YOHANE 15 - Bibilia Kui Mdedie fo Kimochi

¹ “Inyi nyii msabibu fo lohi na Wande chu oko ai mndemi.

² Orio iṟamba lipaṟikye koko likada lilawika ndunda lyo alirawuyaho. Na ili lii-pfo lyose liwika ndunda lyo alitasana liengeṟe iwika ndunda.

³ Nyo mulemba watsane kui mweeke fo idedo lyo njilemuwia.

⁴ Kyekaenyi-ho mochilungana na inyi na inyi njiwekaa-ho njilunganyi nanyo. Kikawa chando iṟamba lilechidima iwika ndunda lii kyanya kyalyo lilakulungye na msabibu, nanyo na wudo da mochiidama iwika ndunda mulakulungye na inyipfo.”

⁵ “Inyi nyi msabibu nanyo mukawa nyi maṟamba hafo. Ichu akulungye na inyi na inyi ngawekulunga nao nyio awa mowika ndunda tsifoi. Tare nyio inyi moidima iwuta kindopfo.

⁶ Mndu oose kada alakaa kiidi kyako o echikumbo kuleshe cha ṟamba lilawika lyikakumbo nja lyikawa mlalambodi. Wandu wakahasanya handu hamu wakahakumba modonyi hakakoṟo.

⁷ Kokoya mokaa-ho kiidi kyako inyi na madedo ho hako kokoya mokaa naho ipfo mrimenyi yanu, orio kindo moterewa mochiinengo.

⁸ Wande oko naing'anyisho kokoya mokumbia ndunda tsifoi na iwa wa kiloshionyi kyako.

⁹ Chando Wande alenjikunda na wudo inyi ngawemkunda nanyo. Kaenyi mukuwode na ikunda lyo lyako.

¹⁰ Kokoya moringa mawawaso ho hako nalyong'u mochikaa mukuwode na ikunda lyo lyako. Chando na inyi njileringa mawawaso ha Wande chu oko ngawekaa njikuwode na ikunda lyo lyake.

¹¹ Ngamemuwia isho kundu msiha fu foko fukae ipfo mrimenyi yanu, na masiha fu fonu fuwe fui na mweena.

¹² Iwawaso lyako lyo likeri liile, kekundanenyi muweni na wenyi chando njilewemukunda nyo.

¹³ Ma kuwode ikunda lyiidye mndu lyechiota ili lya mndu areka moo foke kimaduma kya mbuya tsakepfo.

¹⁴ Nahong'u nyo nyi mukeri mbuya tsako kokoya mohenda iwuta kilya njilemuwawasainyi.

¹⁵ Chi njikimhamba-se masingapfo kipfa mndu isinga o amanya kindo menyi olyo awutapfo. Nyi ngammaa imsenda nyo mui mbuya cha kipfa isho njileicho shiwuka ko Wande chu oko nsho njilemuinenga shose.

¹⁶ Chi nyi mulenjisambuṟa inyipfo. Nyio inyi njilemsambuṟa nyo na imuduma mukuhendekye mochikumbya ndunda. Na shilya mokumbya sho shikae shilechisia, ili o Wande echimuenenga isho mochimterewa kui rina lyo lyako.

¹⁷ Iki ngambawasa nyi kiile, kekundanenyi muwenyi na wenyi.

Isuika Wuyanenyi

¹⁸ “Kokoya wuyana wu womusuo manyenyi ke nyi wulewooka injisuo inyi wuka mawokioonyi.

¹⁹ Kima muwei wa kiwuyana, wuyana wu wuwechimukunda nyo mlai wandu wawo. Indi ili nyo wa mlai kiwuyana na inyi njilemusambuṟa njemletsa na wuyana-wu lyo lyatewa wuyana wu womsuo.

²⁰ Kumbuonyi shilya njilemuwia: Kuipfo mndu isinga ang'anye menyi olyopfo. Komkoya nyi walenjiterengya inyi, nanyo na wudo wechimuterengya. Kukoye waweringa madedo hako na iho hanu nyi wechiharinga-da.

²¹ Kya indi ishi shose wechimuwutya nyi kipfa kya rina lyako inyi, kipfa walaichi ichu alenjiduma.

²² Kima njilawemche na ideda nawo wawehoyo owingo lo wuyamaṟipfo. Indi wulalu wakuwonya mweeke fokuwuta owingo lu lowopfo.

²³ Mndu kanjisuo inyi nawesuo na Wande chu oko.

²⁴ Kima njilawemetana ipfo kiidi kyawo ngata tsilya, tsilawemtano nyi mndu ungi wawekaa wai na owingo lo wunyamaṟipfo. Kya indi wulalu nyi wahawonyi da wakawensuo inyi na Wande chu oko wakawemsuo.

²⁵ Kya indi kilehendaka kido kundu idedo lilya liinukye-ho lilya lii-ṟehye ipfo wuwawasonyi wowo lyehamba, ‘Walenjisuo isuo lilawode tewe.’”

²⁶ “Ilindi Mkarishi echicha ichu njechimdumya inyi njii ko Wande nyio Mumuyo o wukilohi awukye ko Wande nao nyi echiwika-ho kiṟingishyo kyenjiṟingishya inyi.

²⁷ Nanyo na wudo da mochiṟingishya cha kipfa muhendesanyi na inyi wokia mawokyonyi.”