YOHANE 14 - Bibilia Kui Mdedie fo Kimochi

¹ Yesu kawawia, “Ma mulanenewuke ipfo ngoonyi tsanu. Idikienyi Ruwa muwenjidikya na inyi.

² Ipfo kanyi ka wande oko nyi kuipfo shidembo shifoi. Koka shila wudo njiwemuwia. Wulalu njikeri ihenda imteseheṟya-ho hando.

³ Na ili njihenda imteseheṟya-ho hando, nyi njechiwuya lingi njiche imwondwo na ipfo koko; kundu hando inyi njikeri mpfondo nanyo mochikaa.

⁴ Na kundu njihenda njia yeshikapfo muichi.”

⁵ Adi Toma kambia, “Ndumi, kundo uihenda iyo luichi manyalepfo, a nyi wuda lochimanya njia yo?”

⁶ Adi Yesu kahamba, “Inyi nyiyo njia, lohi na moo. Ma kwipfo msa echishika ko Wande alashitso nyi inyipfo.

⁷ Kokoya monjimanya inyi, nao Wande oko na muwemwichi-da. Na wulalu da mommanya na imbona.”

⁸ Adi Filipo kambia, “Hoi Mndumii, keluloṟe-wo Wande chuo, naso lochifuda.”

⁹ Adi Yesu kambia, Filipo kiheri ki kyose ngamekaa nanyo na iyo kulanjimanye? Ichu amenjiwona inyi ammaa iwona Wande. A kyawa kida ili ohamba, keluloṟe-wo Wande chu?

¹⁰ Alewo kulaidikye ke inyi njii-msanze na Wande nao Wande ai-msanze na inyi? Madedo ho ngamuwia moose manya hawukye koko njimonyipfo. Ni Wande chu ai kiidi kyako nyi awa moṟundya-ho mawuto hake.

¹¹ Kiwaṟi munjiidikye ke inyi njii-mlunge na Wande nao Wande ai-mlunge na inyi, Shila wudo njiidikienyi kipfa kya mawuto ho hako.

¹² Ni lohi kya lohi ngamuwia, Mndu kanjiidikya inyi, mawuta ngawuta nao da echiwuta, na manenenene kota ho echihawuta, nyi kipfa inyi nyi ipfo ko Wande njihenda.

¹³ Na orio kindo mochiterewa kui rina lyako inyi nikyo njechikiwuta kundu Wande nang'anyisho ipfo kiidi kya Mana.

¹⁴ Kindo moterewa kyakyo kui rina lyako njechimuwutya inyi.

Mumuyo Mwele

¹⁵ "Kokoya monjikunda nyi mochiwada mawawaso ho hako.

¹⁶ Na inyi njechiterewa Wande nao echimwenenga Mtarami ungi nawe mokaa nanyo itane mlungana.

¹⁷ Nyio Mumuyo o wukilohi, ichu wuyana wu wulaidima imbada kipfa wulawode meso hembona ma wuṟango wommanya. Nyo nyi mommanya kipfa nyi aimukaya kechitsinda mrimenyi yanu.

¹⁸ “Inyi ma njechimda-ho wangoendapfo, nyi njiicha-se na konu.

¹⁹ Kutsuhae kiheri sa kyangu wuhana wu wulenjiwona-se. Indi nyo ni mochinjiwona kipfa inyi njii na moo nanyo da mochikaa na moo.

²⁰ Mkonu fulya ili fochishika ni mochimanya ke inyi njii-mlunge na Wande oko nanyo muiwalunge na inyi, na inyi njii-mlunge nanyo.

²¹ Mndu akuwode na mawawaso hako kawa moharinga nyio mndu anjikundi. Na mndu anjikundi nyi echikundo nyi Wande oko. Nao inyi njechimkunda na ikuloṟa nao.”

²² Nahong'u Yuda (chi mana o Iskariote-pfo ulya ungyi) kambia, “Alewo Mndumii, nyi kyawa kida ili uikuloṟa naso koda kulakuloṟa na wuyana wu?”

²³ Yesu kahalwo kambia “Mndu kakaa-ho anjikundi nyi idedo lyo lyako echiliringa, nawo Wande chu oko echimkunda naso nyi lochicha ikaa koke.

²⁴ Mndu kada alanjikunda ma madedo ho hako aharingapfo. Na idedo lyo moliicho chi lyako inyi njimonyipfo kya indi nyi Wande ichu alenjiduma.

²⁵ Isho nyisho ngammaa imuwia kiheri ki njii nanyo.

²⁶ Indi Mkarishi chu nio Mumuyo Mwele, ichu Wande echimuduma kiwe kui rina lyako, o echimpfunda shindo shose na imtamuṟya kya shose njilemuwia inyi.”

²⁷ “Nyi ofoṟo ngamudeya, nyi ofoṟo lu loko ngamusumba. Na msumbye foko chi fukeri cha fo wuyana wupfo. Mamlanenewuke, ngoo yanu ilatautau.

²⁸ Nyi muleicho njechimuwia ke njihenda; na iwuya njechiwuya na konu. Ukoye muwenjikundi nyi muwechichihio ili njihenda ko Wande kipfa o nanjing'anyi inyi.

²⁹ Na wulalu ngamaa imuwia ilindi kilameshika ikuwia kido kundu ili kyechiwa kido; muwute-ho iidikya.

³⁰ Njikideda-se nanyo shindo shifoipfo kyamba mangi ii ya wuyana wu naicha. Koko inyi echiiidima kindopfo.

³¹ Kya indi kundu wuyana wu wuhende imanya ke njikundi Wande na chando Wande wuhende imanya ke njikundi Wande na chando Wande alenjiwawasa nyi wudo njiwuta. Kurenying'u luwuke aa luhende.”