YOHANE 12 - Bibilia Kui Mdedie fo Kimochi

¹ Nahong'u kuwetsuheṟe mfiri iṟandaṟu mkonu mnene fo Pasaka fukishike Yesu kashika kulya Betania kundo Lasaro awekyekaa ulya Yesu emṟutsa wapfunyi.

² Napfo wakamsungusia choonga ili kyukanyi. Na mndu mopfuṟukanya-ho m Marita. Na Lasaro nyi ai o ipfo kiidi kya walya wadamye na Yesu kilionyi kya choonga.

³ Naho Maria kawuta kiraryo kya mafuda ha mbaṟi ya Nardo ha wuhuru wung'anyi hashikye ratili imu, kacha ishia Yesu madende kawuya kaangatsa madende halya na njui tsake. Mba iya ikarumbalala opfamo lo mafuda halya.

⁴ Na Yuda o Iskariote umu o walya ikumi na wawi ipfo kiidi kya walya wa kiloshyony kyake (nao nyio sa echikaa namtwaṟe Yesu,) kahamba,

⁵ “A mafuda ha kima hakumbo ko dinari mahana haṟaṟu tsiinengo wandu wakiwa nyi ki?”

⁶ Na kyemnenga kahamba ado chi kipfa ili echikusaṟa kya wakiwapfo, nyi ili ai mwiwi arie mfuko fulya na shilya shechidambiko kafoi kawa moṟoṟokwo-ho.

⁷ Naho Yesu kahamba, “Mulawinyishe mka-chu kumdeye-ng'u nahende ihasuṟuma kuwede mkonu foko fo iṟiko.

⁸ Kyamba wandu wakiwa nyi mukeri nawo mafiri hose, mndu mulakeri nao mafiri hose nyio inyi.”

Njama tsewaha Lasaro

⁹ Nahong'u mamwingi fulya fung'anyi fo ipfo ko Wayuda ili wamwicho ke Yesu nyi kulya Betania ai wakacha napfo chi kimaduma kya iwona Yesu tupupfo, indi nyi kundu wawone na Lasaro ulya emṟutsa wapfunyi.

¹⁰ Na wakohanyi walya wang'anyi wakadumbwo chila kundu wawahe na Lasaro.

¹¹ Kipfa nyio aletewa Wayuda wafoi wakawa wakalekana na wasongoru wawo; wakaidikya Yesu.

Yesu aida na Yerusalemu na ngoru

¹² Kyasia ili lya ngama mamwingi fo wandu fulya fucheye napfo kya mkonu fulya mnene wakaicho ke Yesu nyi aicha na kulya Yerusalemu.

¹³ Wakawada maṟamba ha makangachi wakakure wahende imwambya wakakoṟoṟoma ilaha, “Hosana. Kwadapfumo ichu acha kui rina lya Mndumii kawewa mangi ya Israeli.”

¹⁴ Na Yesu kakuwonya mchungu mkoho kadamia mhongo-hu fofo. Kiwekehendeka chando kiikiṟehye kehamba.

¹⁵ “Kulawone kochiowuo iyo ukeri mṟi fo Sioni. Ambuya Mangi yapfo aikuchea ai mdamiṟe mhongo-hu fo ihache lya mchungu.”

¹⁶ Nakyo chando kikeri wa kiloshyonyi wake waweichi kuwokapfo. Nyi mandi halya Yesu amhenda iwiko mwitoṟi lyo mandi walekumbwo ke nyi wudo kii-kiṟehye kyake na iwuta wakawembutya wado da.

¹⁷ Na mamwingi fulya fo wandu walya wawei nao mkonu fulya alelaha Lasaro nawuke ipfo opangenyi kamṟutsa wapfuny wo wakahamba-ho kyemṟingishya.

¹⁸ Nakyo kikaweinenga mamwingi fulya fo wandu wakahenda imwambya kipfa waleicho ke Yesu aletana ikyo kikawewa kichao king'anyi kidi.

¹⁹ Nalyo Wafarisayo walya wakawiana mndu na odoye, “Muwonyi da? Loidima kindopfo! Ambuya wuyana wose wuimwosha.”

Wagriki maata walangie iwona Yesu

²⁰ Na ipfo kiidi kya wandu walya waledo na Yerusalemu wahendewikya Ruwa wuindi mkonu fulya mnene kukawekaa-pfo na Wagriki waangu.

²¹ Wo wakachea Filipo o kulya Betisaida ya kulya Galilaya. Wakamterewa wakahamba, “Hoi Mndumii, lulangie iwona Yesu.”

²² Filipo kakure kahenda iwia Andrea. Andrea kasangana na Filipo wakahenda iwia Yesu.

²³ Na Yesu kawahalwo kahamba, “Aikyo kiheri kyamshika Mana chu o mndu nahende iwiko mwitoṟi.

²⁴ Nyi lohi kya lohi ngamuwia, ndunda iya ya ngano kokoya yada ilaoloka teri-hu ikapfia-ho yo yadeo ikakaa ido. Indi kokoya yampfia-ho yo yechido iwike ndunda tsifoi.

²⁵ Ichu mokunda moo foke nekaa nafudetse. Na ichu mosuo moo foke kunu wuyana aifuringa fushike ikaa mlungana.

²⁶ Kokoya mndu akundi njipfuṟukanya nache injilatya. Na hando inyi njikeri mpfondo na mpfuṟukanyi oko echikaa. Na kokoya mndu anjipfuṟukanya Wande nyi echimng'anyisha.”

Yesu adeda kya opfu loke

²⁷ “Wulalu mrima foko fotautau, na inyi njihambe njida? ‘Ngesa njihambe,’ Hoi Wande, njiletsa na saa ii ikeri-ho? Kya indi kimaduma ngakoya saa ii nyikyo ikyo.

²⁸ Hoi Wande, kunda ung'anyishe rina lyapfo iyo.” Nalyo ṟu likaichio liwuka ipfo ruwehu lyechihamba, “Ngameling'anyisha na lingi-se njechilinganyisha-da.”

²⁹ Nahong'u mamwingi fo wandu wahoṟoki-ho wakaicho iki wakahamba, “Nyi ikuṟuṟuma lyadeda nao.” Wengi wakahamba: “Nyi malaika adeda nao.”

³⁰ Yesu kahalwo kahamba, “Ṟu lyo kimaduma lyadeda chi kipfa kyako inyipfo, indi nyi kipfa kyanu nyo.

³¹ Wulalu wuyana wu wohenda iwonyo mdumbuye. Wulalu mnene o wuyana wu echifunyo kulya nja.

³² Na inyi ngammaa iiryo huye njilekana na wanda ii lyo njechiwahomwo orio umu na koko.” (

³³ Kadeda ado kechenga kya opfu loke ke nyi lo mbaṟi njiki echikaa napfe.)

³⁴ Nahong'u wandu walya wakuwumbye-ho wakamhalwo, “So nyi lokeicho kya Kristo kii-kihambe ipfo wuwawasonyi wodu ke nyi echikaa-pfo mlungana. A kyawa kida-ng'u ili iyo ohamba ke nyi kiwari Mana chu o mndu nahende iiryo huye? A Mana cho o mndu nyi o ku ngesa?”

³⁵ Yesu kawawia, “Kutsuhae-ho kiheri sa kyangu sa ii ikeri-se nanyo. Chumie ili mukeri na sa ii mulawone mohenda ihoyo meema, kyamba ichu mochumia memenyi aichi ma kundo ashikapfo.

³⁶ Ili mukeri na sa ii keidikyenyi sa kundu muwe wana wasa.” Yesu kyekimaa ideda madedo-ho kawukaho kahenda isheṟuka.

Wandu walawode iidikia

³⁷ Ma amemaa iwuta ṟiho tsing'anyi tsidi wawonyi nawo ma walakunde imwidikya.

³⁸ Nyi kilehendeka kido kyeinutysa idedo lya mwikimbi Yesaya lyehamba, “Hoi Mndumii, a mndu aleidikya shilya luiongoya nyi wu? Nao nyi o ku atambaṟukye meso nawone wuidimi wo Mndumii?”

³⁹ Na kimaduma walaidima imwidikya nyi kilya kingi Yesaya alededa kehamba.

⁴⁰ “Ruwa nawahye meso hawo kaumiṟa na ngoo tsawo kundu walahende yambwo na meso hawo, ma ichihio na ngoo tsawo wawuyei nyi Mndumii ahamba, na inyi njiwakiṟe.”

⁴¹ Nyi wudo Yesaya alededa lya alewona wuitoṟi woke kawa modeda kyake.

⁴² Ma kudo kuweipfo na wasongoru wafoi wa Wayuda waleidikya Yesu kya indi kipfa kya iowuo Wafarisayo walakihambe na pata wakoye wawuto sinagogenyiyi.

⁴³ Kyamba nyi wawekundi iṟumisho nyi wandu kota irumisho nyi Ruwa.

Idedo lya Yesu lyekyeanduya

⁴⁴ Nahong'u Yesu kahamba na ṟu lyinganyi, “Mndu anjidikye inyi chio inyi anjiidikye tupu-pfo, naidikie ichu alenjiduma daa.

⁴⁵ Na ichu anjiwonyi inyi, nyi awonyi na ichu alenjiduma daa.

⁴⁶ Inyi nyi njicheye na kunu wuyana njikeri sa na orio mndu anjiidikye inyi kundu alakoye ikaa meemenyi.

⁴⁷ Na kokoya mndu aicho madedo hako kada alahawada chio inyi njechimbonya owingopfo. Kyamba kitewe ngacha chi kundu njiwonye wuyana wu owingopfo kya indi nyi kundu njikiṟe wuyana wu.

⁴⁸ Ichu monjimina kada alaambya madedo ho hako nahawade o nawode mombonya owingo. Idedo lyo lyako ngamdeda lyo lyechimbonya owingo Mkonu fulya Fofurumya.

⁴⁹ Kipfa inyi kilya njilededa chi koko inyi kiwukye-hopfo. Nyi Wande-chu oko ichu alenjiduma o anjinengye iwawaso lya kindo kyededa na ihamba.

⁵⁰ Na inyi njiichi ke kilya o awawasye kyo kirie moo fo mlungana. Nahong'u ngadeda kilya Wande alemmaa injiwawasia njidede.”