YOHANE 10 - Bibilia Kui Mdedie fo Kimochi

Mfanano fo mlisi o machondi

¹ "Nyi lohi kya lohi ngamuwia, “Mndu kada alaida na mfiṟihenyi fo machondi aida oo mongo, kang'alawuo hando hengi o nyi mwiwi na msoki.

² Indi ichu aiida napfo aida oo mongonyi nyio ai mlisi o machondi.

³ Nao mringi o mfiṟiha kawempengeluya kichi. Na machondi halya hakaicho ṟu lyake. Na machondi halya hai hake amonyi kahalaha marina haho kahaduo nja.

⁴ Kamaa iduo halya hai hake nja hose nekehasongoya. Na machondi halya hakamwiwata kyamba haichi ṟu lyake.

⁵ Indi mndu mhenu hekemlatyapfo, kya indi nyi hekemdicha cha kipfa halaichi ṟu lya wahenu.”

⁶ Nyifong'u mfanano Yesu alewawia. Nawo walamanye ikyo arie iwawia nkyo iki.

Yesu nyi mlisi mcha

⁷ Nahong'u Yesu kawawiase, “Nyi lohi kya lohi ngamuwia, inyi nyi mongo fohenda kundo machondi hai.

⁸ Walya walenjisongoya nyi wawekeri waiwi na wasoki wose kya indi machondi halawaadanye.

⁹ Ngiṟi iya nyio inyi. Mndu aida napfo aidia koko nyechikiṟo na yanga napfo na iwuka napfo nawekoya na ura.

¹⁰ Mndu ai mwiwi nelekecha shila nyi kundu naiwe na ishinja na idetsa. Inyi njilecha napfo kundu mukoye iwada moo na mweena fofo fose.

¹¹ “Mlisi mcha nyio inyi. Ichu ai mlisi mcha nyi nekerekya machondi hake moo.

¹² Mndu chu ai mekelei ma alakeri mlisi, machondi ho halambaṟi hake, kyake kawona rumu lyechicha nao katihia-ho machondi ho kadicha. Na rumu likacha iharakwo na iharahanyitsa.

¹³ Cha kipfa ili o ai mekelei ma echisaṟa machondi hopfo.

¹⁴ Mlisi mcha nyio inyi. Na inyi njiichi iho hai hako, naho hakawekunjimanya.

¹⁵ Chando nao Wande anjiichi inyi na inyi njiweichi Wande, Na inyi ngarekya machondi moo.

¹⁶ Njiwode na machondi hengi-se halakeri ha mfiṟihafu. Kyaho nangaki na njihaende naho. Naho na hecheicho ṟu lyako. Naho kochikaa-ho ipo limu tupu na mlisi na umu mfi.”

¹⁷ “Nkyo kyaenenga Wande anjikundi ili ngakurekya-ho moo foko kundu njiwuye ifuwada-se lingi.

¹⁸ Ma kwipfo aifunjisokapfo kya indi nyi ngafulekya kui ikunda lyako njimonyi. Nyi njiwode pfinya ya ifulekya, njiwewode na pfinya ya ifuwada-se. Nyi wudo wande oko alenjiwawasia njiṟunde.”

¹⁹ Nahong'u Wayuda walya wakawuya idumbukanase kawi kipfa kya madedo halya hake.

²⁰ Wafoi wa ipfo kiidi kyawo wakahamba, “Nyi oṟuṟe lumbode na isuko kasuko. A nyi nkya ki-se mumwadanyia?”

²¹ Wengi wakahamba, “Madedo ho adeda chi hakeri cha ha mndu awodo nyi oṟuṟepfo. Alewo mooṟuṟe awechiidima itambaṟuo meso ha shipfupfuṟe ngesa?”

Yesu apiṟo nyi Wayuda

²² Nahong'u kushikye mkonu mnene kulya Yerusalemu fokumbwo ngumbwo ya hekalu ilesamyo. Na kiheri kilya kiwei kya mbeo.

²³ Na Yesu aweichumiachumia ipfo hekalunyi ipfo kiṟihenyi kyalyo kihambo kya Solomon.

²⁴ Nalyo Wayuda walya wakacha imtengetia wakahamba, “Mtano indi ochiluwika mkeumkeu? Kokoya ukeri Kristo iyo, keluwie-wo na pata ṟaa.”

²⁵ Yesu kawahalwo, “Nyi njilemuwia da nanyo mulaidikye. Maṟunda hako njiwuta kui rina lya Wande oko, nyiho-ng'u hainjiṟingishia.

²⁶ Nanyo ma mulaidikye ili mulakeri kambenyi lya machondi hako.

²⁷ Machondi ho hako nyi haicho ṟu lyako. Na inyi njihaichi naho hanjilatya.

²⁸ Na inyi ngahaenenga moo fo mlungana. Naho ma hechikaa hadeke-se ma mlunganapfo. Ma kwipfo mndu echiharakwo kunu owokonyi lokopfo.

²⁹ O Wande ahanjienengye nyi ang'anye wose. Ma kwipfo mndu aidima iharakwo ipfo mawokonyi ha Wandepfo.

³⁰ Inyi na wande lui wamu.”

³¹ Nalyo Wayuda walya wakawuya yende maho wamkape naho.

³² Yesu kawahalwo, “Maṟunda hafoi sa mecha ngamaa imbonesya nyo hawuka ko Wande. Ipfo kiidi kyaho nyi liki lyemtewa munjikape na maho ngesa?”

³³ Nalyo Wayuda walya wakamhalwo, “Chi kimaduma kya iṟunda liwe icha lurie ikukapa na mahopfo. Nyi kimaduma kya ngalali yapfo yeruma Ruwa, na ili iyo ukeri mndu o wandu kokutana Ruwa kumonyi.”

³⁴ Yesu kawahalwo, “A ipfo wuwawasonyi wonu chi kuwode-pfo idedo lii iṟehye lyehamba, ke, Inyi njilehamba, ‘Nyo nyi mukeri maruwa?’

³⁵ Kyasia walya waleshitsyo idedo lya Ruwa komkoya Ruwa nyi alewasenda maruwa na iki kii-kiṟehye ma kilechiwa ipfunguka.

³⁶ Ashika-wo inyi ili njiletano mwele nyi Wande kanjiduma kunu wuyana nyi monjihamba ke nyi ngaruma Ruwa ili ngahamba, njikeri Mana o Ruwa ko?

³⁷ Kokoya ngada njilawuta maṟunda ha Wande oko, denyi mulanjiidikye inyi.

³⁸ Indi kokoya ngawa mohawuta nahong'u mulanjiidikye inyi modeda, keidikyanenyi na maṟunda ho hako mukuwutye-ho imanya kya kisimirya ke o Wande ai na inyi na inyi njii na Wande.”

³⁹ Nahong'u wakawuya wakapfula mweke fombada. Nao kakuashuo ipfo mawokonyi hawo.

⁴⁰ Yesu kawada njia kaambada meda fo Yordanyi kashika kulya kundu Yohane epatsiya kakaapfo.

⁴¹ Wandu wakamchea wafoi, nawo wakahamba, “O Yohane ma alewuta ngata ya ṟihopfo. Kya indi kilya Yohane alededa kya ichu kyamba iwa kya lohi kyose.”

⁴² Nalyo wandu wa kulya wafoi wakamwidikia.