YOHANE 13 - Bibilia Kui Mdedie fo Kimochi

¹ Mkonu fulya mnene fo Pasaka fulameshika ihoya Yesu amemanya ke kiheri kyake kyamshika nawuke kunu wuyana iwuya ko Wande. Nao msa alewa mokunda iwa wake mandi ai kunu wuyana nyiwudo-ng'u alewaloṟa mkudye foke tane mainukyonyi.

² Nahong'u Kilayo kilya kii-kyaale Yesu na wa kiloshionyi na ichu mkumbi amemmaa yamtsa wuṟingi ipfo mrimenyi fo Yuda Iskariote ai mana o Simon wohenda iṟingya Yesu.

³ Nao Yesu aweichi ke nyi Wande amaa imdambikya shindo shose mawokonyi hake, na ipfo ko Ruwa nyipfondo acheye, na ipfo ko Ruwa mfondo aiwuya napfo.

⁴ Nahong'u kakure alya kilionyi kya Kilayo kilya kawuta nguo yake ya huye. Kaende kiwaraṟa kya nguo kakupfunga nakyo oo kitsinyi.

⁵ Kawuya kaletsya mṟinga iraunyi kawoka isanja wa kiloshyonyi kyake madende kahaangwo na kiwaṟaṟa kilya akupfungye nakyo.

⁶ Nahong'u kashika oo ko Simon Petro, na o Petro kambia, “Hoi Mndumii, nawo otana osanja madende?”

⁷ Yesu kahalwo kambia, “Ikyo njiiwuta okimanya wulalupfo, indi nyi ochikimanya ili numa.”

⁸ Adi Simon Petro kambia, ochinjisanja madende ma indi-pfo; Yesu kambia, “Ngada ndakusanja uwode kita na inyipfo.”

⁹ Adi Simon Petro kambia, “Ho Mndumii njisanja, ma chi madende hako tupupfo, indi na mawoko ha na mdo fu.”

¹⁰ Yesu kambia “Ichu amsamba awode echikisanjosepfo, shile madende ho tupu, Kya indi nyi a mheṟemtsu-ng'u ose. Nyo mui waheṟemtsu kya indi ma chi wosepfo.” (

¹¹ Kyamba Yesu aichi ulya mtwaṟi oke, nkyondo ahambya, “Ma mui waheṟemtsu mosepfo.”)

¹² Kekiidima iwasanja madende na ikuṟaaya nguo tsilya tsake kekidamya kawawia, “Ngesa na mamonya kindo ngambutya?

¹³ Nyi mochekembia, ‘Njii Maarya na Mndumii, na kya lohi mokehamba kyamba na mbekukerye kudo.

¹⁴ Kyasia-ng'u kokoya inyi nji Maarya na Mndumii ngammaa imsanja madende, nanyo nyi kiwembaṟi isanjana madende muvenyi na wenyi.

¹⁵ Kyamba njimbikye kichano kundu nanyo muwewuta chando inyi ngambutya nyo.

¹⁶ Nyi lohi kya lohi ngamuwia. Kwipfo mndu isinga ang'anye mndumii olyopfo, manya mndu ai mdume ang'anye ulya alemdumapfo.

¹⁷ Mukamekumanya-ng'u ikyo nanga nyo ili mochikiwuta.’”

¹⁸ “Chi ngadeda njido kyanu mosepfo. Inyi njiichi iwa njilewasambuṟa. Kya indi nyi kochihoya kyeinutsa ki-kiṟehye kehamba, ‘Ichu alie mkate foko nahaluka injiterengia.’

¹⁹ Nyi ngasonguo imuwia wulalu kilameshika iwa kundu ilindi kyeshika iwa mukuwutye-ho iidikya ke nyio inyi.

²⁰ Nyi lohi kya lohi ngamuwia, ‘Ichu aambya mndu ngamduma nyio inyi anjiambya.’ Na ichu anjimbya inyi nyi aambya ichu alenyiduma.”

Yesu ahamba chandu echiṟiingyo

²¹ Kyasia Yesu kekihamba iki kawado nyi rihima mnu ipfo mrimenyi kahamba napata, “Nyi lohi kya lohi ngamuwia ke iya kiidi kyanu umu-ho nyi echinjitwaṟa.”

²² Nalyo walya wa kiloshyonyi wakaambuyana mndu na odoe wai kitambisa walamanye kya mndu adeda kyake.

²³ Na kwipfo umu o wa kiloshyonyi kyake adamye-ho echikuihetsa kipetehu kya Yesu ai mkunde oke.

²⁴ Naho Simon Petro kamkemya ke nawese mbei uhya aideda kyake.

²⁵ Mndu ulya o kiloshionyi katikiria kechikuihetsa kipetehu kya Yesu kambia, “Hoi Mndumii, na nyio wu?”

²⁶ Naho Yesu kahalwo. “Nyio ichu njechimchoweṟya itangamra na ilimnengya.” Kachoweṟa itangamra kalinengya Yuda mana o Simon Iskariote.

²⁷ Nao Yuda kyekiambia itangamra lilya nalyo liyenyi Satana kamwanga. Nahong'u Yesu kambia, “Iki urie iwuta kehenda iwuta owinyi.”

²⁸ Indi walya wadamye-ho wechilya chonga kwipfo ma umu alemanya nyi ambia kikipfo.

²⁹ Kukakaa-pfo wekusaṟa kya Yuda ili awei moringa mfuko fosuṟuma fesa kulako Yesu ambia, Henda ihuṟa shilya shiwaṟi shesungusia mkonu fu mnene, ang'u ke naenenge wakiwa kindo kya nga.

³⁰ Nahong'u Yuda amemaa iambia itangamra lilya nalyo liyenyi kaida na ipfo nja. Nalyo kuwei kio.

Iwawaso lihya

³¹ Nahong'u Yuda ekihenda nja Yesu kahamba, “Mana chu o mndu nyi wulalu ameng'anyisho na Ruwa kaweng'anyisho ipfo kundo ai.

³² Kokoya kiṟumi kya Ruwa kyamewono kiidi kya Mana nao Ruwa nyi echimng'anyisha Mana ai nao. Na imng'anyisha echimng'anyisha wulalu da.

³³ Wana wako, njitsinda nanyo hando ha oweṟe da. Nyi mochinjipfula nalyo kivewa kidi chando njilewia wasongoru wa Wayuda ngahamba, ‘Kundo kulya njikuhendya moidima icha naho-pfo.’ Nanyo na wudo ngamuwia wulalu.

³⁴ Nyi iwawaso lihya ngamuinengya ke mochikundana; kundanenyi chando; inyi njilemukunda, nanyo na wudo mbekundana.

³⁵ Kindo orio mndu ose echimanya nakyo ke nyi mui wa kiloshyonyi kyako nyi ikundana ili mochikunda mudo.”

Yesu ahamba chandu Petro echimkana

³⁶ Simon Petro kambia, “Hoi Mndumii, nyi ku uihenda?” Yesu kahalwo, “Kulya kundo njihenda iyo ochiidima injilatya-ho wulalupfo, kya indi ochinjilatya ili numa.”

³⁷ Petro kambia, “Alewo Mndumii, kitewe njilaidima ikulatya wulalu nyi kyo iki? Njechireka moo foko njikuletse-pfo.”

³⁸ Yesu kahalwo. “Nyi ukuṟeheṟye ipfa kipfa kyako? Nyi lohi kya lohi ngakuwia, olong'onyi lulamekapa nochinjikana kaṟaṟu.”