YOHANE 16 - Bibilia Kui Mdedie fo Kimochi

¹ “Kyanjienenga ngamuwia njido nyi kundu mulawone mohenda ipfuluko.

² Wandu nyi wechimbuta siṟinyi yawo ipfo masinagoginyi hawo. Ee da, kushikye kiheri na orio mndu amuwaha nahambe ke nyi awuta ado kindo kichihianyi na Ruwa.

³ Na kyatewa wawuta wado nyi kipfa walaichi ma Wande ma inyi walanjiichi.

⁴ Ili ngamuwia njido nyi kundu ilindi kiheri kyawo kyechishika muhende itamwo kyawo ke inyi njimonyi njilewoka imuwia njido.” “Njilemuwia mbonyitsi wokia mawokenyipfo kipfa njiweri nanyo.

Iṟunda lya Mumuyo Mwele

⁵ Na wulalu njikuhendya njiwuye ko ichu alenjiduma. Ma kulaipfo o kiidi kyanu monjiwesa nyiku uihenda.

⁶ Indi ili ngamuwia njido nanyo mukaichwo fowa ipfo mrimenyi yanu.

⁷ Na inyi ngamuwia kya lohi, Ili njihenda nyo mokuwutyaho kiira. Kyamba kokoya ngada njilahenda Mkarishi ulya echimchea nyopfo. Indi kiheri ngamaa ishika njechimduma konu.

⁸ Nao kamcha nyi echitoromisha wuyana wu kya wunyamaṟi na kya wuhoṟotsu na kya mwanduye fo Ruwa.

⁹ Kya wunyamaṟi nyi ili Walanjiidikya inyi;

¹⁰ kya wuhorotsu njikuhendya ko Wande nanyo mulakinjiwona-se.

¹¹ Kya mwanduye nyi ili mangi ii ya wuyana wu ammaa iwonyo owingo.”

¹² “Nyi njiwodese shindo shifoi shembia kya indi mulawechishiidima wulalu.

¹³ Indi kiheri ichu echicha ai Mumuyo o wukilohi, o echimuwiia mateteṟa momwitsa wukilohinyi wose, kyamba alechideda kui wuitiki woke amonyi, kya indi shilya aicho nyisho echideda, na shilya shirie iwa nyisho echimwongoya.

¹⁴ O echinjing'anyisha inyi kyamba mbonyi tsi echimwongoya nyi kunu koko inyi echitsiwuta.

¹⁵ Shindo shose Wande awode nyi shako. Nkyo kyannenga ngamuwia, ‘Mbonyi tso Mumuyo Mwele echimwongoya nyi kunu koko echitsiwuta.’”

Fowa na sia

¹⁶ “Mwaanya sa kitutu nanyo mochinjiwonasepfo, na maanya fungi kitutu na mowuya injiwona.”

¹⁷ Nahong'u walya wa kiloshyonyi maata wakawiana wo wenyi na wenyi, “A ikyo aluwia nyi kiki ngesa? Mwaanya sa kitutu nanyo mochinjiwonasepfo na mwaanya sa kitutu na mowuya injiwona? Kawehamba, Njikuhendya ko Wande?”

¹⁸ Nahong'u wakahamba, “A ikyo ahamba kya mwaanya kitutu nyikyo iki ngesa? Luichi kindo ahambapfo.”

¹⁹ Yesu kamanya ke wakundi imbesa kawawia, “Kindo muiweṟiwetsa mowesana kyakyo nyi ili ngahamba, ‘Mwaanya sa kitutu nanyo mochinjiwonasepfo na mwaanya fungi kitutu na mowuya injiwona?’

²⁰ Nyi lohi kya lohi ngamuwia, Kye nyo mochifuha na ikapa kilio na wuyana wu wochichihio. Nyo mochisokyo nyi fowa, kya indi fowa tso tsanu tsikae tsechihaluka msiha mwenyi.

²¹ Ili mndu mka mlemo arakwo nyi awawyo, nekewado nyi fowa kipfa kiheri kyake kefee kyamshika, indi mandi mana amfeo nakikumbwose mawina halyapfo kipfa kya sia iya imbode ya mndu amfeo wuyanenyi.

²² Nanyo na wudo da, kiheri kya wulalu muisokyo nyi fowa. Indi njechiwonana nanyo lingi, na mrima yanu yechichihio na msiha fu fonu kwipfo mndu eidima imsokasepfo.

²³ Na mkonu fulya fukamshika mochinjiwesa-se kindopfo. Nyi lohi kya lohi ngamuwia, Kokoya moterewa Wande kindo kui rina lyako na kikawa ki nyi echimwenenga.

²⁴ Mṟasa wulalu mulemeterewe kindo kui rina lyakopfo. Keterewenyi nalyo mochienengo na msiha fonu fuichwo pacha.”

Njilewinga wuyana

²⁵ “Shindo shi ngamededa nanyo njiwemkapya semeṟi. Indi kiheri kikeri icha njilakidedase nanyo njemkapya semeṟi, kya indi njechimwongoya mbonyi tsa Wande na pata.

²⁶ Mkonu fo ili fochishika lyong'u mochiterewa kui rina lyako. Ma ngamuwia ke inyi njemuterewya ko Wandepfo.

²⁷ Kyamba o Wande namukundi nyo amony cha kipfa nyi mulenjikunda mukawenjiidikya ke ipfo ko Ruwa njicheye.

²⁸ Nyi ipfo ko Wande njiwukye ngacha na kunu wuyana, Wulalu ngada wuyana wu njiwuye na ko Wande chu.”

²⁹ Wadi wa kiloshyonyi kyake wakahamba, “Ate wulalu odeda na pata ulakilukapya semeṟi.

³⁰ Wulalu lomanya ke nyi uichi shindo shose ulahuṟi mndu mokuwesa. Nkyo kyaenenga lukaidikya ke nyi ipfo ko Ruwa ucheye.”

³¹ Yesu kawahalwo, “Oweṟe lu nyi moidikya?

³² Ambuyenyi kiheri kikeri icha na kilemcha kechitewa muhende irahanyitso orio mndu na koke munjideye-ho njimonyi. Ma ngakaa-ho njimonyipfo kipfa Wande nakeri na inyi.

³³ Ngamuwia isho kundu mukae muwode ofoṟo mukulungye na inyi. Ili mukeri kunu wuyana i muwodo nyi waale. Kya indi kukarishyenyi inyi ngambinza wuyana wu.”