YOHANE 11 - Bibilia Kui Mdedie fo Kimochi

¹ Kyasia kuwekeri-pfo mndu aluo nyio Lasaro o kulya Betania (o mṟi fulya fo Maria na Marita manawo.

² Na Maria nyi ulya aleshimbwo Mndumii na mafuda ha opfamu sa lucha, kaangatsa madende hake na njui tsa mdonyi foke. Na msacha chu oke nyio Lasaro ulya aweluo.)

³ Nahong'u washiki walya wake wakadumya Yesu ndumi wakahamba, “Hoi Mndumii, mbuya yapfo nyi aluo.”

⁴ Yesu kekiicho ado kahamba, “Ndaṟe ii chi ikeri ya opfupfo, chila kipfa kya mng'ano fo Ruwa kundu Mana chu o Ruwa nang'anyisho.”

⁵ Na Yesu nyi ekundi Marita na manomae Maria na Lasaro.

⁶ Kyasia amicho Lasaro nyi aluo Yesu katsinda-se mfiri iwi kulyando awekeri.

⁷ Kidima kawia walya wa kiloshyonyi kyake, “Kendeng'u luwuye na kulya Yudaya.”

⁸ Walya wa kiloshyonyi wakambia, “Hoi Maaria, kandi Wayuda walya werie ikukapa na maho, na iyo owuya napfo lingi?”

⁹ Yesu kahalwo, “Saa tsa mfiri chi tsiipfo ikumi na tsiwi? Kokoya mndu achumia kiheri kya mfiri echikapa mtuliapfo kipfa nyi awonyi sa ya wuyana wu.

¹⁰ Indi kokoya mndu achumia ili kio nechikapa mtulia kipfa sa iya ilakeri nao.”

¹¹ Yesu ekihamba adi kawuya kalungyaho kingi kawawia, “Mbuya chu odu Lasaro nyi alee, kya indi njihenda-pfo njimpang'tse.”

¹² Nahong'u walya wa kiloshyonyi wakambia, “Hai Maaria, kokoya naleee madonyi nyi echichia.”

¹³ Na Yesu adeda ado kehambaho opfu loke, nawo wakahamba lako nyi aideda kya mahombyenyi ha mado.

¹⁴ Nalyo Yesu kawawia na pata, “Lasaro ampfa.

¹⁵ Na inyi ngachihio ili njilawekeriho kipfa kyanu nyo kundu muwuteho iidikya. Indi nndenyi-ng'u luhende kulya koke.”

¹⁶ Nahong'u Toma (ulya alaho o mbasa) kawia wodoya walya wa kiloshyonyi “Nndenyi-ng'u naso, luhede ipfa hamu nao!”

Yesu nyio uṟuki na moo

¹⁷ Nahong'u Yesu kekicha-ho kakoya ammaa mkonu iina opangenyi.

¹⁸ Na kowuka kulya Betania ushike Yerusalemu nyi ochimaa mhendo fo kyenga kya saa ushike kilometa tsiṟaṟu (mastadio 15).

¹⁹ Na Wayuda wafoi wawecheye na kulya kanyi ko Maria na Marita kundu wechiwawanza kya opfu lo msacha chu owo.

²⁰ Nahong'u Marita kekiicho Yesu akeri icha kahenda imwambya na Maria kakaa kulya kanyi.

²¹ Marita kawia Yesu, “Hoi Mndumii, nokoe iyo kuwekeri-iya msacha oko nawechipfapfo.

²² Nako na wulalu njiichi orio kindo ochiterewa Ruwa nao Ruwa echikuenenga kyose.”

²³ Yesu kambia, “Msacha opfo nyi echikuṟukia.”

²⁴ Marita kambia, “Njiichi nyi echikuṟukia iya maṟukyenyi ili Mkonu fulya fofurumya.”

²⁵ Yesu kambia, “Inyi nyio wuṟuki na moo. Na mndu anjiidikye nekaa-ho na moo ma kapfa.

²⁶ Na ichu aiho na moo kanjiidikya ekaa napfe ma indi-pfo. Ngesa uweidikye kudo?”

²⁷ Nao kambia, “Ee-wo Mndumii, nawo ngamekuidikya nyi ui Kristo Mana chu o Ruwa ulya awechicha na kunu wuyana.”

Yesu aifihiṟa mchenyeṟe

²⁸ Kekihamba ado kakure-pfo kahenda ilaha Maria ulya ai manomae kambia kya kiṟika, “Marya amcha nao nyi akulaha.”

²⁹ Nao kekiicho ado kakambiṟa ikure owinyi kahenda alyando Yesu ai.

³⁰ Na Yesu awemeshikye kulya mṟinyipfo, nawei alyando ekumbuhana Marita.

³¹ Nahong'u Wayuda walya wawei na Maria ipfo mba wechimbanzawanza ili wawonyi Marita akure owinyi chuṟu kehenda nja wakamwosha wehamba ke nyi echihenda ipfo opangenyi ihenda ikapya-pfo kilio.

³² Nahong'u Maria kekishika alya ndo Yesu ai kekimbona adi kakuhutsa wanda oo madendenyi hake kambia, “Hoi Mndumii, nokoe iyo uweiho msacha oko nawechipfapfo.”

³³ Nahong'u Yesu kekiwona kelia na Wayuda walya wacha warianyi nao nawo, kawado nyi rihima ipfo ngoonyi kawa kirihisa o amonyi.

³⁴ Kahamba, “Nyi ku mumlaṟye?” Wakambia, “Njoo-wo Mndumii, noambuye.”

³⁵ Yesu katonyitsa matihi.

³⁶ Nahong'u Wayuda walya wakahamba, “Keambuyenyi chando awemkundi.”

³⁷ Nawo maata-ho wakahamba, “A ichu aleweambuṟa-se meso ha kipfupfuṟe kilya nalaidime iima Lasaro nalapfe?”

Yesu aṟutsa Lasaro

³⁸ Nahong'u Yesu kawuya iwado nyi rihima ipfo ngoonyi lingi kashika oo opangenyi. Na opanga lo luwei utoche na iho li-ihekye oo momu.

³⁹ Yesu kahamba, “Keirenyi-ho iho li.” Marita mshiki o mpfu ulya kambia, “Hoi Mndumii, amshika idaa! Kyamba mkonu fu nyi fo kaana lang'u.”

⁴⁰ Yesu kambia, “A lyando ngawekuwia, Komekuidikya nyi ochiwona wuitoṟi wo Ruwa?”

⁴¹ Nalyo wakairaho iho lilya. Na Yesu kairya meso huye ruwehu kahamba, “Hoi Wande, ngakuana ili okenjiadanya.

⁴² Na inyi na mbeichi nyi owa monjiadanya kiheri kyose. Kya indi nyi kipfa kya wandu wa wahoṟoki iya waiṟingichye nkyondo ngakihambya kundu wechiwuta-ho iidikya ke nyi iyo unjidumye.”

⁴³ Kekihamba ado kakoṟoṟoma na ṟu ling'anyi, “Lasaro, ncho na nja.”

⁴⁴ Nalyo lienyi mpfu ulya kawukaho kacha na nja ampfungye shidami sha nguo madende ho na mawoko ho na kyamu kyake kii-kiwoshye na kidami kya mbiṟuko. Yesu kawawia, “Kempfungwonyi mumlekye nakuhendye.”

Njama tsewaha Yesu

⁴⁵ Nahong'u Wayuda wafoi walya wacheye na kulya ko Maria wekiwona kilya Yesu awuta wakamwidikia.

⁴⁶ Na walya maata-ho wakahenda kulya ko Wafarisayo wakawawia kilya Yesu awuta.

⁴⁷ Ko ikyo wakohanyi wang'anyi wakasangana na Wafarisayo wakalaha chila iya ing'anyi ya wanjama wakahamba, “A luwike luda ili mndu chu awa mowuta ngata tsifoi tsido?

⁴⁸ Lukaamda nakae ado wandu nyi wechisia ipfo koke wahende imwidikya wose. Nalyo Waroma wechicha wechilusoka sanga-li na Hekalu-li na inyamaṟa mkambo fodu.”

⁴⁹ Nahong'u o umu ipfo kiidi kyawo nyi Kayafa awei Mkohanyi Ang'anyi o maka fulya o kawawia, “Muichi ma kindopfo.

⁵⁰ Ma mulakusaṟye ke nyi kichaho konu mndu umu napfe hando ha wandu wa sanga lyose kota wandu wa sanga lyose wechiarisika?”

⁵¹ Na ili alededa ado chi ipfo koke kwenyi liwewukyepfo. Kya indi nyiili awei mkohanyi ang'anyi o maka fulya adeda ado kechihamba kisuku kyeṟingishya ke Yesu ai mteṟye napfe kyekiṟa mkambo fu fowo.

⁵² Ma chi kyekiṟa mkambo fu fo wandu tupupfo kya indi kundu na wana wo wa Ruwa wanyanyaṟikye wo nawasanze wawe wamu.

⁵³ Nahong'u wokia mkonu fulya wasongoru wa Wayuda wakachilya ihenda iwaha Yesu.

⁵⁴ Nalyo Yesu nalakiwe-se moidaida na pata ipfo ko Wayuda walya, kya indi kawuka-ho kahenda sangenyi liwe likinganyi na kundo kulya ko olele, kashika mṟinyi folaho Efraimu katsinda-pfo ai hamu na wa kiloshyonyi kyake.

⁵⁵ Nahong'u Pasaka ya Wayuda iwei kufui, wandu wafoi wakahenda ido na kulya Yerusalemu wawuka ipfo sangenyi lilya, Pasaka ilamshika ihoya, wahende ikuilisha.

⁵⁶ Nawo nyi Yesu waweimpfula wakadeda wo wenyi na weny wahoṟoki ipfo hekalunyi wehamba, “A nyi mowona kyawa kida? Nyi lohi nechida alechicha isenguda mkonu ii mnene ngesa?”

⁵⁷ Na wakohanyi walya wang'anyi na Wafarisayo wo wakawawasa na pata wehamba, “Kokoya mndu ammanya kundo Yesu akeri naende mbonyi kundu wakoye imbada.”