Nyi Mangi ya Wayuda,’ kya indi uṟehye, ke o nalehamba, ‘Nyi ai Mangi ya Wayuda.’”

²² Pilato kahalwo, “Kindo ngamṟehya kyo ngamṟehya.”

²³ Kyasia wasikari walya wekiwambya Yesu msalabehu wakaira nguo tsake, wakatsihawa njohawi tsiina orio msikari na ohawi loke na kanzi iya naawo. Na kanzi iya ilawode opfumo ii njioke piu cha iṟimbi.

²⁴ Wakawiana mndu na odoe, “Kyayo lulairandwo randwo lae, luwike nayo kuṟu kuhya yambuyo ho mndu echiduo.” Kikahenda kido kundu kochihoya Kiṟehio Kiele kilya kii-kiṟehye kehamba, “Nyi walehawana nguo tsako na maṟaonyi hako wakawika naho kuṟu kuhya.” Wasikari walya nyi wudo walewuta.

²⁵ Kyasia kulya kufui na msalapa fo Yesu kuhoṟoki-ho mae, na manomae o mae, Maria o Kileopa na Maria ulya o Magidala.

²⁶ Nalyo Yesu kekiwona mae na ulya o kiloshyonyi ulya wakundanyi ahoṟoki-ho naho kawia mae, “Mka aichu manopfo.”

²⁷ Kawuya kawia ulya o kiloshyonyi, “Aichu mayo.” Matsika saa nayo ulya o kiloshyonyi kamduo nakae kulya koke.

Yesu apfa

²⁸ Kyasia Yesu kekimanya shose shamemarisikya kya Kirehio kilya Kiele shechihoya nao kahamba, “Njianga.”

²⁹ Napfo kuu-kuwike-pfo nungu iwode mpfinyo fo mtarang'ao. Nalyo lienyi wakaira kyoonga mṟinga wakakikapya mpfinyo fulya futarang'ae wakakiwika iwalehu wakamlongoṟya kulya dumbunyi.

³⁰ Naho Yesu kekififinda mwinyo fulya futarang'ae kahamba, “Kyamekumarisikyang'u.” Kang'odwo mdo kalekya moo.

Yesu atocho na ipfumu oo owari

³¹ Fuwei mkonu fo katanu nyifo fo kuṟeheṟa fusongoe mkonu fo Sabato, Wayuda wakakoya chi kicha mnying'a iya itsinde kulya msalabehu ili mkonu fo Sabatopfo. Na Sabato iya iwei nyi mkonu sa mnene fo ngoseṟa. Wayuda Wakacha iterewa Pilato mafuo halya ha walya wawambie msalabenyi hahende ifunjofunjo na mbihu yawo isotso-ho.

³² Naho wasikari wakacha-ho wakafunja ulya o kuwoka madende ho na ulya o kawi walya wawa-wambye msalabenyi kimu Yesu.

³³ Wekishika oo ko Yesu wekiwona amepfa nawo walakimfunje madende ho.

³⁴ Indi wasikari walya umu-ho kamtocha oo owari na pfumu nalyo kudi kukaewa-ho samu na mṟinga. (

³⁵ Na ichu alekiwona nyi awa mokiṟingishya na kiṟingishyo kyo kyake nyi kya lohi. Nao aichi nyi kya lohi adeda kundu nanyo muwange iidikya-ho.)

³⁶ Na kyenenga kikawutika kido nyi kundu Kiṟehio Kiele kyechiinukya kehamba, “Kuwode fuo lyake lyechifunjo manya limu-pfo.”

³⁷ Kukawekaa-pfo kingi kii-kiṟehye kehamba, “Wakae wechiwona ichu walemtocha na pfumu.”

Yesu aṟiko ko wapfu

³⁸ Naho shilya shekisia kukacha napfo Yosefu o kulya Arimatia akeri o kiloshyonyi kya Yesu kya kiṟika kipfa ili aowoye Wayuda. Kacheterewa Pilato moomu fosotsa-ho mnying'a fo Yesu. Pilato kamnenga momu. Nahong'u Yosefu kakuhendya-pfo kasotsa-ho mnying'a fo Yesu.

³⁹ Kukawecha naho Nikodemo ulya ewecha ko Yesu ili kio lya mbooko. Kacha arie msanzo fo mafuda hepfaama ha mbaṟi tsifoi: manemane na ubanyi shishikye kufui na ratili ihana.

⁴⁰ Kyasia wakaira mnying'a fo Yesu wakafuoṟowya nguonyi tsa owiṟo wakasanganya-ho mafuda halya hepfaama chando mbuka tsa Wayuda tsiwewei tseṟika.

⁴¹ Kyasia kulya kundo Yesu ewambyo msalabehu nyi kwipfo kyungu kii-kiṟihye kitungutungu na ipfo kyungunyi kuwode-ho opanga lo iṟika lu uhya sa lulelemewiko mndu.

⁴² Hando napfo wakahenda iṟika-pfo Yesu kipfa kya Mkuteseheṟye fulya fo Wayuda fo Pasaka; na kipfa ili opanga lulya luvewa kufui.